¹ Yesus ki zep zi beyam-byana in han zere hon de ang ta gwen wenya aban mae gubiridaka,
² “Musa mo olsa de tawa ta gwibin hip de zi niban Farisikam de gubirida gwen zi niban, zen sap Musa mo weinak zeno ol san de lowehen hap emsa titi da gwibirin.
³ Zen in zep zeno mae mo ola in san emki ang ta gwen. Hwena zeno mae mo lowehen san bahem ang ta gwen. Sap zen in dekam tawa da gwibirin, deban hom apde ne gwenan.
⁴ Zep zeno mae mo emsa de titi ta gwibinni man nwe-mase gwe-gwenan– san de zi de aha zi hon nihin dohon-honsa mam enkam wewek ta sone gwizimdinni kiye. Sap zen in dekam tawa da gwibirin, zen hwena Musa mo titi tabin olak etan zen aha titi tabinsi mas-mas nul gwenan, zep tangan hendep dohon-hon gwe-gwenan. Hwena zena hom desan ang ta gwenan.
⁵ “Zeno mae mo Alap hap de syala, zen hwena kitak zi dikim hlauludan en hap syal ta gwenan. Zen in zep hen Alap mo ola bare kertas dak-dakna zere mae mo mirenak hen tahanak bubuk dasik gwenan, hen bajuna zep blal-blalkam sihilhi da gwibirin– desa de alala ta gwen hapye.
⁶ Zen zep tembane yawal-yawalak hen but srem gol-golak ngeinnik de komal tum dawemnak de teinikirin hip edwam gwe-gwenan.
⁷ Zen hen zi de tagal gwen maenak anakan de gubiridan hap edwam gwe-gwenan, ‘Dawem, bian guru.’
⁸ “Hwena emsa bap zen gubirida gwen ‘bian guru’kam. Sap eno mae mo Guru tanganna, Zen sap diki aha-en. Hen em diki aya-wal oso-wal makane lowehe gwenan.
⁹ Bahem auhu-kamanak awe zini ‘bian’kam gubirida gwen. Sap eno mae mo Bianna aha-en– in Zen ngatan zi mo langnak gwe gwendaye.
¹⁰ Hen bap zen emsa ‘teipsin zi’kim gubirida gwen. Sap eno mae mo Teipsinni Zen aha-en. Israelsa de ngaya tabin hip de Zini Ëe an Zen.
¹¹ Hen zini men zen ebon mae onakon mam gwenna, zen diki zen gwe gwen– san de eno mae mo tana iltikinnik de babu gwe-gwen zi.
¹² Sap tingare zini men zen mam gwen hap edwam gwe-gwenan, Alap sa hwena otde tangannak kang gulu. Hwena men zen otde tangannak lowehe gwenan, desa hwena gut de tangannak sa kang gul sera.
¹³ “Kwasang tol, Musa mo olsa de tawa ta gwibin hip de wenya hen Farisikam de gubirida gwen wenya, em engalap gwen! Em karekna mam naka esa hla kul. Em in ek enkame Bian Alapsa ang e gweblanan. Men zen sap Alap mo nwenak dikim esam gwesin hip ealp gwe-gwenan, hwena eme zebe mae hap orana layalsik gwizimnin– ere mae mo aha titi tabin olsa de mas-mas gul gwizimdinkim. Ena mese sap orana dam lasik, hwena desan home ang ta gwenan. Hen men zen sap ang tan hap ehohle gwe-gweꞌan, eme hwena zebe mae hap layalsik gwizimnin.
¹⁴ (23:13)
¹⁵ Kwasang tol, Musa mo olsa de tawa ta gwibin hip de wenya hen Farisikam de wenya, em engalap gwen! Em in ek enkame Alapsa ang e gweblanan. Em ema anakan egwe gwenan: Ere mae mo hliknak dep de zisi kwang guludan hap em ema men-san an-sankam ehakalada gwenan– sap hi san, hen eik sin. Sap ebon mae osan de ang tan hap man sap baes ta gwenan. Hwena zao de langanak aha-en aha-enkam hlauluda gwenkam, desa zebe hwena dowal mo kigi mo walas hap li la sone gwibirin. Zen zep hendep zeno mae mo jal-jala ere mae onakon serkam tangan taman kini gwenan.
¹⁶ “Kwasang tol, em in zene Musa mo ola tawa la gwibirinke, em engalap gwen! Em karekna mam naka esa hla kul. Em in nwe diminni, hwena ema tim ul gwenan, ‘Ëe asa aha zisi dawem san dep olesek gwe-gwer.’ Em in zebe zisi anakan titi la gwibirin, ‘Nen sap esa nere mae mo ol gu-gunsu anakan soson ul gwer, “Ngli, mese ki asa salblanda.”’ Hwena Ëe ama emsa gubiridaꞌan: Bahem nglisa, ahaksa ngatan zi mo langsa de gublun naban ere mae mo ola soson gul gwen. Sap Alap Zen dekon nesa kitak irik giꞌira. Hen kirekam de gunkum, zen apdenak– anakan de gun nubanye, ‘Alap, mese ki asa salblanda.’ Zep em de Alap mo bosesa de gollewen hap ngli maesa kirekam gublunna, Alap dekon sa lamkam emsa anakare hap karek tala, ‘Em dekam ba habe Asa blikip gwesibli srem gweka.’ 21 Hen anakan bahem egu gwen, ‘Alap mo gol, mese ki asa salblanda,’ sap zen apdenak– anakan de gun nubanye, ‘Alap, mese ki asa salblanda.’ Sap zere mo gola, Zen zao Zena gwe gwenda. 16b Em zebe hen karekkam tawa la gwibirin, ‘Nere mae mo olsa de soson gul gwen hap, bap nen anakan egu gwen, “Alap mo golak de emas, mese ki asa salblanda,” hwena sap esa Alap mo gol ensa kirekam en gwibir.’ 17 Em in enlala joblo-topna hen nwe diminni! Em emaka dam ulsuk: Alap zere mo nwenak bol-zaun tangan wenya diki zere mo gol. Sap zini kim emassa Alap mo golak nonne gwenan, dekam man nwe-mase gwe-gwenan, ‘An Alap zere en hap dena.’ 18 Anakan hen ema tawa la gwibirin, ‘Bap nen anakan egu gwen, “Alap hap de tweran nin ang gulsublun, mese ki asa salblanda,” hwena sap esa Bian mo golak de kals ensa kirekam en gwibir.’ 19 Em in eiwa nwe dimin tanganna! Em emaka dam ulsuk: Bian zere mo nwenak bol-zaun tangan wenya diki zebe hap de kals. Sap tweran ninni insa de kalsnak iwe tru tasin hip kang ta senkam, zen dekam zep nwe-mase gwe-gwenan, ‘An Alap zere en hap dena.’ 20 Zen in zep, zi de anakan zere mo olsa soson gunnu, ‘Alap mo golak de kals, mese ki asa salblanda,’ zen apdenak– anakan de gun nubanye, ‘Alap mo kalsnak de tweran nin, mese ki asa salblanda.’ Hen zen apdenak– anakan de gun nubanye, ‘Alap, mese ki asa salblanda.’ Alap dekon sa lamkam emsa anakare hap karek tala, ‘Em dekam ba habe Asa blikip gwesibli srem gweka.’
¹⁷ (23:16)
¹⁸ (23:16)
¹⁹ (23:16)
²⁰ (23:16)
²¹ (23:16)
²² (23:16)
²³ “Kwasang tol, Musa mo olsa de tawa ta gwibin hip de wenya hen Farisikam de wenya, em engalap gwen! Em karekna mam naka esa hla kul. Em in ek enkame Bian Alapsa ang e gweblanan. Alap mo olak men zen tangan bol-zaun gwek, desa de syal gwibin hip em ema baes ta gwenan. Hwena banakare Alap hap de syal bete-tek enna, desa en ema syal ei gwibirin. Zep em anakane egwe gwenan: Banakare nganak de obwaga betek maesa de gola danna– sap kumli ala maesa, em desa sap ema Bian Alap hap de hlikna ol gweblanan. Hwena Alap mo olak men zen tangan bol-zaun gwek, desa home syal ei gwibirin– anakare saye: Zisi bahem totoresa karek tan. Wal bosyansa em kwasang gwibirida gwen. Hen mensa anakan zi bosyansa gu-gublunna, ‘Ëe asa kirekam syal gwibir,’ desa em hendep sul sonen. Zen diki bol-zaun tangan wenya zen– desa de nonol syal gwe-gwibin hip denaye. Hwena syal bete-tekna insa lun em mas gul gwen.
²⁴ Em an nwe haina, hwena ema tim ul gwenan, ‘Ëe asa aha zisi dawem san dep olesek gwe-gwer.’ Eno mae mo syala in man nwe-mase gwe-gwenan– san de mok honak de ailsikan tok ing gwe henna kiye. Desa em ema eirsik gwenan. Hwena wanya yawal de ze ing gwe henkam, deban hwena ema otde gwibirin.
²⁵ “Kwasang tol, Musa mo olsa de tawa ta gwibin hip de wenya hen Farisikam de wenya, em engalap gwen! Em in ek enkame Alapsa ang e gweblanan. Eno mae mo lowe henna a kirekam mo nwe-mase gweꞌanye: San de zi de piring-moksa e-en nakon ngan tasik gwibinni, hwena olk san bejen. Ere mae mo timni hen kirekam: Em sap ema tahan sopna ngan lasik gwibirin, hwena olk kon eno mae mo enhona mes beya gweka– kire-kire beya gwen hap de enlalakam, hen ere mae en mo timsi de ngalap gwe-gwibin hip de enlalakam. Em ema desa de hen ngan tasin hip baes taꞌan!
²⁶ Farisi zi nwe hai! Em nonol ere mae mo enhosa em olk san ngan tasibin. Dekam esa tangan tim niban enho naban engan gweher.
²⁷ “Kwasang tol, Musa mo olsa de tawa ta gwibin hip de wenya hen Farisikam de wenya, em engalap gwen! Em in ek enkame Bian Alapsa ang e gweblanan. Em in san de zi tok dre nwanun golsa de nwe awes tangankam taunnu kiye. Hwena olk kon zi tok hanan ase nabarena zewe.
²⁸ Zep em in hen kirena. Zi de emsa hlauludankam, em dawem-dawem tanganna. Hwena enhonak kirekam-kirekam karek enlalasae enne gwenan, zen in zebe zi tok ase karek makan eju gweꞌan.
²⁹ “Kwasang tol, Musa mo olsa de tawa ta gwibin hip de wenya hen Farisikam de wenya, em engalap gwen! Em in ek enkame Alapsa ang e gweblanan. Em in zi tamera gwen zi mo wei-wik gun walas! Eno auyan-azana Alap mo olsa de ayang gul gwizimdin hip de zini man damera gwek. Em hwena angkam desa de lo tasik gwibin golsae sam-sam la gwibir-zimꞌin, hen ek enkame anakan egu gweꞌan, ‘Kwasang tol! Ëye dekam hen lowe henanam, ee molye ere mae mo auyan-azana insa mas eibiridananam– zen kim zi dawem-dawemna insa damera gwekye.’ Hwena kirekam de egunkum, ema kim anakan ekira gwe-gweꞌan, ‘Ëe an zen– zi tamera gwen zini in mo walas naye.’
³⁰ (23:29)
³¹ (23:29)
³² Kirekam de lwankam, ki amki ere mae mo auyan-aza mo zi tamera gwen syala insa ayang uk!
³³ Em jal-jal tanganna, zi tamera gwen zi mo wei-wik gun walas! Zep em toton banakan molye Alap mo jal hil gin nikon easendak.
³⁴ “Zep emki esane gwen: Sap em kirekame ere mo olsa de ayang gul gwen zisi lamera gwenan, Ëe in zep asa ebon mae osan dep etan ahakorena lup gul sone gwer. Enlala blal wenya hen ere mo olsa de tawa ta gwibin hip de wenya, desa asa hen ebon mae osan dep lup gul sone gwer. Hwena em esa hen desa lamera gwer, hen ahakorena esa te-lidak sonnak makan labirin gwer, hen ahakorena esa but srem gol-golak langole gwibir, hen ahakorena e-e san esa olegwa halada gwer.
³⁵ Zen in zep sa Alap angkam de zini ebe mae hap karekna serkam golzimdi– kitak de zeno ol ayang gul gwen zisi de tamera gwen hap de karekna, nonol lonesen nakon hendep angkam dena. Nonol lonesen nakon kim Kaen Bak Habelsa karek gon sremnak taka, dekon hendep eno auyan-azana Alap mo ol ayang gul gwen hap de zini damera gwek, hendep aumwa hap kim Berekia Bak mo tanena Zakaria Baksa dak. Zen Alapsa de airiblan sremkam Alap hap de tweran nin ang gulsuk gweblan kals alpnak dak.
³⁶ Eiwa denakae emsa gubiridaꞌan: Kitak de zi tamera gwen karekna insa Alap mes lam gulku– dekam de otan ere mae hap ngero gulzimdin hip!
³⁷ “Yerusalemk de zi, em mese Alap mo ol ayang gul gwen zini beyakam lamera gwek, hen Alap mo lup gul sonen zini kasokame tok hap i libirida gwek. Ëe ama sap emsa kwasang gwibirida gwek, zebe sap emsa Ëre osan dep de tagal gulsun hup akabirida gwek– san de we ayang de tane-ne zemka si alakam obon gun makan de gweibiridan hap. Hwena em ema baes ta gwek.
³⁸ Yerusalemk de zi, zen in zep Alap angkam emsa da tasibiꞌira.
³⁹ Zep angkam em molye etan Asa hla la gwek. Hwena em kime lamkam Asa hut lu ane guꞌuk, zen dekam en esa Asa hla lal. Dekam hwena anakare ola ban esa Asa hut lu ane gul, ‘Heꞌho! An Bian mo bosekam nesa dikim oto gulsun hup hata seꞌara. Diki Alap Zen zebe hap dawemsa golblan!’”