¹ Yesus ki zep ola gulk sun blaonzimki– nen de enlala nik etopse gwen sremkam Alapsa abe ta gwen hap:
² “Orep e yalak zini ki, teipsinni. Zen hom Alapsa airi gweblaka, hen aha zisi hom blikip gwesibirida gweka.
³ Zao hen we nala ki. Zen mwin-mwan enkam teipsin zini insa anakan abe ta gwezak, ‘Asa tol mas gwibir. Zini man asa karek gul gweꞌara.’
⁴ “Teipsin zini in sap hom mas gwibin hip dwam gweka. Hwena etan-etankam hata gwek. Ki zep hendep enlala gweka, ‘Ëe sap home Alapsa airi gweblanan, hen aha zisi home blikip gwesibirida gwenan,
⁵ hwena wenya an man tangan asa blostabla tine gweꞌan, hendep asa tangan blalen gwer. Diki anik mas gwibik– zini insa de gublunkam, “Bahem kirekam karek gul gwen”, abon de hata gwensa dekakim zausuk.’”
⁶ Ki zep Bian srip gulsuzimki, “Mese ki esane gwenan– insa ki teipsin zi karekna in enlala gwekaye.
⁷ San ha Alap maka teipsin zi karek mo kim salsibiridaꞌara? – zere mo hlil irin walasna men zen kam denaban yaklam denaban nen sonebla tine gwenanye. San ha Zen maka esek gul gweꞌara? – dekam de mas gwibiridan hapye. Zen kirekam bejen.
⁸ Ëe ama emsa gubiridaꞌan: Zen dekam nabakam mas gwibirida gwenda. Hwena sap kirekam, Ëe ngatan zi mo lang nakore Zi Tangan de etan lwahal zankam, Ëe anakare enlala naban asa hatazal, ‘Asa de taibliblan wenya san ha nama tol? San ha hom tangan?’”
⁹ Aha yaklakam Yesus ki zep gulk sun de ol blaorankam tonbiridaka– zi de anakan zenaka boltere ta gwibin srem hap denaka, “Ëe ama serkam Alap mo nwenak dakastiꞌin.” Sap zen kire nakon zenaka anakan husus neibirida gwenan, “Zen aban apdenak hom.” Zen in zep gulk sun ola anakan blaonzimki,
¹⁰ “Farisi walya man Alap mo gol san song gweka– dekon de Alapsa gu soneblan hap. Hwena zao kim gweꞌanka, Roma mo irik ginnik dep de pajak te-ala alal tanda gwen zini dekam zep hen kire hap hata zaka.
¹¹ Farisi walya in dekam zep zebon onakon langa gwesik hankam zauꞌunka, hen zere en mo bosesa de mam gun hup denaka Alapsa anakan gu soneblaꞌanka, ‘Alap, ee ep dawemsa golblaꞌan, sap ee aha zi niban apdenak hom, hen zi karekna wakin mo kim hom. Ëe te-ala hole gwibinni tawa naka hom, ahak-ahakna tawa naka hom, hen kahalo gwenna– men kirekam ahakore zini kitak egwe gwenanye.
¹² Ëe minggu-jamkam dare yaklakame tembanena lwa gweblanan– Emsa dikim gu sonebla tine gwen hap. Hen ee de dare taha-tapkam ba maesa gul irinni, ee home Emsa te tya sone gwenan. Ahana ama ebe hap gol gweblanan.’
¹³ “Hwena Roma mo irik ginnik dep de te-ala alal tanda gwen hap de zini in langa nakon zauꞌunka. Dekon zep ngli san de kara gwesen sremkam huwe henkam nwe go-ho naban gu soneblaꞌanka, ‘Are Alap, asa tol kwasang gwebla. Sap ee an karek gulin hana gwen zi.’”
¹⁴ Yesus ki zep etan gubiridaka, “Ëe ama emsa gubiridaꞌan: Kim ola halka, te-ala alal tanda gwen zini in, zen zen en Alap mo nwenak sam gwesiki. Farisi walya in hom. Sap tingare zini men zen mam gwen hap ealp gwe-gwenan, Alap sa hwena otde tangannak kang gulu. Hwena men zen otde tangannak lowehe gwenan, desa hwena gut denak sa kang gul sera.”
¹⁵ Aha yaklakam ki zep zini walas tane-nena hen wal baizili Yesus onak dep kap nulhal gweꞌanzak– Zen de tahasa tehabirida ine gwen hap. Hwena dua-blaskam de zere hon ang ta gwen wenya in kim hla nulidak, zen zep hwena anakan jalse neibirida gweꞌak, “Bahem walasna an san kap gulhal gwezan. Bahem Gurusa blostablan.”
¹⁶ Yesus hwena ki zep walas tane-nena insa haen gwibiridaka, ki zep ze gubiridaka, “Dikire walasna Abon noleyaing gwe-gwezak. Bahem jalse gwibiridan. Sap walasna an makare wenya, zen zen Alap mo irik ginni bi neibiꞌin.
¹⁷ Eiwa denakae emsa gubiridaꞌan: Men nara walas betek mo kim Alapsa anakan daibliblaꞌak, ‘Zen eiwa ano teipsinni,’ zen zen Alap mo irik ginnik biti gweꞌan. Men zen de kirekam daiblibla srem gweꞌak, zen molya Alap mo irik ginnik biti gwek.”
¹⁸ Aha yaklakam, ki zep Yahudi kore teipsin tola Yesus hon hata zaka, zao zep gublu zaka, “Bian Guru, em airis. Ëe basa asa syal gwibir? – ee dikim hendep de gwen hap denaka gul irin hipye.”
¹⁹ Ki zep ding gulbluka, “Diki airis aha-en tangan, Alap Ze-en. Zep em Asa banakane enlala gweblaꞌara?
²⁰ Em dwan mes-eme sap Musa mo titi tabin ola tawa gwibirki– men zen anakan lwakye: ‘Bahem kahalo gwen. Zisi bahem tan. Bahem sowe gwen. Zisi bahem boton hap klak tan.’ Hen, ‘Ane-biasa em blikip gwesik gwizimdin.’”
²¹ Ki zep ding gulbluka, “Kitak insae aitbirida, ee betek nakone ki hendep desan ang gwek, hendep angkam nama.”
²² Kirekam kim salblaka ki zep ding gulbluka, “Hwena aha-en tangan lwa kiniꞌan– em de desan ang gwen hap denaye: Em song gwen, ere mo kire-kirena kitak tangan te-ala hap lirak tabir. Te-alana desa tahalha zi hip kae gwebla-zim. Kirekame syal gwibiꞌinka, ki ngatan zi mo langnake hendep de te-alasa beyakam lam taꞌara. Ena dekam etan hataza– Asa dikim ang gweblan hapye.”
²³ Zini in kim kirekam Yesussu salblaka, dekam zep tangan enlalana dowebla hanaka, sap zeno kire-kirena beya tanganna.
²⁴ Yesus hwena man ze karatda taka, deban guku, “Eiwa, dam-dam naka hom– te-ala beya zi de Alap mo irik ginnik hatan hapye.
²⁵ Te-ala beya zi de Alap mo irik ginnik hatan hap dena, zen men kiye– unta yawal de jaron hul betek san tinni. Kire otweran yawala toton bejen tin.”
²⁶ Men zen Yesussu kirekam sane daꞌak, man denggwanblak, dekam zep dakensiblik, “Hare eiwa kire tangankamke! Ki hwena endan nik sa engaya gwer? Toton nara molya.”
²⁷ Ki zep hwena ding gulzimki, “Eiwa, auhu-kama zini zere mae mo sosonkam bejen zenaka ngaya tabin. Hwena Alap de zi hip syal gwibir-zimdin srem hap dena, aha-en mae hom tanganke.”
²⁸ Hwena Petrus ki zep ding gubluka, “Ki hwena abe mae hap dena bankarekam sa lwal? Sap ee mese ere mae mo tingare bi gwibinni Emsa de ang gweblanda gwen hap hli kulidak. Zep ee basa asa lamkam ulin?”
²⁹ Yesus ki zep gubiridaka, “Eiwa denakae emsa gubiridaꞌan: Men zen de Alap mo irik gin hip de syal hap hli nulida gweꞌak– we wal walas zem, aya-wal oso-wal zem, an-bi zem, hen gol zem–
³⁰ zebe mae hap Alap sa mamkam kap gul gwizimdi. Men kiresa hli yuludanna, desa sa angkam okamanak sabakkam kap ta gwizimdi. Hwena Zen kim de kitak irik ginkim kon gwesibir hanaꞌanka, Zen dekam sa hen zebe mae hap hendep de engaya gwen hap dena golzimdi.”
³¹ Yesus ki zep dua-blaskam de ang ta gwen wenya insa tagal gulsuku, ki zep ze gubiridaka, “Emki esane gwen. Nen an angkam Yerusalem san debe yaing gwe seꞌan. Zewe kitak men kirekam Alap mo ol ayang gul gwen zini ale nul gwek, ngatan zi mo lang nakore Zi Tanganna abe hap dena, zen kire enkam sa ki hendep lwal.
³² Asa sa Yahudi srem zi mo tahanak dep tapbla dazim. Zen sa hwena Asa lamang tan naban swre da gwer, hen oltepkam sa Asa hol-hol da gwer,
³³ hen zen sa Asa dangole gwer. Ki sa hendep Asa dal. Hwena yaklana dan-ahan, ki asa etan tin nikon ngaya gwer.”
³⁴ Hwena dua-blaskam de zini in, hom mae engka en mae tame nuk. Banakan mes yap ze gweibiridaka, zep anakan hom dam nulsuk, “An kire hap ki gulu.”
³⁵ Yesus kim Yerikok goleyaing gwe seꞌan zaka, zi nwe diminni ora alpnak nikinꞌinka. Zen te-ala hap kon aberbe ta sone gwibirki.
³⁶ Zen kim Yesus maesa sasak-sasakna sane ta gubiꞌinka, ki zep tame gulku, “O an zi beyam-bya am taman gweꞌan.” Dekam zep takensik soneka, “Em ba hap?”
³⁷ Ki zep nenblak, “In Yesus tamanꞌara– Nazaret walya men.”
³⁸ Dekam zep taken sone gweblaꞌanka, “Yesus, Daud Bak mo Auyan-tane, asa tol kwasang gwebla!”
³⁹ Men zen teingiri daꞌak ki zep jalse neblak, “Balkkam!” Hwena zen dekam mam enkam etan taken sone gweblaꞌanka, “Daud Bak mo Auyan-tane, asa tol kwasang gwebla!”
⁴⁰ Yesus dekam zep zausuku, ki zep waulblu halzan hap gubiridaka. Kim nerhatazak, zao zep takensiblika,
⁴¹ “Em basae dwam gwibiꞌira? – Ëe de desa ebe hap syal gwibir-blin hapye.” Ki zep ding gulbluka, “Bian, ee ama nwesa de kara gwen hap dwam gweꞌan.”
⁴² Yesus ki zep gubluka, “Ki em kara gwen. Em mese asa taibliblala, zebe dawem gwenda.”
⁴³ Dekam zep ki hendep kara gweka, dekam zep Yesussu ang gwe sebla halka– Alap hap de dawemsa gol gweblan naban. Zi trana in kim owasna insa hla nuk, dekam zep kitak Alap mo bosena teip nulsubluꞌak.