¹ Alapsa de taibliblanna, zen anakan de enho nakon taibliblankam, “Mensa Alap asa gu-gubluka, zen eiwa kirekam sa ki lwal.” Zen sap nwekam de hlaun sremkam de kirekam taibliblan.
² Sap orep de zini zen kirekam Alapsa daibli gweblak, zen zep Alap anakan sam gwesibiridaka, “Zen ere mo nwenak edakastiꞌin.”
³ Alapsa de taibliblankam zen dekame anakan tame ul gwenan, “Okamana an Alap ol-gun enkam yang gulsuku.” Zep men desae nwekam hla kul gweꞌan, Zen nwekam de hlaul gwen kire-kire nakon hom yang gulsuku.
⁴ Habel Bak zen Alap hap zere mo taibliblansa goltreblaka– in kim dombana tru ta seblakaye. Hwena Kaen zen hom Habel mo kim Alapsa taibliblaka, zep zeno kim syal gwe srem gweka. Habel ensa zep anakan gubluka, “Zen ano nwenak man dakastiꞌira.” Hen Zen zep zeno en mo syala insa sam gwesibir-blika. Habel zen sap orep mes tilki, hwena zeno Alapsa de taibliblanna in nebe mae hap erak makan nama lwazimꞌin.
⁵ Hanok Bak zen hen kirekam Alapsa taibliblaka, zep tin sremnak Alap ngatan zi mo lang san dep zer ine halka. Zep Alap mo olak zebe hap dena anakan lwak, “Zen mumuk ennak aya gweka, sap desa Alap zer ine halka.” Mae hap ki lwak: Sap zer inehan sremnak Alap man desa sam gwesik gweblaka.
⁶ Zen zep dam gwesinin: Zini bejen Alap mo nwenak sam gwesin– Zenaka de taibliblan sremkamye. Zep zini men zen Alap osan dep edwam gwe-gweꞌan, zen diki nonol Alapsa zen anakan taibliblan, “Zen eiwa ki gweꞌara,” hen anakan zen taibliblan, “Ëye Desa tingare enho naban te gweblaꞌak, Zen sa abe hap dawemsa gol gweblala.”
⁷ Nuh Bak hen Alapsa taibliblaka, zep bulu insa syal gwibirki– dekam de we wal walas zeban golengaya gwen hapye. Hwena kirekam de owasna hom sap menkam hla nuk. Hwena Nuh Alapsa betek gweblaka, zep zere mo ol en san ang gweka. Hwena zere mo Alapsa de taibliblanna in kon zep sap taibliblan srem wenya kip anakan goltrei gwizimki, “Em in kareksae ol gwenan.” Zen taibliblanna in kon zep Alap mo nwenak dakastilki.
⁸ Abraham Bak hen kirekam Alapsa taibliblaka, zep zeno ol san ang gweka. Alap dekam man gubluka, “Emki ere mo langna insa hli yun. Dekam song gwe– langna men desae ebe hap golblaꞌak, zewe dep.” Abraham dekam man taibliblaka, zep totoresa tawa sremkam song gweka.
⁹ Kim hataka, langna men zao dep Alap gu-gubluka, dekon hen nama taibliblaka. Zen zep zewe zi mo langnak tenda golak gwe nasen gweka. Isak ne Yakob ne zen hen kirekam e gweka, sap Alap hen desa kirekam gu-guzimki– men kirekam Abrahamsa gu-gublukake.
¹⁰ Abraham kirekam ze gwe nasen gweka, sap zen dekam ngein sin dep dena kip anakan taibliblaka, “Ëe asa hendep de e sam-samnak hatal– men desa Alap Zena syal gweblakaye.”
¹¹ Zen man hen Alapsa taibliblaka, zep hendep walas gweka. Zen sap mes bogol gweka, hen we zem Sara hom walas gwe-gwek. Hwena Abraham anakan Alapsa taibliblaka, “Mensa asa walas we lan hap gu-guzimki, zen hendep kirekam sa ki abe nikip syal gwibir-zimdi.”
¹² Zeno timni man sap tin makan lwablaꞌak, hwena zi ausuna Israel zen zebon onakon ki beya gwe song gwek– men kirekam Alap hamal hap gu-gublukake, “Ebon onakon sa zini beya gwe song gwer– san de nglinak de keisni kiye, ahaksa hi alpnak de hisglimni kiye.”
¹³ Orep de zini in, zen sap man Alapsa daibli gweblak, hwena Alap mo gu-gubiridanna insa de sowe henkam gul irin sremnak juwe gwek. Zen langanak de basa kara gun makan kara nul gwek, hwena zep en ki eisrip-sri gwe-gwek– san de zao de lowe henna kiye. Zep anakan hen egu gwek, “Ëe an okamanak awe bohekame ki lowe heꞌan– san de aha zi mo langnak de lowe henna kiye.”
¹⁴ Men zen kirekam egu gweꞌan, zeno mae mo enlalana zep man lwa gwizimꞌira, “Nen ema aha langsa lei gwibiꞌin– desa de hendep denaban bi gwibin hip.”
¹⁵ Orep de auyan-azana in, langna mensa hli nuk, desa hom enlala nei gwibik. Sap kirekam de lwananam, dekam maka etan desan dep lwan dahak.
¹⁶ Hwena zen dekam aha lang sam-samsa enlala nei gwibik– ngatan zi mo langnak de wenyaka. Zep Alap hom saher gwibirida gweka– zini in kim “ano mae mo Alap”kam nen gweblakye. Sap Zen mes eiwa zebe mae hap e sam-samna insa hamal tazimki.
¹⁷ Abraham hen zere mo Alapsa de taibliblansa goltreblaka, zep tane aha-ere zem Isaksa sap Alap hap zip soblaꞌanka. Alap man sap dekam zeno eisi anakan akasibir-bliꞌanka, “Zen san ha eiwa tangankam Asa taibliblaꞌara?” Hwena sap mes Alap Abrahamsa anakan gu-gubluka, “Eno walasna an, Isak, zen zebon onakon sa eno auyan-azana naitbir song gwer.” Hwena sap mes kirekam gu-gubluka, hwena Abraham man hohle gweꞌanka– tane aha-ere zem insa de Alap hap zip soblan hapye.
¹⁸ (11:17)
¹⁹ Sap zen man anakan taibliblaꞌanka, “Zen sa ano tanena tin nikon etan ngaya tala.” Hwena dekam kim Alap dombana insa zertreblaka, desa de hwena zip son hap, zep dekam tane zem in man nwe-mase gweka– san de tin nikon de etan ngaya gwenna kiye.
²⁰ Isak hen Alapsa taibliblaka, zep walas dare zem Yakob ne Esau nikip tahana tehazim aneka– anakare hamal hap de ola banye, “Alap sa ngein sin kirekam ebe nikip dawemna gol gwizimdi.”
²¹ Yakob hen Alapsa taibliblaka, zep tin hip kim golek de gweꞌanka, tane zem Yusup mo walas dare hap tahana tehazim aneka. Ki zep hwena zere mo dute topnak de bik dankam lwa inen nakon Alap hap dawemna golblaka.
²² Yusup hen Alapsa taibliblaka. Zep kim tin hip golek de gweꞌanka, dekam zep zere korena Israelsa de Mesir kon gwiswe sonen hap de aisili hli yulzimki. Hen anakan gubiridaka, “An kon de sek gwenkam ano danna bahem awe hli tandan.”
²³ Musa mo ane-biana, zen hen man Alapsa laibliblak. Zen zep Musasa dan-ahare benkam aning la gwek. Sap zen anakan dam lasik, “Walasna an dawem naka Alap ap zerzimki.” Zen zep anakan airi srem gwek, “Mesir mo teipsin nik sa nesa karek sola.”
²⁴ Musa Bak hen Alapsa taibliblaka, zep mam gwennak anakan enlala gweka, “Asa bap zen anakan gu gweblan, ‘An Mesirk de teipsin zi mo wenam mo tane.’”
²⁵ Zen hom dekam auhu-kama ennak dep de derekna anakan enlala gwibirki, “Ëe anik karek naka gol gwek– zeno derek naka akakim eis gwibik.” Zen hwena anakan enlala gweka, “Ëe sap asa Alap mo hlil irin zi niban apdekam karekna zigoltowe gwer.”
²⁶ Zen hen ngein sin denaka anakan enlala gwe-gwibirki, “Alap sa Israelsa de ngaya tabin hip de Zini zer sonera. Zep ee anik Zini in hap orasa sal tablak, hen sap asa zeno bose hap karekna goltowe gwer.” Musa hom dekam anakan enlala gweka, “Syala ansa anik baes gwibik– ee akakim Mesir mo kire-kire dawem-dawemna ansa beyakam bi gweblandak.” Zen hwena Alapsa anakan taibliblaka, “Zen sa ano syal eini lamkam abe hap golblala.”
²⁷ Hen zen Alapsa taibliblaka, zep Israel mo zi ausu nakore zini gubiridaka– zen de domba kalkam zere mae mo lilikinsi blis tiblandan hap, Alap mo dam taha nakore jal zi dikim zeno mae mo nonol zi walassa tameran srem hapye. Yaklana desa “Paska”kam zep nen gwibik. Mesirk de teipsin zini kim sap jal gweka, Musa hwena Alapsa taibliblaka, zep Israelsa airin sremkam dekon golesek gweka. Zen dekam man tatem zauk gweka– san de hla ta gwen srem Zini Alapsa de ngein sin kara ta gwenna kiye.
²⁸ (11:27)
²⁹ Israel mo zi ausuna in hen Alapsa daibliblak. Zen zep hi bosena Kal-kalasa tablan gwek– san de eik sasa san de sek gwenna kiye. Hwena Mesir mo jana nabare zini kim sap hina in san noletro kiniꞌak, zen zao zep kei-king gwek.
³⁰ Zi ausuna in zen hen Alapsa daibliblak, zep tuju yaklakam kim e yala Yerikosa hatablan hap wale da gwek, hwena dekam zep zeno mae mo kasokam de kol son yala in owaskam lik gweka.
³¹ Rahab Bak sap Yerikok de kahalo soson we. Zen hwena dekam Alapsa taibliblak, zep desa nul srem gwek. Sap zen mes dekam Israel kore otek zi darena teisyaink. Hwena zere mo e nakore zi trana in zen Alapsa de betek gweblan hap baes tak, desa tingan en tangan zep damerasik.
³² Sap kirekam de aisili beyana, hwena yaklana blalaka hom– desa de tingan emsa aisil gwibiridan hapye, ahakon in zen hen Alapsa zeno mae mo kim daibli gweblakye, in ki hen Gideon, Barak, Simson, Yefta, Daud, Samuel, hen orep in zen Alap mo ola ayang nulzimnira gwekye.
³³ Zen hen Alapsa daibli gweblak, zep eijannak ahakon eyei-yek gwenda gwek, hen dam-dam enkam zere mae mo irik gin langnak de zini irik nilida gwek. Zep kire wenya, Alap mensa Israelsa gu-gubirida gweka, zen hen man nulin gwek. Zen zere mae mo Alapsa de taibliblanna in dekam zep singa jal-jal mo mipna owas hap mat dasik gwibir-zimk,
³⁴ hen syauk hitin yawala dekam tin disik gwek, hen nebok ngi ben-ben nakon elanga gwesik gwek. Zen sap man zenaka anakan neisbirida gwek, “Ëe an soson naka hom,” hwena man ki esoson gwe-gwek. Aha lang nakore zini kim sap napta gwibirzik, hwena zeno mae mo sosonsa de hlaunkum dekam zep heya-hya gwe-gwek.
³⁵ We walya hen ahakon Alapsa daibli gweblak. Zep zeno mae mo iyena kim sap juwe gwek, hwena zeno mae mo Alapsa de yaing gwebla kinin nakon zep etan engaya gwe-gwek. Hwena ahakon zeno mae mo Alapsa de taibliblansa sren noltre gweblak. Sap desa kim Alap hap de jal hap bwinak sesek nulin gwek, zen hom tol wet so gwe-gwek. Sap desa man ze tangolebin niban nenbirida gwek, “Emki ere mae mo Alapsa lamang tan, dekam asa emsa uswe soner.” Hwena zen man kirekam dep baes tak, sap zen anakan eenlala gwe-gwek, “Zen sap sa nesa damera gwer, hwena Alap sa kire hap de dawemna lamkam nebe mae hap golzimdi– Zen kim de juwen nakon nesa luwen tabiꞌinkaye.” Zep ki hendep Alap hap de jal hap karekkam damera gwek.
³⁶ Zep Alapsa de taibliblan jal hap ahakorena lamang da gwibik, hen ben-ben kire-kirekam lek-lek da gwibik. Hen ahakon besi dokotkam de tahalebin nika bwinak sesek nulin gwek.
³⁷ Ahakon kasokam tok hap niribirida gwek. Ahakon ngaya naka gergajikam blom da gwibik, hen ahakon nebokkam blom da gwibik. Zen tahalha tol hap domba-kambing sop nakore tayalbin pakeansa alala da gwek. Tembane hap hen man tangan etahalha gwe-gwek, sap desa karekkam jap nul sonenda gwek.
³⁸ Kire wenya, zen hendep de langnak de lowehen hap denaka enlala nei gwibik, zep zebe mae hap hom dakastilzimk– auhu-kamanak de lowehe gwen hapye. Zen zep al ta nasen gwek– sap zi srem lang san, hen kwatap-kwatap san, hen kaso-hul kaso-hul san, hen kama hul mae san sap ani-ning gwenda gwek.
³⁹ Zen kitak zere mae mo Alapsa de taibliblansa kirekam noltre gweblak, dekam zep tangan Alap sam gwesibiridaka. Hwena zen hom mae okamanak awe noltowek– Alap mensa dawemsa de golzimdin hip gu-gubirida gwekaye.
⁴⁰ Sap Alap mo dawem golzimdin hip de kalangna in, zen zebe mae en hap hom. Zen hwena kitak neban mae dep. Zep zen molya nonol ze-en Alap mo gu-gubiridanna insa kitak nulink– nen de zewe hen yaing gwen sremnakye. Nen kime ze hen yaing gweꞌak, zen diki dekam esa serkam de dawem tangan wenya insa apdenak ulin.