Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kon singgai tobatuí ki Yesus nosambayang kon tobatuí tampat. Naonda in Sia nopaḷutdon nosambayang, murií-Nya tobatuí noguman, "Tuhan, tunduípa ing kami mosambayang, naí ki Yohanes notunduí kon dumoduduinya mita."
2 Daí kai Yesus doman, "Aka mo'ikow bo mosambayang yo singogdon nana'a, 'Amaí, Tonga'bi' Ikow ing ki Allah. Angoidon Ikow bo parenta'ai ing kami.
3 Ogoiaidon ing kami pomuḷoi in singgai ka'anon inta tugat ko'inami.
4 Bo ampungaidon in taḷaí nami, sing kami ain doman nongampung kon intau inta kotaḷaí ko'inami. Bo dona'ai pomayak makow ing kami kobulian im pirisaya nami ko'i-Nimu ko wakutu ing kami mokodungkuḷ kon soba'an.'"
5 Onda intua noguman doman Sia kon murií-Nya mita nana'a, "Aka kuma kon sigad monimu oyuíon tobatuí intau mayak im baḷoi yobayatnya pongantog in doḷom bo moguman, 'Ule, popoḷuanaipa im bogat aku'oi,
6 sin oyuíon in yobayatku nongkon binaya'an no'iandup mangoi kom baḷoiku bo diaídon ing ka'anon kom baḷoiku!'
7 Bo aka kuma yobayatnya tatua notubag nana'a, 'Dikadon moganggu ko'i-nakoí sing kinunsiíankudon in ḷolingkop bo nosiugdon ing kami motoḷu adií, daí doiídon aku'oi mobangon bo mobogoi ing ka'anon ko'inimu ule.'"
8 "Yo naíonda?" guman i Yesus bui. "Aku'oi im moguman ko'inimu, umpakahbií ikow yobayatnya, yo diaíbií mobangon in sia bo mobogoi kon onu im paraḷumu. Ta'e aka ikow bo diaí mo'oyak in umuran monangkokoí bo mo'igum, daí mobangonbií in sia bo mobogoi kon onu im paraḷumu.
9 Manangka intua Aku'oi moguman ko'i monimu: Po'igumdon, daí ogoianbií im mo'ikow; potayakdon daí moko'uliíbií im mo'ikow; ponangkokodon daí pobukatanbií kon ḷolingkop im mo'ikow.
10 Sim pomuḷoi intau inta mo'igum im motarimabií, bo intau inta motayak im moko'uliíbií, bo intau inta monangkokoí im pobukatanbií kon ḷolingkop.
11 Degaí oyuíon ing kon sigad monimu ing guyanga inta aka po'iguman i adiínya kon toyak, yo ogoiannya in uḷag?
12 Andeka aka ki adiínya mo'igum kon natu yo ogoiannya in ulipan?
13 Daí aka mo'ikow inta mora'at bo mota'au mobogoi kon inta mopia ko'i adiímu mita, yo bambiíkabií ki Amaímu inta kon soroga! Sia im mobogoibií in Roho-Nya ko'i monia inta umuran mo'igum ko'i-Nia!"
14 Kon singgai tobatuí ki Yesus noguntun kon dimukud mora'at nongkon intau boboí. Naonda in dimukud mora'at tatua iḷumuai kon intau boboí tatua, nokosingogdon in sia. Intau moaíntoí kon tua nongoherang.
15 Tongaí oyuíon kon sigad monia tua in noguman, "Sia tua noguntun kon dimukud mora'at nomakeí ing kawasa i Beelzebul, inta itoi in dimukud mora'at mita."
16 Oyuíon doman kon sigad monia tua im mo'igum kon tanda nongkon soroga, saḷaku bukti kon Sia in nongkon i Allah. Mosia tua im monungkuḷ ko'i-Nia.
17 Ta'e kinota'auanbií i Yesus in raian monia tatua, daí Sia noguman ko'i monia, "Aka tobatuí negara bo mosila-silai bo mosisaturuandon, yo negara tatua in diaíbií mononoi. Andeka motoḷu adií inta posibayak, yo tantuí diaíbií doman mononoi.
18 Natua doman ing kong karaja'an in Ibilis, aka kolompok tobatuí bo moropatoi ing kolompok doman tobatuí, yo karaja'an tatua in morumbunbií. Mo'ikow in noguman kon Aku'oi in noguntun kon dimukud mora'at takin nomakeí ing kawasa i Beelzebul.
19 Aka natua yo kawasa i ine im pinakeí in dumoduduimu mita noguntun kon dimukud mora'at tatua? Dumoduduimu bidon tontanií in noguman kon no'itaḷaí im mo'ikow!
20 Aku'oi na'a in noguntun kon dimukud mora'at takin kawasa i Allah. Tua im mangalenya kong ki Allah in nomangkoidon nomarentah kon yuaí-yuaík monimu.
21 Aka intau moropot bo nolongkap domandon in alatnya sin poḷukadnya kom baḷoinya tontanií, yo komintan kapunya'annya im mosaḷamatbií.
22 Ta'e aka oyuíon im mo'iliu in ropot ko'inia im mamangoi monubuh bo monaḷow ko'inia, daí daitonbií agowon in intau moropot tatua im bayongan alatnya inta mobalií kakuatannya poḷukad kom baḷoinya. Onda intua daitonya bo sila-silaion makow im barang in intau inta inagownya tatua.
23 Intau inta umuran momaḷawang ko'i-Nakoí, mosaturu ko'i-Nakoí. Bo intau inta doií moduḷu mogaid kon oaíidan-Ku, sia tua im momoguya'at kon oaíidan-Ku!"
24 Aka dimukud mora'at bo nonaḷaímai kon tobatuí intau, yo sia tua im maya-mayakbií makow in tampat inta no'ingkag sim motayak kom pogogaian, ta'e diaí in sia noko'ulií. Manangka intua sia nosingog nana'a, "Aku'oi bui mayak im baḷoi inta ain sinaḷaíanku tua.
25 Bo sia minayakdon bui. Kino'bayaíannyamai yo baḷoi tatua nodaritdon sin ain sinimpatan bo totok doman sinompia kinopira.
26 Daí iḷumuai bui in dimukud mora'at tatua bo nogoinií kon dimukud mora'at ibanea taya pitu inta mora'a-ra'at nongkon inia. Onda intua mosia nogutun kon intau tatua, sahingga pangabisannya, ka'ada'an intau tatua lebedon mora'at nongkon ka'ada'anea inta muna."
27 Koyogotpa ing ki Yesus nosingog, indoianmai tobatuí bobay kon sigad intau mobayong tatua nogumanbií ko'i Yesus nana'a, "Mosanangdon totok im bobay inta nopolahir bo nopoteteí, ko'i Tuang."
28 Ta'e ki Yesus noguman nana'a, "Intau inta mosanang totok im mosiabií inta mo'ibog mokidongog kom Pirman i Allah, bo mo'ibog mogaid kon onu inta pinoguman-Nya!"
29 Kon yuaík in intau mobayong tatua ki Yesus noginturus kon sirita-Nya, nana'a, "Mora'at totok intau masa in tana'a. Mosia mopo'igum baí Aku'oi mogaid kon inta mokoherang simbaí mopirisaya im mosia. Ta'e mosia diaíbií ogoian in tobatuímai, kolikudbií in tanda ko'i Nabi Yunus.
30 Sin naíonda bo ki Nabi Yunus inta nobalií tanda kon intau mita in Ninewe, yo natua domandon ki Adií Intau mobalií tanda kon intau mita masa in na'a.
31 Kon singgai pohakiman, ratu nongkon toḷatan mobangon moyotakin in intau mita masa na'a bo mohakim ko'i monia. Sin ratu tana'a in namangoi nongkon popod in dunia sim mokidongog kon totunduí i Salomo, ta'e kon na'a tana'a makow oyuíon in no'iliu kong kopandoi i Salomo.
32 Kon singgai tumi, intau mita in Ninewe mobiagdon bui moyotakin in intau mita masai na'a bo mosia im mohukum doman ko'i monia. Sin intau mita in Ninewe no'ibog nogogai nogaid kon inta mora'at ko wakutu im mosia nokodongog kon onu inta pinoguman i Nabi Yunus ko'i monia. Ta'e kon na'a, tana'a makow oyuíon inta mokawa-kawasa nongkon i Nabi Yunus."
33 "Diaíbií in tobatuímai intau mopoyongkit makow in togaí bodongka tungkubannya in tampayang, tantuí tuduonnyabií kon tampatnya. Simbaí komintan intau inta tumu'ot moko'ontong kon bayagnya.
34 Mata na'a, togaí in awak. Aka matamu bo mopia, daí mobayagbií doman in awakmu, ta'e aka matamu bo diaí mopia, mosindipbií doman in awakmu.
35 Tuamai umuran mokopopia simbaí bayag inta ko'inimu diaí mobalií mosindip.
36 Aka awakmu bo mobayag komintan, diaíbií tobatuímai im mosindip, bo mobayagbií doman komintan awakmu, naonda bo sindar in togaí nonimbayag ko'inimu."
37 Naonda ing ki Yesus nopaḷutdon notunduí, intau im Parisi tobatuí namangoi nogoinií ko'i-Nia mayak monga'an kom baḷoinya. Daí ki Yesus minayak doman bo nonga'an.
38 Ta'e intau im Parisi tatua nongoherang in noko'ontong ko'i Yesus nonga'an ta'e diaí muna nonomok naí atorang in agama.
39 Daí ki Tuhan nosingog ko'i-Nia nana'a, "Mo'ikow intau im Parisi totu'ubií kon aka palo bo pindan yo yuyuíanbií monimu dotaí in ḷuainya, ta'e bonu ing gina monimu nopuling in raian inta diaí mopia. Mongora'at bo mongotogat ing gina mo'ikow.
40 Nongo bodok im mo'ikow! Diaíbií degaí kota'auan monimu kong ki Allah inta nogaid kon dotaí in ḷuainya, Siabií doman tuata inta nogaid kon dotaí im bonunya?
41 Nana'a! onu inta kom bonu im pindan bo palomu tua, tuata inta musti ogoi monimu kon intau mita nobogaí. Aka tua in aidanmu, yo modarit komintan onu inta nokotor ko'inimu.
42 Koboditodon im mo'ikow intau mita im Parisi, sin pododunguí mita, pogama'an monimu kom mopuḷuh noporsen sim posukur, ta'e oaíid mita moaídil bo tabi ko'i Allah in iliongdon monimu. Aka mogaid kon tobatuí, yo ibanea in dikabií koliongan.
43 Koboditodon im mo'ikow intau mita im Parisi inta mo'ibo-ibog limituí kom muna totok aka kom baḷoi pososambayangan bo inta totok doman mo'ibog hormaton aka kom pasar.
44 Koboditodon im mo'ikow intau mita im Parisi! Mo'ikow naonda bo kuburan inta diaí pinaisan tangoi inta korita-ritakan makow in intau ta'e diaíbií kino'ta'auan monia kong kuburbií intua."
45 Tobatuí mototunduí kon agama noguman ko'i Yesus nana'a, "Pak Guru, singog i Pak Guru tua im moko'po'oyakbiímai ko'inami!"
46 Ta'e ki Yesus notubag, "Koboditodon doman mo'ikow inta mototunduí mita kon agama, sim mo'ikow im mogaid kon atorang mita inta mobogat aidan, ta'e mo'ikow tontanií in doiíbií dumudui kon atorang tatua.
47 Koboditodon im mo'ikow! Sim mo'ikow in nogaid kong kubur in nabi mita inta sinokolimod im mogoguyang monimu.
48 Baí kota'auan monimu, oaíid monimu tatua, noginsilangbií kon intau, kom mo'ikow in nosotuju kon onu inta inaidan im mogoguyang monimu. Sim mogoguyang monimu in nolimod kon nabi mita tatua bo mo'ikow in nogaid kong kubur monia.
49 Tuamai hikmat i Allah noguman nana'a, 'Aku'oi mopotabaí in nabi mita bo rasul mamangoi ko'i monimu; ibanea in limodon bo ibanea doman im pogutuíon!'
50 Tua inaidan i Allah simbaí intau mita masa na'a hukumon sim pino'limodan inta inaidan kom bayongan nabi nongkon wakutupa in dunia na'a inaidan,
51 Pinangkoipa kom pinolimodan ko'i Habel nodapot im pinolimodan ko'i Zakharia inta ilimod kon sigad im meja pobobogoian kon sosumbah bo Baḷoi Tuhan. Popirisayabií: Intau mita masa na'a pastibií kon hukumon sin lantaran oaíid mita tatua.
52 Koboditodon im mo'ikow mototunduí mita kon agama! Sing kokunsií pobukaí kom pongotahuan sinaguídon ko'i monimu, ta'e mo'ikow tontanií in diaí mo'ibog tumuot kom bonunya sim motayak kom pongotahuan tatua. Sedang bo mo'ikow in tongaíbií mobalií ḷonggai kon intau mita inta moramiji tumu'ot kom bonunya!"
53 Bo naonda ing ki Yesus nonaḷaímai kon tampat tatua, intau mita im Parisi bo mototunduí mita kon agama sinumoruí totok. Mosia umuran monarukira makow ko'i-Nia bo kopia mopoliboí-liboí kon yagi-yagi.
54 ḷoliboí monia tua in tongaíbií potayakkan monia kon taḷaí i Yesus, simbaí oyuíon im baliíon monia dodoyonan podomokan ko'i-Nia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA