¹ Zep Musa mo titi tabin ol hap de syala, zen san de au-auna men kiye. Hwena zen dekam de enlala gwibin hip, “Eiwa de tangan wenya sa hatal.” Dekam kim tahun jamkam otweranna Alap hap sap tru dasik gweblanan, hwena dekam enho nakon hom engan gwehe gwenan.
² Titi tabin ola insa de syal gwibinkim de enho nakon engan gwe henanam, ki maka otweransa de tru tasik gweblanna insa nolzausuk. Dekam de anakan neisbirinam, “Ëe mes tangane engan gwehek,” ki zeno mae mo kareksa de gonnak de enlala dowe hananna maka tap gwizimki.
³ Otweranna man ki sap tahun jamkam tru dasik gwek, hwena dekam zere mae mo kareksa de gonnak de enlala dowe hananna hom mae tap gwe-gwizimki. Sap kirekam insa syal neibir tine gwek, hwena zere mae mo enhonak dekam zep anakare enlalana hata gwizimki, “Ano karek-karekna nama Bian mo nwenak lwaꞌan.”
⁴ Sap sapi-kambing kalkam toton bejen zi mo karek-karekna ngan gulsuzimdin.
⁵ Zep Kristus kim okamanak hata zaka Zen anakan Alapsa gubluka, “Em home otweran tru tasik gweblansa dwam gwibiꞌira, hwena Em mese ano timsi hohle gulku.
⁶ Otweransa de ebe hap tru tasik gweblan hap Em home sam gwesik gwibirki– dekam de zi mo karek-kareksa ngan gulsuzimdin hipye.
⁷ Bian Alap, Ëe in zebe Emsa gubluꞌan, ‘Ëe mese angkam okamanak hatanan– eno dwam gwibinsi dikim sul sonen hapye, men kirekam ere mo olak abe hap dena lwakke.’”
⁸ Zep Kristus eiwa Musa mo titi tabin ola tahan san gwei gubir kinika– Alapsa kim anakan gublukaye, “Em home otweran tru tasik gweblan hap dwam gweꞌara hen home sam gwesik gwibirki.” Hwena otweran tru tasik gweblan hap dena in Musa mo olak kirekam am lwak.
⁹ Hwena anakan etan mas gulbluka, “Ëe mese angkam okamanak hatanan– eno dwam gwibinsi dikim sul sonen hapye.” Kirekam de gublunna in, zen man nwe-mase gwek: Kristus Alap mo epba zi niban de ol ziaha-en gunnu insa tahan san gwei gubir kinika– dekam de Bian zere mo dwam gwibin tangan wenyaka zaun gun hup.
¹⁰ Zep nebe mae hap de Alap mo dwam gwibinni, zen a kirekam moye: Nen de aha-rokꞌnen hendep nere mae mo karek-karek nakon engan gwehen hap. Sap Kristus hen aha-rokꞌnen zere mo timni domba makan golguku, hen Zen molya etan kirekam gweka.
¹¹ Alap mo golak de syal ta gwen wenya in kim nonol ol ziaha-en gunnu insa syal nei gwibirin, zen mwin-mwankam zi mo otweran kap gulhal zanna waba hap Alap hap de kalsnak tru dasik tine gwenan. Hwena dekam hom zini anakan neis gwibirin, “Ano karek-karekna mes ngan gwe henan.”
¹² Hwena Kristus Zen domba makan aha-rokꞌnen te-lidak sonnak tilki– dekam de hendep denaban neno mae mo karek-kareksa ngan gulsuzimdin hipye. Kirekam kim nebe mae hap de Alap mo golak de Teipsin Zini in syal gwibirsiki, Zena dekam zep Alap mo dam taha nakon nikinki.
¹³ Zen angkam nama dekon eissiꞌira– hendep Alap de tingare zeno jal zisi zeno tana iltikinnik sisik gul irinnik dep.
¹⁴ Zep Zen kim domba makan aha-rokꞌnen tilki, Zen dekam tangan zep hendep denaban karek-karek nakon nesa ngan tasibirki– tingan men desa Alap osan dep zon guludaꞌaraye.
¹⁵ Alap zere mo Enhona hen man eiwa guꞌura, Zen zep anakan guku,
¹⁶ “Ngein sin insa etan ola ziaha-en guꞌuk, Ëe asa zeno mae mo enhonak titi tabin ol esena ale gulzim. Zen zep sa desan en aha-ere enlalakam ang ta gwer.”
¹⁷ Zen dekam hen anakan mas gulku, “Ëe asa zeno mae mo karek-karekna tap gulsuzim. Dekam molye etan zeno mae mo karekna enlala gwe-gwibik.”
¹⁸ Zep neno mae mo karek-karekna insa mes kitak Bian Alap hendep denaban eititi gwibirki, zep nen angkam home edwam gwe-gweꞌan– ba maesa de etan zebe hap tru tasik gweblan hapye.
¹⁹ Zen in zep, aya-wal oso-wal, Yesus in kim domba makan te-lidak sonnak tilki, nen dekam zebe airin sremkam Alap hap nere mae mo abena yaing il gweblanan– zere en tangan hap de teksonnakye. Zep Yesus mes ora esena nebe mae hap sal tazimki– hendep dikim engaya gwen hap de ora naye. Sap in kim zere mo kala ban Alap zere en tangan hap de teksonnak goltilki, Zen dekam zep deyol glaing-glingkim de lilikinni insa talusuku. Zep nen angkam Yesussu de ang gweblankam zebe Alap onak yaing gwe-gwenan, sap zeno timni zen san de nebe mae hap de lilikinni kiye.
²⁰ (10:19)
²¹ Zep angkam nebe mae hap Alap mo golak teipsinkim Yesus Zen gweꞌara.
²² Zen in zep, nen Alap hon yaing gwe-gwen, sap nen ema tingare enho naban Kristus en hon eyaing gwe kini gweꞌan. Sap nesa mes Kristus zere mo kalkam blis tibiridaka, hen tim niban enho naban mes ho lalakkam nesa ngan tasibirki. Zep angkam neno mae mo enho nakon anakare enlalana hom wet so gwenan, “Ano karek-karekna nama Bian mo nwenak lwaꞌan.”
²³ Zep nen anakare enlala naban nen tatem ezauk gwen, “Alap zere mo nesa de gu-gubiridanna Zen sa hendep kirekam nebe mae hap golzimdi, sap Alap Zen taibliblan tanganna.” Sap nen kirekame aha zi hon ekira gwe-gwenan, zen in zep nena hen zewe en nen tatem ezaun.
²⁴ Zen in zep nen enlala naban lowehe gwen– ekakim nenaka titi la gwibik, nenaka de kwasang gwibirida gwen hap dena kim, hen dawemsa de tingare zi hip gol gwizimdin hip dena kim.
²⁵ Hen Kristen zi de tagal gwennak de ang gwen hap bahem baes ta gwen– men kirekam ahakon egwe gwenanye. Hwena nen nen nenaka titi ta gwibin, hen kareksa de gon hap nen nenaka jalse gwibirida gwen, sap Bian de hatan hap de yaklana angkam man tangan golek de gweꞌan.
²⁶ Zen in zep, nen nenaka dawemkam titi ta gwibin. Sap nen mese eiwa de orana dam lasik. Hwena kire nike eirim kareksa ol gweꞌak, dekam etan nara molya neno mae mo karekna insa ngan gulsuku.
²⁷ Hwena kire nike kirekam egweꞌak, dekam aha-en tangan nebe mae hap lwazimꞌin: Zen serkam de syauk bla sal-salak de etaiblin hap dena– men zewe sa Alap zere mo jal zini yal gul serake, desa de airin niban esblan hap dena.
²⁸ Emki sap eenlala gwen: Musa kim irik gilki, dekam ahanik de zere mo titi tabin ol san ang gwen hap baes gwenkam, desa man damera gwek. Zi de dan ahaksa dan-ahan anakan ekira gwenkam, “Zini in eiwa mes kirekam karek gweka,” kirena man damera gwek. Dekam kire zisi hom kwasang neibirida gwek.
²⁹ Sap kirekam insa orep neibirida gwek, zen in zep men zen angkam Alap mo Tanena ansa tanakam nyauk gweblaꞌan, zebe mae hap banakan sa lwazim? Sap zeno kala mes desa dikim ngan tasibin hip hlewehek. Hwena kire zini Yesus mo kala insa asyas makan enlala nei gwibirin. Zep zen hen Alap mo zi niban de ol ziaha-en gun esena in san de ang tan hap man baes taꞌan. Zep hen Alap mo Enhona man lamang da gwenan, hwena Zen sap diki Dekon Alap mo kwasang-kwasangna tame nul gwenan.
³⁰ Zep kire zi hip, karek tangankam sa lwazim. Sap nen ema Alapsa tame laꞌan– men Zen anakan gukuye, “Kareksa de syal gwe-gwibin wenya zen Aen asa desa karek tabir. Ëe asa zeno mae mo syal eini zebe mae hap golzim.” Zao hen man mas gulku, “Ëe asa ere mo hlil irin zisi klis gul.”
³¹ Zep nen bap nen Alap mo Tanena tanakam zauk gweblan, sap nen de Ngaya Zini Alap zere mo jalsa goltowenkam, zen airi gwibin tangan wenya zen.
³² Bahem eeititi gwe-gwen– em kim nonol Kristussu eirink hen zeno ngatanna hla kukke. Emsa dekam man aha zi serkam karek da gwibik, hwena em zao ene ki tatem ezauk gwek.
³³ Emsa dekam zi nwenak swre da gwibik hen dangole gwibik. Hen ahasa kim kirekam neibirida gwek, hwena em ema desa airin sremkam mas eibirida gwek.
³⁴ Emsa kim ahakon bwinak yal nulne gwek, em hwena ahakore wenya embwan hap gosae labirida gwek. Kristus hup de jal hap kim eno mae mo kire-kirena kitak alal da gwek, em hwena ema eisrip-sri gwe-gwek. Sap em ema dekam eenlala gwe-gwek, “Ëe asa ngein sin dawem tangan wenyaka goltower– hendep de lwa gwen hap denaka.”
³⁵ Zen in zep, men kire enkame Yesussu de yaing gwebla kini gwennak tatem ezauk gwek, zen kire enkam emki hendep lowehe gwen. Ki dekam Alap onakon dawemna mam tangan naka esa ulin.
³⁶ Zep kire enkam em tatem ezauk gwen, sap zen dekam esa Alap mo ebe mae hap de dwam gwibir-zimdinni su kul sone gwer. Hendep zep esa zere onakon ulin– men zep emsa gu-gubirida gukuye.
³⁷ Sap Alap mo olak man lwak, “Zini men Desae kara e gweblanan, Zen naba tangankam sa hata zala. Zen molya zere mo hatan hap de yaklana esek gulku.
³⁸ Zini men zen ano nwenak edakastil gwenan, zen Asa de taibliblan en nakon sa ki engaya gwer. Hwena Asa de taibliblan wenya men zen Asa hli daꞌak, Ëe hen asa desa tahansa gweisibiridal.”
³⁹ Hwena nen molye Biansa hli lak– juwen ora san de etan lwan dahan hapye. Sap nen an zen– tatetekam de Biansa taibliblan wenya, hen hendep de engaya gwen hap de wenyaye.