1 Ki Paulus noginturus kom bobayaíannya. Sia minayak in Derbe bo Listra. Kon tua oyuíon tobatuí dumodudui i Yesus inta ki Timotius in tangoinya. Ki inaínya intau in Yahudi ta'e nopirisayadon ko'i Yesus; ki amaínya intau in Yunani.
2 Kon sigad in intau mopirisaya inta nogutun kon Listra bo Ikonium, kinota'auan monia kong ki Timotius tua intaubií mopia.
3 Tuamai ki Paulus no'ibog nodia ko'inia takinnya. Daí pinokisunatnya ing ki Timotius, sin intau mita in Yahudi kon tua nonota'au kong ki amaínya intaubií in Yunani.
4 Kom pomuḷoi ing kotaí inta pongandupan monia, ki Paulus bo ki Silas mopota'au in onu inta ain nobalií kaputusan wakutu in rasul bo itoi mita in jama'at nosidang kon Yerusalem. Mosia nononggina kon intau mita mopirisaya kon tua simbaí umuran dumudui kon atorang mita tatua.
5 Daí pirisaya in jama'at umuran modugang moropot, bo jama'at kobarong-kobarong domandon.
6 Ki Paulus bo ki Silas diaí inogoi in Roho i Allah mopoyaput in Habar Mopia kom propinsi Asia. Daí mosia nopobayakdon kon daerah im Prigia bo Galatia.
7 Naonda in no'iyaput kon sigad im Misia, mosia nonungkuḷ sinumu'ot kom propinsi Bitinia, ta'e diaí inogoi in Roho i Allah.
8 Daí sinumurus kom Misia bo baya-bayak in Troas.
9 Nodoḷom monag, kon Troas, ki Paulus noko'ontong kon tobatuí o'ontongon. Kom bonu in o'ontongon tatua sia noko'ontong kon tobatuí intau im Makedonia sinimindog kon tayowonnyamai bo totok in nopo'igum simbaí mosia mayakpa im Makedonia motuḷung ko'i monia.
10 Naonda in noko'ulií kon o'ontongon tatua, baya-bayak nobasadia ing kami sim mayak im Makedonia. Sin nopirisayabií totok ing kami kon ki Allahbií in nopotabaí ko'inami mayak intua mopoyaput in Habar Mopia kom bayongan intau kon tua.
11 Daí kami sinumakoidon kon uangga nongkon Troas minayak in Samotrake, bain nopo'ikoḷommai kon singgai bo minayak in Neapolis.
12 Nongkon tua kami minayak im Pilipi, kotaí inta muna-munamai oyuíon kom Makedonia. Pilipi na'a in jajahan pomarentah in Rum. Kon tua kami nogutun tongonumai nosinggai.
13 Kon singgai in Sabat kami minayak im bingkií in tubig kon ḷuai ngara ing kotaí, sing kinota'auan nami kon oyuíon baḷoi pososambayangan intau Yahudi kon tua. Bo ilimituípa ing kami noyosingog makow im bobay mita inta noyosipun kon tua.
14 Tobatuí kon sigad monia tua intau inta mopopotaḷui ing kaeng nopars. Ki Lidia in tangoinya. Sia intau nongkon Tiatira inta totok motoindudui ko'i Allah. Tuamai iliai i Tuhan ing ginanya simbaí tarima'annya onu im pinota'au i Paulus ko'inia.
15 Daí mosia tobaḷoian nodait binaptis. Naonda in nopaḷut binaptis, inoiniínya ing kami poḷat noguman in sia, "Aka rasa'anmai ne utat mita kon aku'oi in totu-totu'u bidon mopirisaya ko'i Tuhan Yesus, daí koligai mongandupa kom baḷoiku." Totoknya im pakisa'an simbaí duduianpa nami in o'igumnya tatua.
16 Kon singgai tobatuí doman, wakutu ing kami minayak in tampat pososambayangan tatua, kami noyodungkuḷ in tobatuí bobantung bobay. Bobay tatua kinawasaan in dimukud mora'at bo inta moramalmai kong kobobiag in intau. Oaíidannya tatua nodia kong ka'untungan moḷoben kon intau inta pinobantungannya.
17 Bobay tatua dumuduianmai ko'i Paulus bo ko'inamidon komintan bo sindaḷan momaḷuí, "Intau mita tana'a simpaḷbií mita i Allah Inta totok im Moḷantud! Mosia mamangoi mopota'au in daḷan kasaḷamatan ko'i monimu komintan!"
18 Tongonumai degaí nosinggai im bobay tatua umuran momaḷuí natua. Diaídon nokotahang ki Paulus mokodongogmai kon pomaḷuíannya natua daí binobuinya bo polat noguman kon dimukud tatua, "Podoyon kon tangoi Yesus Kristus aku'oi moguman ko'inimu ḷuaidon nongkon bobay tanion!" Daí kon dodaipa doman tatua iḷumuai in dimukud mora'at tatua nongkon bobay tatua.
19 Naonda im bobay mita inta pinobantunganmai im bobay mororamal tatua nokota'au kon diaídon im bobay inta nobalií harapan monia ko'uliían kom ponghasilan mobayong, daí dinomok monia ing ki Paulus bo ki Silas bo dinia monia pinobayak im pasar pinotayow kom mongongawasa kon tua.
20 Mosia dinia monia pinotayow kom pomarentah in Rum bo noguman, "Taya dua na'a intau in Yahudi. Mosia umuran mongacau kong kotaí naton.
21 Tongganutan monia im bayongan intau dumudui kon adat monia inta diaíbií notongkai in atorang mita naton, intau in Rum. Kita in diaíbií mota'au dumudui andeka motarima kon adat mita natua!"
22 Intau moaíntoí kon tua sinumakin doman moponapud in uboḷ ko'i nayadua tua. Daí pomarentah mita tatua nomera-merak kon ḷambung nayadua poḷat pinoki sambok kon intau mita kon tua.
23 Naonda im mosia sinambok totok, pinotu'otdon monia kom ponjara in taya dua tatua. Itoi im ponjara totok in dinandi kom baí kopira'an totok im moḷukad kon rasul doyowa tatua simbaí diaí mokoḷuai.
24 Lantaran parentah tatua, daí pinobonu itoi im ponjara tatua kon ruangan inta kon yuaí-yuaík bo inumantungan in taya dua tatua.
25 Ta'e naonda in no'onggotdon kon doḷom ki Paulus bo ki Silas nosambayang bo nomanyanyi nodayow ko'i Allah. Daí bayongan intau kom ponjara tua nodait nokodongog.
26 Daliíbií bo nobalií in linug inta totok im moropot nodapot pondasi im ponjara tatua nodanduí doman. Bayongan ḷolingkop nobukat bo rante mita inta pinotogot kom bayongan intau inta pinonjara nongobukaí.
27 Daí no'italikokog bo no'i bangon itoi im ponjara tatua. Naonda in noko'ontongmai kon nongobukatdon mita in ḷolingkop im ponjara tatua, nogamaídon in sia kom pitow sin simimpatoi, sing kainiakamai bayongan intau inta kom ponjara tatua nodait bidon noḷagui.
28 Ta'e ki Paulus nomaḷuí noguman, "Dika simimpatoi! Sing kon na'apabií komintan ing kami!"
29 Itoi im ponjara tatua no'igum kon togaí bo binayaknya sinuaian bonu im ponjara tatua. Gugur makow in sia bo no'itungkud kon tayowonmai i Paulus bo i Silas.
30 Daí dinianyadon pinobayak in ḷuai taya dua tua bo noguman, "Tuang, onu degaí im musti pomia'anku simbaí mosaḷamat in aku'oi?"
31 Daí tubag i Paulus bo i Silas ko'inia, "Popirisaya ko'i Tuhan Yesus! Mosaḷamatbií in ikow -- mo'ikow tobaḷoian!"
32 Bo pinopota'auandon i Paulus bo i Silas kon Habar Mopia im mosia motoḷuaídií.
33 Kon doḷompa doman tua bo dinia itoi im ponjara tatua mosia bo dinaritan ing kekeb mita monia. Daí sia bo bayongan intau inta kom bonu im baḷoinya baya-bayakdon binaptis.
34 No'iduduimai kon tua itoi im ponjara tatua nodia ko'i Paulus bo ko'i Silas minayak im baḷoinya bo mosia inoḷudan ing ka'anon. Sia takin bayongan koluarganya totok nopia ing gina monia sim mosia tana'a nopirisaya ko'i Allah.
35 Naonda in doḷo-doḷom, pomarentah in Rum nopotabaí im pulisi minayak im ponjara mopoyaput im parentah simbaí bulian ing ki Paulus bo ki Silas.
36 Daí pinoyaputdon itoi im ponjara tatua ko'i Paulus im parentah tatua, kainia, "Tuang, intau mita moḷoben kon Rum aindon nobogoi im parentah kon tai tuang im buliandon. Daí mota'au bidon mobui in tana'a makow. Bayakdon bo mokopopiadon kon daḷan!"
37 Ta'e ki Paulus noguman kon intau inta pinotabaí monia tatua, "Kami na'a intaubií doman in Rum. Diaípa kinota'auan monimu ing kami mongo no'itaḷaí andeka diaí, ta'e kami sinambokdon muna monimu kon tayowon intau moaíntoí bo pinobonu kom ponjara. Bo tana'a mosia mopotabaídon ko'inami mayak takin umuni- uni? Doiíbií ing kami natua! Potabaídon mangoi kon na'a im pomarentah mita tatua bo momuli ko'i nami."
38 Daí pulisi mita inta pinotabaí tatua minayak noguman kon soaáḷ tatua kom pomarentah mita in Rum. Naonda im pomarentah mita tatua nokota'audon kong ki Paulus bo ki Silas intaubií in Rum, mosia inagiíandon in ondok.
39 Bo mosia minayak nopo'igum ma'ap ko'i Paulus bo ko'i Silas, poḷat pinoḷuaidon monia kom ponjara tatua mosia bo ḷagi pinarenta'an kom baí monaḷaímaidon kong kotaí tatua.
40 Ki Paulus bo ki Silas nonaḷaímaidon kom ponjara tatua bo minayak im baḷoi Lidia. Naonda in noyodungkuḷdon in intau mita mopirisaya kon tua mosia nonongginapa ko'i monia, onda intua ki Paulus bo ki Silas minayakdon nongingguput kom bobayaían monia.

Studi Alkitab lengkap, silahkan lihat Alkitab SABDA :: Kisah Para Rasul 16
Studi Alkitab mobile, silahkan lihat Alkitab Mobi :: Kisah Para Rasul 16

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke