1 Ki utatku ki Gayus inta kotabiku! Aku'oi, tobatuí itoi in jama'at inta totu-totu'u motabi ko'inimu,
2 umuran makow mopo'igum doaí ko'i Allah simbaí ki Utat tantuípa mosehat bo bayongan inta mopia tantuípa doman umuran moyotakinmu, naí doman onda bo ginamu inta umuran mopia.
3 Noḷunganga totok ing ginaku wakutu in nokodongog kon o'uman in tongonumai intau Keresten inta namangoi ko'inakoí. Mosia nongonguman kong ki Utat totokbií i motoindudui kom bayongan inta kino ibog i Allah. Kinota'auankubií kong ki Utat in umuranbií mogaid kon inta mopia naí inta sinunduí i Allah.
4 Aka ko'inakoí, diaíbií im poliu kon ḷunganga ing ginaku wakutu in nokodongogmai kong ki adiíku mita umuran nobiag no'idudui kon onu inta sinunduí i Tuhan.
5 Utatku! Mopiadon totok onu inaidanmu ko'i utat mita inta tumpaḷa Keresten; umpakah utat mita inta diaípa nogoginta'auanmu, ta'e binantunganmubií doman.
6 Tabimu tatua ain ino'uman monia kon jama'at inta pinogutunanku makow tana'a. Natua ule, tuḷungaibií im mosia podudui onu inta kino ibog i Allah, simbaí mota'aupa im mosia mogingguput kom bobayaían monia.
7 Sing kom binaya'an monia mogaid kon oaíidan i Kristus, mosia diaíbií motarima kon totuḷung onukadon nongkon intau mita inta diaí nonota'au ko'i Allah.
8 Sin tuamai, kita intau mita ing Keresten musti motuḷung kon yobayat mita tumpaḷa Keresten inta naí tatua, simbaí kita mo'itakindon moramiji mopohabar in totunduí inta no'itutui nongkon i Allah.
9 Aku'oi ain nokidia in surat kon jama'at umpakah tongaí nopoḷok, ta'e ki Diotrepes inta mo'ibog mobalií itoi kom bonu in jama'at, doií dumudui kon onu inta pinogumanku.
10 Tuamai, aka aku'oi mamangoidon, yo daitonkudon o'umanon im bayongan inta pinomianya, inta kopiadon mongonguman kon soaáḷ mita uboḷ sim mopora'a-ra'atmai ko'i nami! De'emanbií doman tongaí tua im pinomianya, sing kowakutu ing ki utat mita naton tumpaḷa Keresten namangoi, doií in sia notarima ko'i monia. Sedang bo ilarangnyabií in intau mita inta mo'ibog motarima kon utat mita tatua, nodapot im pinoḷuainyadon in intau mita tatua kom bonu in jama'at!
11 Utat inta kinotabiku, dona'ai dumudui kon oaíid mita inta diaí mopia. Duduiaidon onu inta mopia. Intau inta mogaid kom mopia ing kapunya'anbií i Allah. Bo intau inta mogaid kon inta mora'at diaípabií nonota'au ko'i Allah.
12 Komintan intau nomuji ko'i Demetrius. Ki Allah tontanií nomuji doman ko'inia. Sia pinuji domandon nami, bo kinota'auan bidon i utat kon onu im pinota'au nami na'a mota'aubií pirisaya'an.
13 Mobayongbií im paraḷuku poguman ko'inimu, ta'e mopia-piabií kon de'eman tongaí pongin surat.
14 Haraponku makow tua ḷagidon moyodungkuḷmu, bo kita mongonguman moyogintayowan makow. (1-15) Po'igumon makow tua tantuí barakatan i Tuhan ing ki utat. Yobayatmu mita inta kon tampatku na'a nokidia doman in salam ko'inimu. Poyaputpa doman in salamku kon yobayat mita naton tumongo batuí.

Studi Alkitab lengkap, silahkan lihat Alkitab SABDA :: 3 Yohanes 1
Studi Alkitab mobile, silahkan lihat Alkitab Mobi :: 3 Yohanes 1

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke