¹ Ola an mae hap dena: Alap mo ngein sin de kalang goltreizimdin hip– mensa Kristus Yesus hup goltreblakake, dekam de Kristussu de betek gweblan zi hip anakan tan-tan gulzimdin hip, “A kirekam sa nabakam jower.” Dekam zep Yesus zere mo dam taha nakore zisi abon osan dep zer soneka– zen de abe hap ayang gulblun hap. Ano bosena Yohanis. Ëe an hen ahana– Kristussu de betek gweblanna.
² Ëe men desae Alap onak kitak kara guk, ee dekam zebe bukunak awe ale guk. In zebe emsa damnak anakan tonbirida gweꞌan, “An eiwa Alap mo ola– mensa Kristus Yesus hamal hap nebe mae hap golzimkike.”
³ Zini men zen de hamal hap de ola ansa aha hap baca nul gwizimꞌik, hen men zen esane gwenkam i-san i-san nei gwibiꞌik, zen heꞌho gwibin nika sa Alap onakon hla nul. Sap molya holo gwek dekam sa ki lwal.
⁴ Aya-wal oso-wal men zen Asia mo langnak de tuju enkam de jematnak lowehen daꞌanke, ee an Yohanis ama ebe mae hap ale gulzimꞌin: Alap in Zen gweꞌara, Zen orep mes gweka, hen zeno gwenna molya topse gweblak. Enho zem, Zen tuju nwe-masekam zinik syal gwe-gwenda. Alap Zena, Enho zem, hen Kristus Yesus mae sa kwasang-kwasangna ebe mae hap mamkam nol gwizim. Hen nen zeno mae mo taha terenak esa lowehe gwer. Sap Yesus Zen Zen– Alap hap denaka de tatetekam golluwe gwen hap de Zi niye, hen tin nikon de nonol ngaya gwen Zini. Zen hen Zen– teipsin tanganna, auhu-kamanak de teipsin-teipsin nikonye. Zen nesa kwasang gwibiridaka, zep tilki. Neno mae mo karek-karekna dekam zep zere mo kalkam ngan gulsuku– te-lidak son nakon kim wet soblakke.
⁵ (1:4)
⁶ Zen dekam zep nesa Bi zem Alap onak dikim lowehe gwen hap siri gulsuku– dekam de Alap mo golak de syal ta gwen zi mo kim hendep denaban zeno bosesa teip gulsuk gweblan hap. Kristus Yesus Zen Zen– teipsin tangan Zi niye. Tingare sosonna zen Zebon sa hendep denaban lwa gwer. In eiwa!
⁷ Bira! Angkam man hataꞌara! Ëe, Yohanis, mese but de zerati gwe zannak hla ta guk. Kitak de zi de etan engaya gwenkam zen kirekam sa hen hla da gul, sap men zen hen dang nulblik. Tingare auhu-kamanak de zini gosa sa dablal. In eiwa kirekam tangan sa ki lwal! In eiwa tangan!
⁸ Alap man nesa gubiridaꞌara: “In eiwa kirekam sa lwal, sap Ëe an nonol lonesen nakore Zi, hen aumwa topnak de Zi. Ëe orep mese gwek, hendep angkam gweꞌan. Ano gwenna molya topse gwek. Kitak de sosonna zen Abon onak.”
⁹ Ëe an Yohanis. Nen Kristus hon de ang ta gwen wenya apdekam kareksae oltowe gwenan. Sap sa nesa kire hap karek da gwibir, sap nen anakare enlala nabane lowehe gwenan, “Nen mese Kristus mo irik ginnik biti gwek, zep ki nesa neibirida gweꞌan.” Asa zep hendep lang tekna Patmos san dep hiri dak, sap ee ama Alap onakore Yesus hup de ol dawemsa gol halada gwek.
¹⁰ Ner hom de Hari Minggukam, asa dekam Alap mo Enhona bi gweblaka. Dekam zebe ere mo tahan san sramin auku makare ol yawalsa sak– anakan kim asa gublukaye,
¹¹ “In desa kara guꞌura emki bukunak ale gun. Bukuna desa tujukam de jemat hap gol sonezim– men zen Asia mo langnak de tujukam de e-enak lowehe song gweꞌanke. Ë bosem-sena: Efesus, Smirna, Pergamus, Tiatira, Sardis, Piladelpia, hen Laodikia.”
¹² Ki zebe tahan san mae hap lero gwek– “An nara asa tonblaꞌara?” Dekam zebe tuju enkam de lampuna hlauludak– emas nakon de syal gweblandan naka.
¹³ Tujukam de lampuna in mo ngirinnik, zao zebe Zini hla tak– Zi Tangan makan, baju blal ala son naban hendep tana tahannak nyausubluk. Hen emas nakon de syal gwibin biti yawalsa daulku, hendep bik dannak hatak.
¹⁴ Nol alana ngap-ngapna– men kiye, but ngap-ngapna. Nwena syauk makan nihitilbliꞌak.
¹⁵ Tanana man nalilingtilbliꞌak– men kiye, tembaga ese ang gunnu. Hen zeno ol-gun aukuna men kiye– ho li yawal zannun aukuna.
¹⁶ Dam tahakam tuju enkam keisni teirensiꞌinka. Zeno mahala san de nebok eihya-ngi eihya-ngi ben-benna kiye. Nwe-masena man ngatan gweblaka– men kiye, yakla nwe ngatanna kim bolak zauk gwenda.
¹⁷ Ëe kime hla tak, ki zebe zeno nwenak zi tok makan zanzak. Hwena ki zep ze dam tahakam asa towanbla ineka– anakare ola ban, “Bahem airin. Ëe an nonol lonesen nakore Zi, hen aumwa topnak de Zi.
¹⁸ Ëe an Zen– ngaya gwen hap de Ausuna. Ëe mese sap tik. Hwena emki Asa hla tan: Ëe asa hendep denaban gwe gwer. Tingare sosonna Abon– dekam de zisi gubirida gwen hap denaye, ‘Angkam mes zaunun– em dikim tin hip dena.’ Hen kuncina Abon onak lwaꞌara– dekam de juwen zi mo langsa gulhlu irin hip denaye.
¹⁹ “In desa ki kara guꞌura, emki bukunak ale gun. Sap in angkam dep dena, hen ngein sin dep dena.
²⁰ Tujukam de keisni hen tujukam de lampuna insa hlauludala, zen gulk sun de ol blaoran makan. Tujukam de lampu emasna in, zen Asia mo langnak de jemat-jemat. Tujukam de keisni insa ano dam tahanak hlauludala, dam gulsunnu, Alap mo dam taha nakore zi– tujukam de Asia mo langnak de jematsa de kara ta gwibin hip dena.”