¹ Yesus dekam zep etan tawa tabinni ayang gulzimki, “Wal bose wal omka bahem gubirida gwen, ‘Zen karek tan hap man dakastiꞌira.’ Ki hwena Alap sa hen emsa gublula, ‘Zena hen karek tan hap man dakastiꞌira.’
² Sap em men kire enkame wal bose omka karek tan hap gubluꞌanka, ki hwena Alap hen kire enkam de emsa karek tan hap maka gubluꞌara. Sap eme aha zisi gubluꞌanam, ‘Zen kirekam ngip gulku,’ Alap dekam sa hen emsa karatda tala– eno gwensa de anakan hlaulblun hap, ‘San ha zena hen kirekam ngip gul gwenda?’
³ Hen em ba habe wal bose uk mo ngip gun betek tolsa hla kul gwizimnin? Hwena ere mo ngip gun yawala em desa de oto gulsun hup ema baes ta gwenan.
⁴ Kirekam insa egwe gwenan, zen men kiye: Zi de wal bose zemka gublunna, ‘Anik eno nwenak de te klana insa gulsuk,’ hwena zere mo nwenak hen balok tek yawala ki lwaꞌan. Desa maka nonol gulsuꞌura– dekam de dawemkam wal bose zik moka hlaun hupye.
⁵ Em in Alapsa ek enkame ang e gweblanan. Diki nonol enaka emaka oto lasik gwibiꞌin. Ki esa dawemkam kara gwera– dekam de wal bose omka halen ora san zerwet son hapye.”
⁶ “Alap onakore ol dawemna bahem lwa makare enlala zi hip waba hap tonbirida gwen. Zen sa hwena jala ban ja-ja nul gwer hen emsa sa naptabirida gwer. Hen Alap onakore ol dawemna bahem gwe makare enlala zi hip gol gwizimdin. Ki hwena zen sa zalta dep tanakam nyaubir.”
⁷ “Men kiresa ena dwam gwibinni, Alapsa em abe ta tine gwen. Ki Zen sa hendep kiresa ep gol gwizimdi. Em teibir tine gwen, dekam esa hendep Zebon onakon hla kul gwer. Hen orasa em tebla tine gwen. Zen dekam sa ep zertreblala.
⁸ Sap zini men zen abe ta gwenna, zen gul irinkim. Men zen tei gwibinni, zen hlaunkum. Hen men zen orana te gweblanna, zebe hap zertreblankam.
⁹ Ebon mae onakon san ha ki bi zem walas zikhip kasona golblaka? – zen de roti hap abe tankamye.
¹⁰ Ahaksa wanyana san ha ki golblaka? – zen de hogwe hap abe tankamye.
¹¹ Em sap jal-jala, hwena eno anakare kwasang enlalana hen ki, ‘Ëe anik dawem naka ere mo walas hap golblak.’ Neno mae mo Bian, ngatan zi mo langnak de Zini, Zen hwena dawem tangankam nesa kwasang gwibirida gwenda. Zep Zen hen Desa de abe ta gwenkam dawem kire-kiresa nep gol gwizimnira.”
¹² “Men kirekam ena dwam gweꞌara, zi de kirekam emsa gwe gweblan hap, em hen ahasa kirekam em gweibirida gwen. Sap kirekam de enaka golelowehe gwen hap dena, zen zen ausuna– Musa mo titi tabin olak hen Alap mo ol ayang gul gwen zi mo olakye.”
¹³ “Hendep de engaya gwen hap de edwam gwenna, lilikin klakat san em biti gwen. Sap lilikin yakna hen ora dak-dakna, zen syauk bla san dep dena. Zen in zep zini desan beyakam egwahal gwenan.
¹⁴ Hwena eiwa klakat tanganna– hendep de engaya gwen hap de lilikinni hen oranaye. Zep zini beyakam hom orana insa dam dasik gwenan.”
¹⁵ “Bira! Botonkam de tawa ta gwibin zini sa ebon mae yaing gwe-gwezal. Ol toran nakon esa kil li gwibir, ‘An hen neban mae apdenak– Alap mo hanan tabin walas.’ Hwena zen in gwe tihi jal-jal makarena. Zen sa emsa hit di gwibir.
¹⁶ Em zere mae mo lowehen nakon hen syala kon esa ki dam lasik gwibir. Kwiwe dansa bejen lemo timnik taran. Hen dokot te ngi-ngina bejen rambutan dankam ten.
¹⁷ Men kiye hen tenya: Zen zere mo dan enkam ete gwenan. Tenya men zen twin gwibin srem tetan dankam ete gwenan, zen bejen twin gwibin tetan dankam ten. Hen tenya men zen twin gwibin tetan dankam ete gwenan, zen bejen twinbin srem tetan dankam ten.
¹⁸ (7:17)
¹⁹ Tingare tenya men zen twinbin tetan dankam ete srem gwe-gwenan, zen lu tan en hap dena– desa de syauk blanak tru tasen hap.
²⁰ Zen kirekam hen– botonkam de tawa ta gwibin zini inye. Em zere mae mo syala kon hen lowehen nakon esa ki tame la gwibir.”
²¹ “Tingan men zen Asa anakan daken gweblanan, ‘Bian, Bian,’ hwena zen molya kitak Alap mo irik ginnik biti gwek. Diki men zen zere mo dwam gwibin sin syal ta gwenan, zen zen en sa zere mo irik ginnik biti gwer.
²² Aumwa hap de zisi klis gunnuk, zini beya tangan nik sa Asa daken gweblal, ‘Bian, Bian, ee ere mo bosekame hamal hap de ola ayang ul gwizimk. Hen ee eno bosekame dowal-dowala olealsa sone gwibik. Hen owas-owasna eno bosekame syal ei gwibik.’
²³ Hwena Ëe asa ding gulzim, ‘Em Abon dep denaka hom. An kon em hendep sek gwen, sap em an zene karekna ol gwek.’”
²⁴ “Zen in zep, zini men zen ano ola esane gwe-gwenan hen desan ang ta gwenan, zen men kiye– enlala blala bare zini men zen gola moko dawem naban taukuke.
²⁵ Kim o dil gwek, ho namwa yawala dekam zep sap desan tilzik, hen asese yala dekam zep sap akabla zaka, sap zeno mokona olk san de hul-hul tanna.
²⁶ Hwena zini men zen ano ola sap esane gwe-gwenan hwena desan de ang tan sremkam, zen men kiye– enlala joblo-top zini men zen moko sremkam gola taukuke.
²⁷ Hwena kim o dil gwek, hen ho namwa yala kim desan tilzik, hen asese yala kim tailki, dekam zep hendep gola in mal heka, hendep karek tangankam dreweka.”
²⁸ Yesus kim kirekam tawa tasibirki, zi beyam-byana in zen ze sane daꞌak man tangan denggwanblak.
²⁹ Sap zeno tawa tabinni soson tanganna– san de teipsin zi mo tawa tabinni kiye. Musa mo olsa de tawa ta gwibin hip de zi mo tawa tabin niban apdenak hom.