¹ Kak tangannak zep tingare Alap mo golak de syal tan zi mo mam-mamna hen Yahudi mo nol-nola ban etan tagal gwesik, hen dekam zep ola Yesussu de tan hap dena zim-zim nik.
² Dekam zep tahalen naka Roma mo bosekam de gubernor gwen zini Pilatus Bak osan dep nerhak.
³ Yudas in zen zerguku, kim anakan sane gweka, “Hare ano zergun nukon sa dal,” dekam zep tangan enlalana dowebla hanaka. Dekam zep 30kam de te-ala kasona men dekam zerguzimki, desa Alap mo golak de mam-mam wenya kip hen Yahudi mo nol-nola kip etan zerzim halka.
⁴ Zao zep gubiridaka, “Ëe mese karek gwek– karek gon srem zini insa zergukye. Zep hendep daꞌan.” Hwena zen man ding nulblik, “Asa ba habe desa etan gubiridala? Zen ere en mo syal sake.”
⁵ Yudas dekam zep te-alana insa Alap mo gol mwa san dep hiri ta inki. Zena ki zep song gweka, dekam zep zenaka tenya kon holenak buk tusuk soneka.
⁶ Alap mo golak de syal tan zi mo mam-mamna in ki zep te-alana insa tagal dasik, ki zep eguk, “Te-alana an, zisi de tan hap zergun te-ala, zep bejen Alap hap ing tablan. Sap Musa mo titi tabin olak man anakan lwak, ‘Kire te-alasa bejen Alap hap zerblan.’”
⁷ Zen kim te-alana in hap ola aha-en nuk, dekam zep te-alana inkam kama ngatdarak syal gwe-gwibin zi mo ngana nek– aha lang nakon de yaing gwe-gwezan zi tok-toksa de ze kang gulne gwen hap.
⁸ In zep hendep angkam kamana insa nen gwibirin, “Zi Kal Kama.”
⁹ Zen dekam zep zauk– mensa orep Yermia Bak hamal hap Alap mo ola anakan ayang gulkuye, “Zen sa 30kam de te-ala kasosa nulin– Israel zi zere mae mo ol aha-en gun sun de zergun te-alana in saye.
¹⁰ Dekam sa hwena kama ngatdarak syal gwe-gwibin zi mo ngasa ner– men kirekam Alap hamal hap asa gublukake.”
¹¹ Roma mo bosekam de gubernor gwen zini Pilatus Bak onak kim nerhatazak, zao zep takensiblika, “Em an san ha eiwa zen– Yahudi mo teipsin niye?” Ki zep ding gulbluka, “In kirekame gunda, zen kirekamke.”
¹² Hwena Alap mo golak de syal tan zi mo mam-mamna hen Yahudi mo nol-nola in dekam zep Yesus mo karekna Pilatus hup kira nul gweblaꞌak, hwena Yesus hom mae ding gul gwizimꞌinka.
¹³ Dekam zep Pilatus takensiblika, “Em san ini hom? – zebe ding gul gwizim srem gweꞌaraye. Zeno mae mo eno kareksa de kira gul gweblanna mes-am beya gwenan.”
¹⁴ Hwena Yesus man tangan ding gulzimdin hip baes gweka. Hendep Pilatus man tangan tenggwanblaka.
¹⁵ Yakla yala Paska jamkam kim Israelk de zini etagal gwe-gwek, dekam man zeno mae mo gubernora bwinak de zini aha-en aha-enkam neser sone gwizimk– tingare zi tra mo anakan de gun sun, “Desa ap zeser sonezim.”
¹⁶ Dekam zewe bwinak zini ki, bose teipsiblinna, Roma mo irik gin nikon dikim wet so gwen hap de asas gwe-gwen zi, bosena Barabas Bak. Zeno aha bosena hen ki Yesus mo bose naban apdenak.
¹⁷ Zep zi beyam-byana in kim Pilatus mo gol homannak tagal gwesizik, dekam zep Pilatus takensibiridaka, “Em narasae namen dwam eblaꞌan? – desa de ee ebe mae hap tapbla tazimdin hipye. San ha Barabas Baksa? San ha Yesussu? – mensa hen nen gweblananke, Israelsa de ngaya tabin hip de Zini.”
¹⁸ Zen mae hap ki kirekam takensibiridaka: Sap zen mes anakan tame gulku, “Zi beyam-byana man Yesussu menkam ang ne gweblak, zep Yahudi mo mam-mamna husus ne gweblak, hendep zep angkam tan hap asas neblaꞌan.”
¹⁹ Pilatus dekam teipsin zi hip de komal tum yalak nikinꞌinka– zisi dekon klis gul gwen hap de komal tumnak. Zi beyana insa kim kirekam takensibiridaka, hwena dekam zep we zik mo ola nolhatablazak. We zem man anakan gu soneblak, “Em bahem mas gwen– karek gon srem zini insa de karek tannakye, sap ee eisiri namen husus gwibin tangan nakae tal– zebe hap denaye.”
²⁰ Hwena Pilatus kim we zik mo ola insa sane gweꞌanka, hwena dekam Alap mo golak de mam-mam wenya hen Yahudi mo nol-nola in zi beyam-byana insa noleton gweꞌak– zen de anakan abe ta gwen hap, “Barabassa ap hil ti sonezim. Yesussu lak.”
²¹ Zep kim Pilatus etan takensibiridaka, “Zi darena an kon, em narasae dwam eblaꞌan? – desa de ebe mae hap zeser sonezimdin hipye.” Dekam zep ding nulblik, “Barabassa.”
²² Hwena dekam zep etan takensibiridaka, “Ki hwena ee banakan asa Yesussu gweblal? – insa ahakon ena en gweblananye, ‘Israelsa de ngaya tabin hip de Zi’kim.” Ki zep ding nulblik, “Desa te-lidak sonnak makan laink.”
²³ Dekam zep hwena takensibiridaka, “Hwena zen banakan karek gweka?” Hwena dekam tangan zep mam en tangankam egu ane gweꞌak, “Desa te-lidak sonnak makan laink!”
²⁴ Pilatus dekam zep enlalana anakan topse gwibiridaꞌanka, “Ëe an etan banakan asa zi trana ansa gweibiridal?” Hen anakan tame tabirki, “Zen eilman gwen hap ealp gwesiꞌin.” Dekam zep zere hon de ebabu gwe-gwen zisi gubiridaka– hosa de golbla halzan hap. Zao zep zi beyam-byana in mo nwenak tahana ngan sosuꞌunka. Dekon zep gubiridaka, “Ëe home zini ansa de tan hap de ola mas guꞌun. Alap molya zeno kala abe hap ngero gulbluka. Sap an e-ene laꞌan.”
²⁵ Dekam zep tingare zi beyam-byana in ding nulblik, “Zeno kala zen sap sa abon mae onak ngero gwer– hen ano mae mo auyan-aza onakye.”
²⁶ Dekam zep Pilatus Barabassa zeser sonezimki. Hwena Yesussu zep jana nabare zi hip tapbla tazimki– zen de hwena tangolen naka te-lidak sonnak makan ta irin hip.
²⁷ Dekam zep Pilatus mo jana nabare zini Yesussu nertilzik– zere mae mo batalyonnak de gol yalak. Zen zere mae mo ahakorena kitak de tagal gulsun hup nenbiridak, hendep Yesussu man dot dasizik.
²⁸ Ki zep hendep irkare dak, hwena teipsin zi hip de baju kwang kal-kalsa zep ala nosoblak– teipsin zi makan zau de swre tan hap.
²⁹ Hen nolak de ala gulblun hap, dokot te ngi-ngisa mlin-mlin nuk– teipsin zi hip de emaskam weir gulsublun makan. Ki zep hen dutena dam tahanak nolblak. Zena dekam zep botonkam zeno nwenak boklena kom da gweblaꞌanzak– anakan dikim ze lamang tan hap, “Dawem, bian. Em in zen– Yahudi mo teipsin niye.”
³⁰ Zao zep oltepkam hol-hol da gweꞌak, hen dutena insa zeno tahanak etan nulink, dekam zep nolak lek dya gweꞌak.
³¹ Lamang tanna kim hya neisiblik, dekam zep etan baju kal-kala insa nalsiblik, dekam zep etan zere mo bajuna ala nosoblak. Ki zep hwena nerwet sok– dekam de te-lidak sonnak makan ta irin hip.
³² In kim Yesussu te-lidak sonnak de makan ta irin hip nersong gweꞌak, oranak Kirene walya Simonsa zep nertoweꞌak. Zao zep Yesus hup de te-lidak soblanna insa de we soblahan hap tik-tik dak.
³³ Ki zep hendep kwatap tek bosena Golgotak yaing gwesek. Bosena in mo enlalana, “zi nol swra.”
³⁴ Zewe zep Yesus hup anggur ho enenna nolblak– desa de otden hap. Hwena kim sap akasibirki, dekam zep baes gwibirki.
³⁵ Te-lidak sonnak kim makan daink, dekam zep zeno pakeanna zere mae hap dobe abu mo kim de zenaka dam tasik gwibinkim kae neblandak.
³⁶ Zena zao zep teinikinꞌik– dekon de kara tan hap.
³⁷ Nol bol tahan nakon ol alesa ze makan nulink– dekam de tingare zi anakan tame gun hup, “Zen kire jal hap daꞌan.” Zep anakan ale nuk, “An Yesus– Yahudi mo teipsinni.”
³⁸ Zen sowe zi dare naban Yesus mae han apdekam te-lidak sonnak makan dabirink– ahana Yesus mo dam taha san dekam, ahana irgwa taha san dekam.
³⁹ Zini men zen desan taman gwe-gweꞌanzak, zen nol ewak gun nuban ol mamkam anakan lamang da kini nasen gweꞌak,
⁴⁰ “Em an zen eme guku, ‘Alap mo gola asa dri yulsul, hwena dan-ahare yaklakam asa etan syal gwibin kim sul soner.’ Ki em san Alap mo Tanesa hom?! Te-lidak sonna in kon em enaka de ngaya tan hap ati gwezan.”
⁴¹ Hen Alap mo golak de syal ta gwen zi mo mam-mam wenya hen Musa mo olsa de tawa ta gwibin hip de wenya hen Yahudi mo nol-nolkam de wenya, zen hen man Yesussu anakan lamang da gweꞌak,
⁴² “Zen aha zi ensa man ngaya ta gwibirki, hwena zenaka hom tol ngaya taꞌara! Zen de eiwa Israel mo teipsinkim gweꞌanam, dikire te-lidak sonna in kon ati gwezak. Ki amaka laibliblaꞌan.
⁴³ Zen Alapsa taibliblaka hen man zenaka gu gweblaka, ‘Ëe an Alap mo Tane.’ Ki Alap de eiwa dwam gweblankam, dikire ngaya tak.”
⁴⁴ Sowe zi darena insa Yesus mae han makan dabirink, zen hen kirekam lamang laka.
⁴⁵ Yaklana kim bolak zauku, dekam zep tingare langna owas hap kawesik. Hendep yakla nwena kim dan-ahannak zauku, dekam zep etan hleng gwek.
⁴⁶ Yesus dekam zep Ibrani olkam ol mamkam herheka, “Eli, Eli, lama sabakhtani?” Nere mae mo olkam Zen anakan herheka, “Are ano Alap, ano Alap, Em ba habe Asa da tasiꞌira?”
⁴⁷ Hwena in zen ze kara daꞌak, ahakon hom dawemkam nasalblak, zep zenaka nenbiridak, “In Elia Baksa herheblanda.”
⁴⁸ Dekam zep ahanik nabalba enkam hluweka, yera jaubum makare naka zep gol hanaka, desa zep anggur ho enennak os gul ineka. Desa zep te tek gwennak de kyaon sonen naka mipnak goltre seblaka– desa de kwlem gun hup.
⁴⁹ Hwena ahakon man nenblak, “Dikire gwek. Elia Bak wehe yap ngaya taꞌan zaka?”
⁵⁰ Yesus ki zep etan ol mamkam herhe hanaka. Dekam zep hendep tilsiki.
⁵¹ Alap mo gol mwanak de kaen lilikin glaing-gling yawala dekam zep owas hap kalk neisik sonek. Jingil yawala hen dekam zep gweka. Hen zewe de kaso nabare kwatap-tek kwatap-tekna ahakon hendep man ehlang-hlang gwek.
⁵² Zi tok-tok kang gulne gwen kaso lilikinni man etalusundak, hen Alap mo hlil irin wenya men zen orep juwe gwek man beyakam engaya gwendak.
⁵³ Yesus kim tin nikon ngaya gweka, dekam zep zen hen zi lo tasibin kamana in kon sek gwek, hendep dekam zep Yerusalemk biti gwezak. Zewe zini beya nik noletowe gweꞌak.
⁵⁴ Jana nabare zi mo mamna in zen apdenak zere mo ahakore naban zikara taꞌanka, dekam tangan zep serkam goleairiꞌanka– jingil yala in kim gweka, hen tingare owas-owasna insa kim hla nukke. Dekam zep eguk, “Zini an eiwa Alap mo Tane!”
⁵⁵ We walya hen beya nik langa nakon kara daꞌak. Zen men zen hendep Galilea kon mas gwe-gweblan hap ang nebla song gwe zakke.
⁵⁶ Ahana Yakobus ne Yusup nik mo anena Maria– men zen hen zeno nik mo ayana Yesussu we takke, ahana bose apde zem Magdala kore wenya Maria, hen ahana Zebedeus Bak mo we.
⁵⁷ Kim kam-en gweꞌak, dekam zep te-ala beya zini Arimatea walya Yusup hata zaka. Zen hen Yesussu de ang gwe-gweblanna.
⁵⁸ Zen dekam zep Pilatus Bak osan dep song gweka– Yesus mo tok naka dikim lo tasin hip de abe tan hap. Pilatus dekam zep jana nabare zisi gubiridaka– Yesus mo tok naka de Yusup hup zergublun hap.
⁵⁹ Yusup dekam zep hendep Yesus mo tokna insa zizeryahe halka. Kaen ese ngap-ngapkam zep zitahaleka.
⁶⁰ Dekam zep Yusup zere hap de hamal gulblun kaso hulak Yesus mo tokna insa zidre neka. Lilikinni kaso yawalkam zep nulhlusukink. Zena ki zep sek gwek.
⁶¹ In kim Yusup golesyal taꞌanka, Magdala kore wenya Maria apde bose zem Maria han dekam zao hen inikinꞌik. Dangna kim kaso hula in san ek.
⁶² Zao de yaklana dekam Hari Sabat yawal– Paska hap de yakla tangannak. Dekam zep Alap mo golak de syal ta gwen zi mo mam-mamna hen Farisikam de zi niban apdekam Pilatus osan dep sek gwek.
⁶³ Zao zep nenblak, “Bian, ee ama eenlala gwer, zisi de yasik ta gwibin zini Yesus in kim nama gweꞌanka, zen man anakan gu gweka, ‘Yaklana kim de dan-ahannak zauꞌuk, dekam asa etan tin nikon ngaya gwer.’
⁶⁴ Zen in zebe emsa abe laꞌan: Emki ere mo jana nabare zisi gubiridan– zen deka dawem enkam kara nuk, in zao ir lo dasikke. Zere hon de ang ta gwen wenyik mana zeno tok naka sowekam ner halank. Hwena zen dekam sa zisi ahap da gwibir, ‘Zen mes etan ngaya gweka.’ Hwena kirekam de eboton gwenkam, zen dekam tangan sa botonna mam nulsuk song gwer.”
⁶⁵ Pilatus ki zep ding gulzimki, “Jana nabare zini ansa ama ebe mae hap lup gulzimꞌin. Emki desan dep zon guludan– dawem en tangankam deka kara nuk.”
⁶⁶ Desan kim sek gwek, dawemkam zep Yesussu de drenen kaso lilikinni insa sip dabik. Jana zini in zewe zep kara nul gweꞌak– zi de zewe mae egolek de gwezan srem hap.