Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ta’ abit saellana jareya, maske Rato Ahasyweros la ta’ duka pole, tape gi’ terros emot ka tengkana Dinaju Rato Wasti sarta potosan se la ekalowarragi salerana.
2 Daddi para panasehat se semma’ ban rato ngatore rembak kantha reya, "Langkong sae junandalem enyareyagi ban-paraban se raddin.
3 Junandalem kodu ngangkat ponggaba e sadajana propinsina karaja’an ka’dhinto, pakon nyare ban-paraban se raddin, sadajana pakon bakta ka kapotren e binteng Susan ka’dhinto. Ban-paraban e kapotren gapaneka pakon oros ka Hegai, ponggaba se ngapalae orosan e kapotren, pakon rabat sopaja raddinna.
4 Saamponna ka’dhinto, junandalem mele paraban se menorot pamanggiepon junandalem paleng sae, pondhut badhi dinaju rato menangka ganteepon Dinaju Rato Wasti." Rato narema rembak jareya, laju elampa’agi.
5 E bakto jareya e kottha Susan badha oreng Yahudi nyamana Mordekhai ana’na Ya’ir, toronanna Kis ban Simei dhari suku Benyamin.
6 Mordekhai etawan bakto Yerusalim epakala Rato Nebukadnezar, rato Babil, ebuwang ka Babil epabareng ban Yoyakin, rato Yehuda sarta tawanan laenna sabannya’na.
7 Mordekhai jareya andhi’ sapopo, ana’na taretanna ramana; sapopona jareya babine’, robana raddin, badanna bagus, nyamana Ester; Ester jareya nyama Ibranina Hadasa. Oreng towana Ester la padha seda, daddi pas ekala’ ana’ bi’ Mordekhai, epeyara epakantha ana’na dibi’.
8 Saellana parentana rato rowa eomommagi, bannya’ paraban epakompol e Susan; Ester tamaso’ keya. Ban-paraban jareya egiba ka karaton, eparcaja’agi ka Hegai, kapalana orosan kapotren.
9 Hegai kasambu’ nangale’e Ester, sarta pas lebur ka kana’ jareya. Paraban jareya pas duli erabat sopaja sajana raddin sarta eberri’ kakan se epabida dhari se laenna. Ester ealle ka bagiyan se paleng mewah e kapotren jareya, esoro ladine ka babine’an se paleng cakang dhari karaton, bannya’na kapetto.
10 Ester atoro’ ka babala’anna Mordekhai, ta’ ala-bala ja’ aba’na oreng Yahudi.
11 Sabban are Mordekhai lan-jalanan e palataran e adha’na kapotren jareya terro taowa baramma kabadha’anna Ester ban ba’ baramma’a daddina kana’ jareya.
12 Menorot atoran, babine’an jareya erabat sopaja sajana raddin sampe’ sataon abidda: nem bulan abidda erabat ban mennya’ se ecampore mennyan, saellana jareya nem bulan aggi’ ngangguy mennya’ ecampor om-ro’oman se laen. Saellana jareya, saneyap paraban olle giliran ngadhep ka Rato Ahasyweros.
13 E bakto settong paraban epangadhebba ka rato, olle ngangguy apa’a bai menorot kasennengnganna.
14 Paraban jareya egiba ka karatonna rato e baja malem, kalagguwanna pas egiba ka karaton laen; e jadhiya eoros bi’ oreng se anyama Sa’asgas, ponggaba se kusus epangoros para sellerra rato. Babine’ jareya ta’ ebagi ngadhep rato pole, kajabana mon rato dibi’ kasokan ban adikane babine’ jareya, se esebbuttagi nyamana.
15 Sateya napa’ giliranna Ester se ngadhebba rato. Ester reya ana’na Abihail, ekala’ ana’ sapopona dibi’ se anyama Mordekhai; Ester ekaleburi sapa’a bai se nangale robana. E bakto ngadheb ka rato, Ester ta’ mamentane pa-apa; se eangguy coma menorot petoduna Hegai, kapalana kapotren.
16 Ester egiba ngadhep ka Rato Ahasyweros e karatonna e taon se kapeng petto’ pamarenta’anna Rato Ahasyweros, teppa’ e bulan sapolo, iya areya bulan Tebet.
17 Rato lebur ka Ester alebbi’i paraban en-laenna; panggaliyanna ce’ sennengnga. Daddi Ester paleng ekataresnae bi’ rato; Ester jareya laju epangangguy jamangnga karaja’an. Ester pas epadaddi dinaju rato, epagante Dinaju Rato Wasti.
18 Saellana jareya, rato pas mabadha pesta raja menangka panghormadan ka Ester; ba-ponggabana sarta om-kaom oreng agungnga eonjang kabbi. Rato ngomommagi are libur ka saantero karaja’anna sarta gi-magi hadiya se talebat bannya’na.
19 Sabatara jareya bi’ rato Mordekhai la epadaddi ponggabana nagara.
20 Ester gi’ ta’ abala ja’ aba’na oreng Yahudi, sabab bi’ Mordekhai ta’ ebagi. Ester atoro’ ka oca’na Mordekhai akantha gi’ kene’na e bakto epeyara sapopona jareya.
21 E settong are, e bakto Mordekhai teppa’na alako e karaton, badha ponggaba karaton kadhuwa, se lakona malolo ajaga labang se ka kamarra rato, nyamana Bigtan ban Teres; se kadhuwa jareya asakongkel mateyana rato, sabab ce’ baji’na ka Rato Ahasyweros.
22 Rancana jareya ekataowe bi’ Mordekhai; bi’ Mordekhai ekabala ka Ester, dineng Ester laju mator ka rato sabarang se ekataowe Mordekhai jareya.
23 Parkara jareya eoros, ban reppodan jareya nyata pajat bendher onggu. Se kadhuwa jareya eokom gantong. Menorot parentana rato, kadaddiyan jareya ecathet e dhalem ketab sajarana karaja’an.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA