¹ Ano dang tininak de walasna Timotius Bak hap, Paulus onakon: Dawem! Zen Alap mo dwam gwibin sin ki lwak, zep kirekam Kristus asa dam tasiki– dekam de hendep de gwen hap de ol dawemsa gol halada gwen hapye, men kirekam Alap gu-gubiridakake, Kristus Yesus hon de engaya gwen hap dena. Nere mae mo Bian Alap ne Bian Kristus Yesus ne sa kwasang-kwasang zemka mam tangankam ebe hap ol gweblala. Hen em zere nik mo taha terenak esa gwe gwera.
² (1:1)
³ Em kim Kristussu taibliblaka, dekam zebe gweka– san de ere mo walas we tan tangan. Ëe in zebe ebon onakon hen-henkam Alap hap dawemna gol gweblanan, hen zebe yaklam denaban kam denaban ebe hap Biansa abe ta tine gwenan. Sap ee hen ere mo auyan-aza osane ang gwe-gwenan, in zebe alp gwe tine gwenan– enho kles gwesin sremkam de Alapsa abe ta tine gwenkamye.
⁴ Timotius, ee namae eno nwe go-hona enlala gwe-gwizimꞌin– men kime aban syak eꞌanka, dekam denaye. Ëe in zebe tangan emsa de etan zertowen hap dwam gwe-gweꞌan, sap zen dekam tangan sa ano isrip-srina taman kinil.
⁵ Hen ee mae habe ebon onakon Alap hap dawemna gol gweblanan: Sap ee mese eno enhona anakan tame tak, “Zen eiwa tangankam Yesussu taibliblaka. Ëk enkam hom.” Eno anena Yunike hen we abuna Lois Bak zen hen kirekam laibliblak, in zebe em hen zeno nik mo kim taibliblaꞌara.
⁶ Zen in zebe emsa enlala soblaꞌan: Ëe men dekame ep tahana tehabla inek, dekam mensa sosonna Alap ebe hap golblaka, desa em syauk mo kim bubung gul gwen.
⁷ Sap Alap zere mo Enhona mensa nep zer gwizimnira, zen airinni tawa naka hom. Zen soson enna, kwasang-kwasang enna, hen zenaka de zerinik gwe-gwenna. Zep Zen de nebon mae ing gwe henkam, nen kirekam esa hen lowehe gwer.
⁸ Zep bahem saher gwe-gwen– Bian Yesus hup de olsa de tonbirida gwen hapye. Hen bahem anakare hap saher gwe-gwen, “Paulus bwinak gweꞌara.” Sap ee Bian mo ol dawemsa de golasas gwe-gwen jal habe awe gweꞌan. Sosonna mensa Alap nep gol gwizimnira, desa en em blol gwe-gwibin– anakare enlala naban, “Ëe hen sap asa Bian Yesus hup de jal hap Paulus mo kim karekna goltowe gwer.”
⁹ Nen kirekam de enlala naban nen lowehe gwen, sap Alap mes nesa ngaya tabirki hen nesa kwang guludaka– dekam de enho lalak enkam zere en onak lowehe gwen hapye. Nen home banakare maesa syal eibik– dekam de Zen nesa ngaya tabin hip denaye. Hwena zere mo kwasang-kwasang hap ki kirekam nesa kalang gwibiridaka. Zen orep mes nesa kirekam Kristus onakon kwasang gwibiridaꞌanka– men dekam hendep okamana ansa syal gwibir srem gweꞌankake.
¹⁰ Hwena Zen ner hom nep zere mo kwasang-kwasangna insa goltreizimki– nesa de ngaya tabin hip de Zini insa kim zer sonezimkike. Sap nen menkam eine juwen zi mo ora san egwa haꞌak, hwena Yesus zep orana insa tayalsiki. Dekam zep hwena zere mo ol dawemkam nebe mae hap hendep de engaya gwen hap de orana sal tazimki.
¹¹ Asa in zep dam tasiki hen zer soneka– dekam de ol dawemna insa gol halada gwen hap hen tawa ta gwibin hip.
¹² Ëe in zebe karekna goltowe gwenan, hendep angkam zebe bwinak awe gweꞌan. Hwena ee home kire hap saher gwe-gwenan, sap ee mese Biansa tame tak– men Zebone yaing gwe kini gwenanye. Zep ee tawana: Zere mo nganak de syala men zep asa taibliblaka, Zen sa desa kara gul gwera– hendep zere mo lwa halzan yaklanak de hataꞌak.
¹³ Timotius Bak, eno tawa tabinni, zen diki ere mo tawa tabin sin de ang gwek. Dekon bahem golsyalhe gwen. Zep Kristus en osan em dam gwesikhal gwen, dekam eno Biansa de taibliblan hap de enlalana sa mam gwera, hen zeno kim esa aha zisi kwasang gwibirida gwera.
¹⁴ Alap mo Enhona Zen man nesa golelowehe gwenda, zep zeno sosonkam emki dawem enkam ere mo syala insa kara gul gwen– Zen men kire hap emsa taibliblakake.
¹⁵ Ena mese abe hap dena ansa salka: Tingare Asiak de Kristen zini, men zen sap menkam asa bwinak du ne gweblak, zen mes asa hli dasik. Hendep aumwa hap Pigelus Bak ne Hermogenes Bak ne asa hli laka.
¹⁶ Diki Onesiforus Bak Swe, zen en nama maka asa zergwe gweꞌara. Zen hom ano bwinak de gwenna an hap saher gwe-gweka. Hendep zen kim Romak awe hata zaka, zen man asa te gweblaꞌanka, hendep ki zep asa hla taka. Zen man asa sam tasik gwe zaka, hen ano enlalasa ap tatete ta gwebla zaka. Zen diki Bian sa kwasang-kwasangna zeno we wal walas hap gol gwizimdi.
¹⁷ (1:16)
¹⁸ Ena tawana: Zen hen Efesusk dawemkam ano tahana ap zitri so gweblaka. Zep diki Bian Yesus sa zere mo kwasang-kwasangna zebe hap mam gulblula– Zen de etan lwahal zankam.