¹ Kristus Yesus, Zen teipsin zini Daud Bak mo Auyan-tane. Zeno auyan-aza mo ausuna, zen Abraham Bak onakon de aitbinkim kon gwesibir hanankam:
² Abraham Isaksa we taka. Isak hwena Yakobsa we taka. Zen hwena beyana dua-blas enkam wei-wik gulku. Ahana bosena Yehuda,
³ zen hwena Peres ne Zera neka we soka– wenya bosena Tamar hon. Hwena Peres zep Hezronsa we taka. Zen hwena Ramsa we taka.
⁴ Ram hwena Aminadabsa we taka. Zen hwena Nahasonsa we taka. Zen hwena Salmonsa we taka.
⁵ Salmon hwena Boassa we taka– Rahab hon. Boas hwena Obedsa we taka– Rut hon. Zen hwena Isaesa we taka.
⁶ Isai hwena teipsin zini Daud Baksa we taka. Teipsin zini Daud Bak onakon hendep in kim Israel mo auyan-azasa Babel san dep asaskam kap nulhak– zao de lowehe gwen hap, zeno mae mo bosem-sesa de aitbinni an zen: Daud Salomosa we taka– Uria mo we nala Batsyeba hon.
⁷ Salomo hwena Rehabeyamsa we taka. Zen hwena Abiasa we taka. Abia hwena Asa Baksa we taka.
⁸ Zen hwena Yosafatsa we taka. Hwena Yosafat Yoramsa we taka. Zen hwena Uzia Baksa we taka.
⁹ Uzia hwena Yotamsa we taka. Zen hwena Ahas Baksa we taka. Ahas hwena Hiskiasa we taka.
¹⁰ Zen hwena Manasyesa we taka. Manasye hwena Amon Baksa we taka. Zen hwena Yosia Baksa we taka.
¹¹ Yosia hwena nonol Yekonyasa we taka. Zao zep hen etan oso wal zemka wei-wik gulku. Israelk de zini kim holokam Alapsa hli dak, dekam zep Babelk de jana nabare zini teipsin zini Yekonyasa zere mae mo lang san dep nerhak, hen Israelk de zini beya tangankam asaskam zao kang nuk.
¹² Yekonya hwena Babelk zep Sealtielsa we taka. Zao kim 70 tahun enkam lowehek, ki zep etan tapbla nuk. Sealtiel hwena Zerubabelsa zep we taka.
¹³ Zerubabel hwena Abihudsu zep we taka. Zen hwena Elyakimsi zep we taka. Elyakim hwena Azor Baksa zep we taka.
¹⁴ Zen hwena Zadoksa zep we taka. Zadok hwena Akimsi zep we taka. Zen hwena Eliudsu zep we taka.
¹⁵ Eliud hwena Eleazarsa zep we taka. Zen hwena Matansa zep we taka. Matan hwena aha zini Yakobsa zep we taka.
¹⁶ Yakob hwena Maria mo zini Yusupsu zep we taka. Maria zep Yesussu we tak– Insa “Kristus”kum en gweblananke.
¹⁷ Zep Abraham onakon de auyan-azasa aitbir hankam Daud osan dep beyana kitak empat-blas enkam. Hen Daud onakon de aitbir hankam Israelsa de asaskam Babelk kang gun sun dep, beyana hen empat-blas enkam. Hen dekon de etan lwan dahal zannak Kristus Yesussu de jaha gwen san dep aitbir hankam, beyana hen empat-blas enkam.
¹⁸ Kristus Yesussu de jaha gwenna in, zen ausuna a kirekam mo lwakye: An zem in Maria, zen Yusup hup de golgu gweblanna. Hwena nama de gon sremnak zep u gwek. Hwena Yusup hom anakan tame guꞌunka, “Zen Alap mo Enho mo sosonkam u gweꞌan.”
¹⁹ Yusup man tangan Musa mo titi tabin ola blikip gwesik gwibirki, zep Mariasa ze-en enlala gwibiꞌinka, “Ëe molye gok, sap zen malinkim u gweꞌan.” Zen dekam zep enlala gweꞌanka, “Damnak de kira gwenkam, ki Maria mo bosena sa karek gwer. Zep sowekam asa gubir, ‘Ëe ama emsa baes gwibiꞌin.’”
²⁰ Zen kim dam gulsuku, “Asa ki Mariasa baes gwibir,” hwena dekam zep ni tannak eisirkim Alap mo dam taha nakore zini gublu zaka, “Yusup, Daud Bak mo auyan-tane, bahem Mariasa de gon hap baes gwen. Sap Walasna insa u gweꞌan, Zen Alap mo Enho mo sosonkam dena.
²¹ Zen zi walassa sa jaha gwer. Em Yesuskum bose ta, sap Zen in Zen sa zere mo hli irin zini ngaya tabiri– zeno mae mo karek-kareksa de ngan gulsuzimdinkim.”
²² An kitak Alap Zen ki syal gwibirki– zere mo ol ayang gul gwen zini Yesaya mo alenak dikim zaun hup, mensa Zena anakan gu-gublukake,
²³ “Zi niban de gaing en srem wenam seiwiri sa u gwer, hendep zi walassa sa jaha gwer. Walasna in ‘Imanuel’kam sa bose dal.” Yesaya insa “Imanuel”kam gubluka, zen Ibrani olkam. Zeno enlalana, “Alap Zen nesa golelowehe gweꞌara.”
²⁴ Ni tan nakon kim luweka, hendep in kirekam Alap mo dam taha nakore zini in tonblaka, desan zep ki hendep ang gweka. Hwena Maria kim jaha gwe srem gweꞌak, zen hom dekam nini apdekam laꞌak. Walasna insa kim jaha gwek, Yusup dekam zep “Yesus”kum bose taka.
²⁵ (1:24)