¹ Dekam zep Farisikam de zi niban Sadukikam de zi niban Yesus onak dep yaing gwezak– zao de akasiblin hap. Ki zep ze nenblak, “Emki abe mae hap ngli nakore owassa syal gwibir-zimdin– ee akakim emsa anakan dam lasik, ‘An eiwa Alap onakon hata zaka.’”
² Ki zep ding gulzimki, “Yaklana nikin anennak de kal-kal gwenkam, dekam anakane egu gwenan, ‘Langna sa sasa gwer.’
³ Hen kirekam, kaknak de okawen kakaksa hla tankam, dekam ema dam ulsuk gwenan, ‘Namen sa ona il tila.’ O de il ti gwen hap dena hen sasa gwen hap dena, em desa en ema dam ulsuk gwenan, hwena owas-owasna men kirekam angkam jowe gweꞌan, desa home dam ulsuk gweꞌan.
⁴ Em an eiwa angkam de zini jal-jal tanganna, hen Alapsa mese hli lak, in zebe Asa abe lal– ebe mae hap de owassa syal gwibir-zimdin hipye. Hwena Ëe molye owasna ebe mae hap syal gwibir-zimk. Diki ngein sin de yaklanak asa aha-en syal gwibir-zim: Men kirekam Alap mo ol ayang gul gwen zini Yunus Bak hon lwakke, kirekam sa etan lwal.” Kirekam kim gubiridaka, zao zep hli yuludaka.
⁵ Ëe zere hon de ang ta gwen wenya kime hen men eihyanak yaing gwenak, ee ama hwena rotisa de lop tanna eeititi gwek.
⁶ Hwena dekam zep asa gubiridaꞌanka, “Dawem. Terya-tyakam lowehek. Farisi hen Sadukikam de zi mo ragisa ema ing ulink.”
⁷ Hwena ee kime kirekam asalblak, dekam zebe enaka lonbiridaꞌak, “Ragi hap in mae hap ki nesa gubiridala: Rotina insa biti laza srem gwerke!”
⁸ Hwena Yesus mes asa tawa gwibiridaka– ee insa etonꞌakye, ki zep asa gubiridaka, “Em ba habe roti biti tazan srem hap enaka lonbiridaꞌan? Em an home eiwakam Asa laibli gweblaꞌan!
⁹ Em ba hap tangane dam ulsuk srem gwer? Em san home enlala eibiꞌin? – limakam de rotina mensae lima ribukam de zi hip ahap tabir-zimkye. Dekam mosrona mensa ena tagal lak, yuna banakaꞌen esuwek?
¹⁰ Hen kirekam, men dekame tujukam de rotina empat ribukam de zi hip ahap tabir-zimk, zewe hen tembane mosrona yu yawal-yawala banakaꞌen esuwek?
¹¹ Diki em emaka dam ulsul, ‘Zen roti biti tazan srem hap hom ki nesa gubiridala.’ Hwena Ëe mae habe ki emsa gubiridal, ‘Dawem. Farisi hen Sadukikam de zi mo ragisa ema ing ulink.’”
¹² Dekam zebe anakan dam ulsuk, “Hare Zen ragi tangan hap hom am ki nesa gubiridala– mensa rotisa de syal gwibinnik mas ul gwenanke. Zen diki Farisi hen Sadukikam de zi mo tawa tabin karek san de ang ta gwen srem hap am ki nesa gubiridala.”
¹³ Yesus kim e bosena Kaesarea-Pilipi golek denak asa goleyaing gweka, zao zep asa takensibiridaka, “Zi mo dam tasinkim, ngatan zi mo lang nakore Zi Tanganna Ëe an nara mo weinak debe hatazak?”
¹⁴ Ëe ki zebe ding ulblik, “Ahakon man emsa nen gweblanan, ‘In baptis ta gwibin zini Yohanis Swe tin nikon etan ngaya gweka. In zen hwena Yesuskum bosena li yul soneka.’ Hen ahakon man emsa nen gweblanan, ‘In Elia Bak mo weinak Alap mo olsa ayang gul gwizimꞌira.’ Hen ahakon man emsa nen gweblanan, ‘In Yermia Bak mo weinak dep dena.’ Hen ahakon man emsa enlala ne gweblanan, ‘Zen diki ahanik mo weinak dep jowe zaka– orep men zen Alap mo ola ayang nul gwekke.’”
¹⁵ Ki zep etan asa takensibiridaka, “Hwena ere mae mo Asa de dam tasinkim, Ëe an diki nara mo weinak dep dena?”
¹⁶ Simon Bak, aha bosena Petrus, ki zep ding gulbluka, “Bian, Em in Zen– Israelsa de ngaya tabin hip de Teipsin niye, Ngaya Zini Alap mo Tane.”
¹⁷ Dekam zep ding gulbluka, “Simon, Yohanis Bak mo tane, em isrip-sri gwibinnike gwe gweꞌara. Sap em in zi mo dam gulsun nukore naka home kirekam kira gwenda. Hwena ngatan zi mo langnak de Bian Zen ki emsa enlala soblala– kirekam de dam gulsun hupye.
¹⁸ Zep Ëe ama emsa gubluꞌan: Em in Petrus– kaso drak-drak makare zini. Ebon onak sa ano jematna tatem ezauk gwer– kaso yawalak de golsa tauk anen makan. Ano jematna in sap sa Juwen Zi Bak dri yulsun hup akabiri.
¹⁹ Ëe asa ebe hap Alap mo irik ginnik dep de kuncina zerblal. Em esa Bian Alap mo enlala san ngatan zi mo lang san dep de lilikinni okamanak de zi hip gulhlusuk gwizimdi hen talusuk gwizimdi.”
²⁰ Ki zep hwena asa jalse gwibiridaka, “Asa insa kirekam dam lasinin, aha maesa hwena bahem anakan gubiridan, ‘In Zen tangan– Israelsa de ngaya tabin hip de Teipsin niye.’”
²¹ Yaklana in dekam zep Yesus kon gwisibir hanaka– zere hon de ang ta gwen wenya asa de damnak anakan gubirida gwen naye, “Alap mo dwam gwibin sin de syal gwibin hip, Ëe asa Yerusalem san song gwer. Zao Yahudi mo nol-nola, Alap mo golak de mam-mamna, hen Musa mo olsa de tawa ta gwibin zini sa Asa serkam karek da gwer. Zen sa hendep Asa dal. Hwena yaklana dan-ahan, ki sa Bian tin nikon etan Asa ngaya tala.”
²² Petrus ki zep hwena Yesussu gubluka ora nakon de asyal hehan hap, zao zep anakan jalse gweblaꞌanka, “Em bap kirekam gulu! Diki Alap Zen langa gulsun– kirekam de Emsa gweblan hap dena in saye. Bian, diki Ebon bap zen kirekam lwan.”
²³ Yesus hwena ki zep Petrussu lero gweblaka, zao zep gubluka, “Em in dowal mo kigi! Ki lun em gwen! Em ba habe Asa tru-tru gulbluꞌara? Eno kirekam de enlalana in, Alap mo dwam gwibin sin denaka hom. Zen auhu-kama zi mo dena.”
²⁴ Ki zep hwena tingare zere hon de ang ta gwen wenya asa gubiridaka, “Men nara Abon de ang gwe-gwen hap dwam gwenna, zen diki zere mo gwenna zen eititi gwibin– dekam de zere hap de te-lidak son we son naban Asa zertronda gwen hapye, anakare enlala naban, ‘Ëe sap asa Yesus hun apdenak lil.’
²⁵ Sap men zen de zere mae mo auhu-kamanak de gwenna anakan nolairi gweꞌak, ‘Ëe babe Yesussu de ang gwe-gweblannak karekna goltowe gwen,’ ki zeno mae mo gwenna in sa jek-jak gwer. Diki men zen de zere mae mo gwenna Asa de ang gwe-gweblan hap sosok nul gweꞌak, hendep zao mae de tin hip, zen zen sa hendep denaban engaya gwer.
²⁶ San ha dawemna? – em de serkam te-ala beya gwenkam hendep kitak de okamana ansa bi gwibinkim, hwena dekam de ere mo gwensa tihis gin hip. Kirekam dawem naka hom! Tinkim san ha emaka Alap hap ba maesa golblaꞌara? – dekam de etan ngaya gwen hapye. Kina ki bejen.
²⁷ Sap molya holo gwek, ngatan zi mo lang nakore Zi Tanganna Ëe dekam asa apdekam ere mo dam taha nakore zi niban Bian mo sosonna zigolhatazal. Zen diki dekam asa hwena tingare zi hip aha-en aha-enkam klis gul gwizim– dekam de zere mae mo syal eisi golzimdin hip.
²⁸ Ëe eiwa denakae emsa gubiridaꞌan: Em an zene awe lowe heꞌan, em molye ahakon na-en juwek, ki esa ngatan zi mo lang nakore Zi Tanganna Asa hla lase gul– Ëe kime teipsinkim de irik ginkim kon gwesik hanaꞌakye.”