¹ Yesus kim tawa tabinni insa hya gwesibiridaka, dekam zep asa langna Galilea kon Yerusalem mo aha lang tek san dep golegwe halka– weyana Yordan mo men eihya san dep.
² Zini hen beya tangan nik ang neblak, hen zao zep sang-sang nabare wenyaka dawem ta gwibirki.
³ Hwena Farisikam de zini ki zep ze hen Yesussu de akasiblin hap yaing gwezak. Zen man ze dakensiblizak, “Em banakane Musa mo titi tabin ola dam gulsuꞌura? San ha zini sap de we zemka baes gwibinkim? – banakare mae nakonye. San ha bejen?”
⁴ Yesus ki zep ding gulzimki, “Em bawalkam esa Alap mo ola an mo eini dam ulsul? – men zen anakarekam lwakye, ‘Alap nonol tanganna zi niban wenya ban yang sosuku.’
⁵ Hen Zen dekam anakan guku, ‘Zini an-bi zemka hli sonkam– dekam de we zeban aha-en en hapye. We-zi darena in dekam Alap mo nwenak san de aha-ere timni kiye.’
⁶ In zebe emsa gubiridaꞌan: Alap mo nwenak we-zi darena zen dan hom. Zen hwena aha-en. Zen in zep, Alap mensa aha-en sonna, zi bap zen etan kles son.”
⁷ Farisikam de zini in ki zep etan dakensiblik, “Ki Musa Bak ba hap anakan titi tabirki? – ‘Zini we zemka sap de baes gwibinkim, hwena nonol baes gwibin hip de suratsa de anakan ale gunkum, “Ëe mese kire hap baes gwibik.”’”
⁸ Ki zep hwena ding gulzimki, “Musa Bak in mae hap kirekam ein emsa gubiridaka: Sap em in kitak kwasang enlalana tawa naka hom. Hwena nonol lonesen nakon, Alap sap hom kirekam dwam gweka.
⁹ Hwena Ëe ama emsa gubiridaꞌan: Men nara we zemka zen de kahalo gwen sremnak baes gwibinni, hwena ahanaka de etan gonkam, ki zini in Alap mo nwenak kahalonak gwe gweꞌara. Kahalo gwennak de baes gwibinni, desa Ëe home jalse gwibiridaꞌan.”
¹⁰ Hwena ee zere hon de ang ta gwen wenya dekam zebe hen Yesussu enblak, “Hare orana aha-enke– Alap mo dwam gwibin sin de we zemka baes gwibin hip denaye. Kirekam de lwankam, ki zini bap zen wenya kap ta gwen.”
¹¹ Yesus ki zep asa ding gulzimki, “Hwena kirekam de we gon sremkam lowehe gwen hap dena, kitak de zini molya desa dwam neibik. Diki men zebe mae en hap Alap golzimꞌinka, zen en sa desan ang ta gwer.
¹² Sap zini ahakon mae hap we walya kap da srem gwe-gwenan: Timni mes ki jaha gwen nakon karek gweblak. Ahakon hwena aha zi zeno mae mo timni eirim karek nul gwizimnin, kire nakon kap da srem gwe-gwenan. Ahakon hwena Alap mo dwam gwibin sin de syal gwen hap sa we gon sremkam lowehe gwer. Zen in zep, men nara anakan eisbinni, ‘Alap mes ki kirekam asa gubluka,’ zen dikire we gon sremkam lowehe gwek.”
¹³ Zini ki zep walas tane-nena Yesus onak dep kap nulhal gweꞌanzak– Zen de taha tehabirida inen naban Alapsa anakan gu soneblan hap, “Emki walasna an hap dawemsa gol gwizimdin.” Hwena zere hon de ang tan wenya eye anakan jalse eibirida gweꞌak, “Bahem Gurusa blos tablan.”
¹⁴ Hwena Zen zep asa gubiridaka, “Dikire Abon noleyaing gwe-gwezak. Bahem jalse gwibiridan. Sap walasna an makare wenya, zen zen Alap mo irik ginni bi neibiꞌin.”
¹⁵ Dekam zep hendep Alapsa de gu sone gweblan naban tahana tehabirida ine gweꞌanka. Kim hya gwesibiridaka, ki zep kon etan asa golesek gweka.
¹⁶ Aha yaklakam ki zep zini– zise gwen srem nik, Yesussu takensibli zaka, “Bian Guru, ee banakare syal dawemsa asa gol? – dekam de Alap mo nwenak serkam sam gwesin hip, Zen dekakim hendep de gwen hap denaka abe hap golblaka.”
¹⁷ Yesus ki zep ding gulbluka, “Em dwan ene maka dam gulsuꞌura– Alap mo nwenak dikim ‘sam gwesin hip’ denaye. Hendep de ngaya gwen hap de sam gwesin Zini, Zen diki aha-en– Alap Ze-en. Hwena em de hendep de ngaya gwen hap dwam gwenna, Musa mo titi tabin ol san em ang gwe-gwen.”
¹⁸ Zini in ki zep etan takensiblika, “Ki banakare wenyak asa ang gwe-gwer?” Yesus ki zep ding gulbluka, “Zen dwan anakanke, ‘Zini bahem tan. Bahem kahalo gwen. Bahem sowe gwen. Zisi bahem boton hap klak tan hen boton olsa bahem gol hala seran.
¹⁹ Ane-biasa em blikip gwesik gwizimdin.’ Hen, ‘Zi bose omka em kwasang gwibirida gwen– san de enaka de kwasang gweblanna kiye.’”
²⁰ Hwena zini in ki zep ding gulbluka, “Ëe mese kitak desan ang gwek. Hwena aha syala san ha ki? – desa de syal gwibinkim de ee ngaya gwen hap denaye?”
²¹ Yesus ki zep gubluka, “Em de dwam gwenna dawemkam tangan de Alap mo nwenak sam gwesin hip, em song gwen, ere mo kire-kirena kitak tangan te-ala hap lirak tabir. Te-alana desa tahalha zi hip kae gwebla-zim. Kirekame syal gwibiꞌinka, ki ngatan zi mo langnake hendep de te-alasa beyakam lam taꞌara. Ena dekam etan hataza– Asa dikim ang gweblan hapye.”
²² Kirekam kim salblaka, dekam zep kon enlala dowe hanan naban song gweka– mae hap: Sap zeno kire-kirena beya tanganna.
²³ Ki zep hwena asa gubiridaka, “Eiwa denakae emsa gubiridaꞌan: Eiwa, dam-dam naka hom– te-ala beya zi de Alap mo irik ginnik hatan hapye.
²⁴ Ama etan emsa gubiridaꞌan: Te-ala beya zi de Alap mo irik ginnik tin hip dena, zen men kiye– unta yawal de jaron hul betek san tinni. Kire otweran yawala toton bejen tin.”
²⁵ Ëe kime kirekam asalblak, ee ama tangan etenggwank. Ki zebe eguk, “Hare eiwa kire tangankamke! Ki hwena endan nik sa engaya gwer? Toton nara molya.”
²⁶ Hwena Yesus ki zep nwekam de amjanbin niban asa gubiridaka, “Eiwa, auhu-kama zini zere mae mo sosonkam bejen zenaka ngaya tabin. Hwena Alap de zi hip syal gwibir-zimdin srem hap dena, aha-en mae hom tanganke.”
²⁷ Petrus ki zep gubluka, “Ki hwena abe mae hap dena bankarekam sa lwal? Sap ee mese ere mae mo tingare bi gwibinni Emsa de ang gweblanda gwen hap hli kulidak. Zep ee basa asa lamkam ulin?”
²⁸ Ki zep hwena ding gulbluka, “Eiwa denakae emsa gubiridaꞌan: Ngatan zi mo lang nakore Zi Tanganna Ëe kime okama esenak Alap onakore ngatan nabare komal tumnak teipsinkim nikinꞌik, em Abon de ang ta gwen wenya dekam esa hen ere mae hap de dua-blaskam de komal tumnak teinikin– dekon de dua-blaskam de Israel Bak onakore zi aususa irik gin hipye.
²⁹ Hen zini men zen Asa de ang gwe-gweblan hap hli nulida gweꞌak– gol zem, aya-wal oso-wal zem, somol wal zem, an-bi zem, walas zem, ahaksa nga zem– zebe mae hap hwena Alap sabak tangankam sa etan kiresa kap gul gwizimdi– sap iyekam de gubirida gwen wenya, gol, hen nga maena. Hen zen hendep de engaya gwen hap denaka sa nulin.
³⁰ Hwena beyana men zen sap angkam bose naban lowehe gweꞌan, zen zen sa hwena lamkam lure san egwer. Hen men zen angkam bose srem wenya lowehe gweꞌan, zen zen sa hwena lamkam ngein sin egwer.”