¹ Yesus kim kwatap tek nakon ati gwe zaka, zini beya tangan nik zep ang neblazak.
² Zao zep hen sop sang-sang karek nabare zini Yesus onak dep hata zaka, boklesa zep Yesus mo nwenak kom so zaka. Dekon zep abe ta seka, “Bian, Eme dwam gweꞌanam, Em emaka asa dawem taꞌara.”
³ Yesus ki zep towanblan naban ding gulbluka, “Ëe ama dwam gweꞌan. Em dawem gwen.” Dekam zep hendep sop sang-sangna in kon dawem gweka.
⁴ Zao zep etan gubluka, “Insa emsa dawem tanan, bahem mae ahasa tonbiridan. Diki nonol Alap mo golak de syal tan zi hip ahana kip enaka zertrebla. Zao gublu, ‘Emki asa hla tan. Ëe san ha mese dawem gwer?’ Musa Bak mo titi tabin olak men kirekam sop sang-sang karek zi de dawem gwennak dep dena lwakke, zen kirekam em syal gwibin. Zen dekam sa tingan emsa anakan tame dal, ‘Zen eiwa mes tangan dawem gweka.’”
⁵ Yesus kim Kapernaumk hata onka, ki zep ze Roma mo jana zi mo mamna Zebon onak dep hata zaka, zao zep Yesussu mas gweblan hap abe ta gweꞌanka.
⁶ Man ze gubluka, “Bian, abon de babu gwe-gwen zini golak sang-sang sabak nik gweꞌara. Zen ni ensa ta gweꞌara. Luwen maena banakan dep.”
⁷ Yesus ki zep ding gulbluka, “Ëe asa desan dawem tan hap song gwer.”
⁸ Hwena jana zi mo mamna in ki zep ding gulbluka, “Bahem, Bian. Ëe dawem naka hom, zep ee ama saher gweꞌan– em de ano golak hatan hapye. Hwena anakan-en Em gun, ‘Zi sang-sangna in zen dawem gwen,’ dekam sa dawem gwera.
⁹ Sap ee mese Emsa taibliblak, ‘Eno ol-gunnu bejen kirekam lwa srem gwen.’ Sap abon onakon de teipsin zini ki. Ano otdenak dena hen ki. Ëye ere mo otdenak denaka gubluꞌanam, ‘Em song gwen,’ zen dekam maka song gweꞌara. Hen ahanakae gubluꞌanam, ‘Haen,’ zen hen dekam maka song gweꞌan zala. Ëye ere hon de babu gwen zisi gubluꞌanam, ‘A desa syal gwibir,’ zen dekam maka hendep syal gwibiꞌira. Ëe sap teipsin tola, zep ano ol san kirekam ang ta gwenan. Hwena Em in teipsin tanganna, zep eno ol san sa ki kirekam lwal.”
¹⁰ Yesus man tangan tenggwanblaka– zebon onakore olsa de kirekam sane gwenkam. Dekam zep zi trana in zen ang neblan daꞌak desa lero gwibiridaka hen gubiridaka, “Eiwa, zini in man Asa taibliblaꞌara. Ëe home mae Israelk kirekam de serkam Asa taibliblan zini zertowek.
¹¹ In zebe emsa gubiridaꞌan: Yakla hata sezan nakon hen nikin anen nakon, Yahudi srem zini beya tangan nik sa tagal gwer– Alap mo irik gin kon gwisibir hanan tembane yawalak de apdekam eisrip-sri gwen hapye, Abraham, Isak, hen Yakob mae han.
¹² Hwena Yahudi zini, zen diki zen tangan– Alap mo irik ginnik de sap biti gwen hap de wenyaye. Desa hwena beyakam sa kawesin sin dep yal nulin– men dekon zi mo angna yusyustin niban gona ta gwenanke, hen sang-sang hap ekna ngalk-ngalk da gwibirinke.”
¹³ Hwena Yesus ki zep etan jana zi mo mamna insa gubluka, “Angkam sap esa song gwera. In kirekam ena Asa taibliblala, in zep sa ki kirekam lwal.” Zere hon de babu gwe-gwen zini in hendep dekam zep ki dawem gweka.
¹⁴ Yesus ki zep Petrus mo gol san song gweka. Zewe zep Petrus mo we marena hlauꞌun zaka. Ewen naban nisi taꞌak.
¹⁵ Zao zep wenya insa tahanak towanbir ineka. Ewenna in kon dekam zep hendep ser gwek. Dekam zep hendep luwek, hen dekam zep tembanekam mas gweblak.
¹⁶ Yaklana kim dum gwe heka, dekam zep zini dowal de tilbiridan zi sang-sang beyam-bya naban Yesus onak dep noleyaing gwezak. Yesus ol-gun enkam zep dowal-dowala insa golealsa sone gweꞌanka, hen tingare zi sang-sang beyana insa dawem ta gwibiꞌinka.
¹⁷ In kim kirekam syal gwibirki, dekam zep zauk– zere hap dena mensa Alap mo ol ayang gul gwen zini Yesaya Bak orep ayang gulzimkiye, “Zen sa neno mae mo karek-karekna hen sang-sangna mensa nihin makan wei kulsuk gwenan tonzim iri.”
¹⁸ Yesus kim zi beyam-byana insa anakan hlauludaka, “Zen mes Asa dot dasinin,” dekam zep zere hon de ang ta gwen wenyaka gubiridaka, “Nen ho gutuna an mo men eihya san tablan gwe kinin.”
¹⁹ Hwena ki zep ze Musa mo olsa de tawa ta gwibin zini Yesus hon dep hata zaka. Zao zep gublu zaka, “Bian Guru, men desane ki te gweꞌanka, ee asa Emsa ang gweblanda gwer.”
²⁰ Ki zep hwena ding gulbluka, “Gwenya witir zem ki. Hen mawana zol zem ki. Hwena ngatan zi mo lang nakore Zi Tanganna ano ni ta gwen gola hom.”
²¹ Zi beyana in zen dekam ang neblanda gweꞌak, etan ahanik zep hwena gubluka, “Bian, ee asa lamkam Emsa ang gweblanda gwer, hwena nonol e san anik lwahak. Ëre mo bian de tin hyanak asa Ebon dep hatazal.”
²² Hwena Yesus ki zep ding gulbluka, “Em angkam emki hendep Asa ang gweblan. Eno bian de tinkim, dikire tok bose zik lo dasik.”
²³ Dekam zep hendep Yesus zere hon de ang ta gwen wenya ban bulkum men eihya san dep golesek gweka.
²⁴ Mumuk ennak zep hwena ho gutuna in mam enkam ngep-ngep gweka, hendep bulu in dekam sek gweꞌak sop gun hup zep alp gwesiꞌik. Hwena Yesus Zena dekam nama nisi mumukkum taꞌanka.
²⁵ Hwena dekam zep anakare ola ban li dak, “Bian, nenaka Em ngaya tabin! Nen an em-am angkam juweꞌan!”
²⁶ Ki zep ding gulzimki, “Em ba habe eairiꞌan? Em an eiwa home Asa laibliblaꞌan.” Ki zep hendep luweka, dekam zep asese naban ho ngep naban jalse gwizimki. Dekam zep tangan hendep se nehek.
²⁷ Zere hon de ang ta gwen wenya in dekam zep tenggwaran naban eguk, “Eiwa, zini an wehasa hom! Ba hap tangan asese naban ho ngep naban betek neblanan!”
²⁸ Ho gutu men eihyanak kim goleyaing gwe naka, Gadara mo langnak, zao zep dowal beyam-bya mo bi gwizimdin zi darena Yesus onak dep apta zaka. Zi darena in zi tok lo tasik gwibin kaso-hul kaso-hulak enda gweka. Zen serkam de jal-jal darena, zep zini desan egwahal srem gwe-gwek.
²⁹ Zen dowal beyam-byana in mo herhen ola ban wet oso zaka, “Alap mo Tane, Em aban mae toton banakan de syal tan hap? Em san ere mo yakla yawalak de zaun sremnak de asa karek tabin hibe hataꞌara?”
³⁰ Zeno mae mo nwe kara gwen san zaho beyam-byana tembane hap kwatap tini san ehakaꞌak.
³¹ Dowal-dowala in ki zep Yesussu aberbe da gweꞌak, “Em de zi darena an kon wet so gwen hap asa gubiridankam, Em wehe asa zaho trana wakuwe de biti gwen hap gubiridaꞌanka?”
³² Yesus ki zep gubiridaka, “Em sek gwen.” Dowal-dowala in dekam zep hendep zi darena in kon wet so gwek, dekam zep hwena zaho trana iwe biti gwek. Zahona in dekam zep hendep heya-hya gwenkam li san syalk ta tinek, hendep ho gutunak zep ekei-king gwek.
³³ Zahona in zen kara da gwibik, dekam zep e san dep heya-hya gwek, hen eaisil gwenak– tingan in zen ki ze owasna lwakke, zahonak hen dowal mo tilzimdin zi darenak.
³⁴ Dekam zep ena iwe de zini kitak sek gwek– Yesussu de zertowen hap. Kim ze hla dak, zao zep blikip gwesiblin naban abe dak– Zen de nabakam zeno mae mo langna in kon song gwen hap.