¹ Zao kim lwa seꞌak, Yesus dekam zep dua-blaskam de zere hon ang ta gwen wenya asa tagal gulsuku, zao zep sosonna abe mae hap golzimki– ee dikim dowal-dowalsa golealsa sone gwen hap, hen kirekam-kirekam sang-sang karek gollwa gwen zisi dikim dawem ta gwibin hip.
² Dua-blaskam de dam tasibin zini, ano mae mo bosem-sena, nonol Simon– mensa hen “Petrus” kum nen gweblanan, oso zem Andreas han. Hen Zebedeus mo walas darena, Yakobus oso zem Yohanis hin.
³ Hen Pilipus ne Bartolomeus ne, Tomas, hen aena, Matius. Ëe menkam Roma mo irik ginnik debe pajak te-alasa alal ta gwek. Hen ahana Alpeus Bak mo tanena Yakobus, hen ahana Tadeus.
⁴ Hen ahana Simon– in zen nonol Israel dikim Roma mo irik gin nikon eze-en gwen hap de easas gwennak ang gwekake. Hen ahana Kariot walya Yudas. In zen sa Yesussu zergulu.
⁵ Dua-blaskam de wenya asa dekam zep anakare ol zim-zim niban lup gul soneka, “Yahudi srem zi mo e-e san bahem sek gwen. Samaria mo e-e san hen bahem.
⁶ Diki Israelk de zi ensa em amjanbin– sap zen san de bi srem zahona kiye.
⁷ A kirekam lonbirida song gwek: ‘Alap man angkam Zen de nesa teipsinkim irik ginkim kon gwesibir hanaꞌara.’
⁸ Zi sang-sangna dawem la gwibik. Hen tinni ngaya la gwibik. Hen sop sang-sang karek nabare zini dawem la gwibik. Hen dowal-dowala olealsa sone gwek. Ëe asa kire hap de sosonsa ebe mae hap totoresa golzim, zep em hen kirekam totoresa mas eibirida gwek.
⁹ Te-alana bahem mae lop tan– sap yawala, sap hen betek maena.
¹⁰ Ora san dep de tembane taiblin honna bahem hen wewek tan, hen pakeanna timnik de enna kim sek gwek. Hen sepatuna ala son enna kim emki sek gwen. Dutena hen bahem mae kap tan. Em in Alap mo syalsae oꞌan, zep em men desae tawa la gwibiꞌik, zen zen sa ebe mae hap tembane maena nol gwizim– zao dikim lowehen hap denaye.
¹¹ “Em de enak yaing gwe-gwennak, nonol mae hap em ehakalsik gwen, ‘Nara zi wehe asa ena an kon zer inꞌinka?’ Men zen emsa zer irinni, zebon en emki gwen, hendep dekon en emki etan song gwen.
¹² Golak de tin nikon, nonol anakan em egu kini gwen, ‘Dawem. Em Alap mo taha terenake lowe heꞌan.’
¹³ Zao de Alap osan dep de hohle gwen nik gweꞌanka, ki eiwa zao esa Alap mo taha terenak dawemkam lowehe gwer. Kire nik de gwe srem gweꞌanka, ki emki enbirida gukhan, ‘Ëe mensa nonol emsa enbiridal, Alap mo taha terenak de sap lowehen hap dena, awe molya ki lwak.’
¹⁴ Hwena men dekore e nakon emsa anakare ola ban zer irin sremna, ‘Em ba habe awe hataꞌan zala? Ëe ama emsa de salblanna baes taꞌan,’ dekam em kon song gwen. Hen ere mo tana sonsa em ze taik-tik so gukhan– zen dekakim anakan tame nuk, ‘Zen sap Alap onakore ol dawem naban nebe mae hap golhatazim zira, hwena nen insa er-in srem gwenan nere mae hap de kareksae kim mam ulin.’
¹⁵ Eiwa denakae emsa gubiridaꞌan: Aumwa hap de zisi klis gunnuk, Alap ena insa anakan sa enlala gweblala, ‘Zen orep de ena Sodomk de zisi ekarek gwenkam man kwei-kwik nuk.’ Zep men kirekam Alap orep Sodomk de zisi zere mae mo karek-karek hap heip gulku, hwena ano lup gul sonen zini emsa de lup gul irin srem zini, desa aumwa hap de klis gunnuk serkam tangan sa karek tabiri.”
¹⁶ “Emki eenlala gwen: Ëe domba makare soson srem nakae emsa lup gul soneꞌan– gwe tihi jal-jal ngirin sin dep. Zen in zep terya-tyakam sek gwek– men kiye, wanya de song gwenna. Hwena sae-sae enlalakam em sek gwen– men kiye, mawana ohola mo enlalana.
¹⁷ Zep terya-tyakam lowehe gwek, sap emsa sa Yahudi mo but srem gol-gol san dep dahyohal gwer. Hen zewe de teipsin-teipsinni sa emsa de tangole gwibin hip nenbirida gwer.
¹⁸ Em an Asa de ang gwe-gweblanna, zep emsa sa pemerinta mo teipsin-teipsin zi sin dep kap nulhal gwer. Zen kirekam Alap mo dwam gwibin sin sa ki ebe mae hap lwa gwizim– em dikim ze Yahudi mo teipsin-teipsin nika hen Yahudi srem zi mo teipsin-teipsin nika abe hap denaka tonbirida gwen hap.
¹⁹ Zep emsa de kap gulhal gwennak, em bahem anakare hap enlalana ebeya gwe-gwen, ‘Ëe banakarekam asa ze ding ul gwizim?’ Sap men kirekam de ding gul gwizimdin hip dena, zen emsa de taken-taken gweblan ennak sa ki Alap ebe mae hap gol gwizimdi.
²⁰ Sap dekam em en molye ola lon gwibik. Hwena ngatan zi mo langnak de Bian mo Enho sa eno mae mo ek tihi san ding gul gwizimdi.
²¹ “Emsa sa tingare zini husus neibirida gwer, sap em an Asa de ang gwe-gweblan wenya. Zep a kirekam sa ebe mae hap lwa gwizim: Emsa ere mae mo aya-wal oso-wal tanganna sa tameran hap nolegu gwer. Hen emsa ere mae mo bi walya sa tameran hap nolegu gwer. Hen ere mae mo walasna sa emsa abe hap de jal hap noletobe gwe-gwer, hendep tameran hap sa hen emsa nolegu gwer. Hwena em in zene Asa de taibliblannak tatem ezauk gweꞌak, hendep aumwa hap denak de hataꞌak, em esa engaya gwer.
²² (10:21)
²³ Zep emsa de aha e maenak karek tabinkim, dekon aha e san em heya-hya gwen. Sap eiwa denakae emsa gubiridaꞌan: Em de tingare Israel mo e-esa amjanbiridankam sul sonen sremnak, ngatan zi mo lang nakore Zi Tanganna Ëe dekam asa lwa halzal.
²⁴ “Zep gulk sun de ol blaoranna ansa emki enlala gwe-gwibin: Sekola walasna, zen mam naka hom– guru zem onakonye. Zep guru zemka de aha zi lamang ta gwenkam, sekola walas zem insa hen sa kirekam lamang da gwibir. Sekola walasna in sa sam gwesili– zen de guru zemka tana wei san zertronkamye. Hen kirekam, zi mo tana iltikinnik de babu gwe-gwen zini, zen hen mam naka hom– zere mo zi bina in onakonye. Ëe an sap gol bi nike awe gweꞌan, hwena Asa man lamang da gwenan, ‘In dowal mo kigi mo sosonkam syal gwe-gweꞌara.’ Zep em Abon de ang ta gwen wenya, Asa de tana wei san zertronkam, emsa hen kirekam sa lamang da gwibir.”
²⁵ (10:24)
²⁶ “Zen in zep, zi bose omka bahem airibirida gwen. Sap karekna mensa aningkim ebe mae hap nol gwizimnin, desa sa Alap lamkam golwet sola. Hen kalangna mensa Alap aning gul gweka, desa sa hendep tingare zini hla nul.
²⁷ Ëe mensa kam golak emsa tonbirida gweꞌan, em hwena desa yaklam neik tagal gwennak lonbirida gwek. Men desae ne-erenak emsa tonbirida gweꞌan, em hwena desa ol mam-mamkam neik tagal gwennak lonbirida gwek.
²⁸ Zi bose omka bahem airibirida gwen, sap zen auhu-kama tim en naka damera gwenan. Hwena zeno mae mo sosonna hom tangan– ang naka de karek tan hap denaye. Diki Alap ensa em airi gweblan, sap Zen Zebon en sosonna– tim niban ang naban de syauk blanak karek son hap denaye.
²⁹ “Emki mawana tainim bes-beꞌa enlala gwibiridan. Desa zini hom te-alakam de kap gun hup dwam neibirida gwenan. Sap eiwa kirekam, hwena zen hen aha-en mae molya kama san zanka– neno mae mo Bian de kirekam dwam gweblan sremkamye.
³⁰ Hen kirekam, eno mae mo nol alana, Bian mes desa anakan tawa gwibirki, ‘Beyana ki en.’
³¹ In zep ere mae mo tim hip dena bahem engalap gwe-gwen, sap em Alap mo nwenak mawana tainim bes-bes naban apdenak hom.”
³² “Zen in zep, zini men zen aha zi hon zenaka anakan kira ta gwenna, ‘Ëe an Yesussu de ang gwe-gweblanna,’ kire zini Ëe asa hen ngatan zi mo langnak de ere mo Bian hon anakan kira tal, ‘Zen an hen eiwa Asa de ang gwe-gweblanna.’
³³ Hwena men zen de Asa aha zi hon anakan nazabeblaꞌak, ‘Ëe Yesussu de ang gwe-gweblan zisi hom,’ ki Ëe hen anakan asa desa kira tal, ‘Zini an Asa de ang gwe-gweblan naka hom.’
³⁴ “Bahem anakan Asa kil ti gwen, ‘Zen an umlaesa de okamanak awe golhatazan hap hata zaka.’ Ëe kire hap home. Hwena abe hap de jal hap Asa de tame tan srem wenya sa emsa tameran hap gil-gil neibirida gwer.
³⁵ Ëe ansa hatazak, zen dekam sa ebon mae onak anakarekam lwa gwer: ‘Zi walasna zen bi wal zeban sa zenaka gil-gil neibirida gwer. Wenam tol-tolkam dena, zen an wal zeban sa zenaka gil-gil neibirida gwer. Hen we walya, zen aebo wal zeban sa zenaka gil-gil neibirida gwer.
³⁶ Dekam ere mae mo iyena, zen zen sa ebe mae hap de jal zi hip ejower.’
³⁷ “Men zen bi zemka dawemkam enna nolabirida gwenan, hwena zeno mae mo Asa de en lwablanna man lwala heꞌan, kirekam de zini zen hom esam gwesiꞌin– Abon de ang ta gwen hapye. Hen kirekam, men zen an zemka, ahaksa walas zemka dawemkam enna nolabirida gwenan, hwena zeno mae mo Asa de en lwablanna man lwala heꞌan, zen hen hom edakastiꞌin– Abon de ang ta gwen hapye.
³⁸ Hen zi de zenaka anakan sosok tan sremna, ‘Asa sap sa Yesus mo kim te-lidak sonnak makan dain,’ zen hen hom Abon de ang ta gwen hap esam gwesiꞌin.
³⁹ Sap men zen zere mo auhu-kamanak de gwensa anakan golairiꞌanka, ‘Ëe babe Yesussu de ang gwe-gweblannak karekna goltowe gwen,’ ki zeno gwenna in sa jek-jak gweblal. Diki men zen Asa de ang gwe-gweblan hap zere mo gwenna sosok guꞌunka, hendep zao mae de tin hip, zen zen sa hendep denaban ngaya gwera.
⁴⁰ “Men nara ano zer sonen zini emsa zer irinni, zen ki hen Ënaka zer inꞌira. Hen men zen Ënaka zer irinni, zen hen Bian, men Zen Asa zer sone zaka, Desa hen zer inꞌira.
⁴¹ Men nara Alap mo ol ayang gul gwen zisi zer irinni, anakare hap, ‘Zen an Alap mo olsa ayang gul gweꞌara,’ ki Alap sa hen enlala gweblala, ‘Zen hen syal bose zem.’ Zep Alap mo olsa de ayang gul gwen hap de dawemna, desa sa hen Alap zebe hap lamkam golblala, sap zen kire zisi mas gweblaka. Hen kirekam, men zen enlala dam-dam enkam de gwe gwen zisi zer irinni, anakare hap, ‘Zen Alapsa betek gwe-gweblanda,’ ki Alap sa hen zebe hap dam-damkam de gwe gwen zi hip de dawemna golblala.
⁴² Eiwa denakae emsa gubiridaꞌan: Men nara aha-ere ho mok mae tolsa bose srem zi hip golblanna, anakare enlala naban, ‘Zini an hen Yesussu ang gwe-gweblanda,’ ki Alap sa zebe hap hen dawemna lamkam golblala. Zen molya gulin srem gweka.”