¹ Aya-wal oso-wal, neno mae mo Bian Yesus de etan lwa halzan hap denakae angkam ebe mae hap ale gulzimꞌin: Dekam nen esa hut tu ane gun hup tagal gwesil. Ëe ama emsa gubiridaꞌan:
² Bahem nabakam enlalana etopse gwen, hen bahem eairin– zi de anakan emsa yasik tabinkim, “Bian Yesus mes lwahal zaka. Nen home tol tame uk.” Zen sap sa anakan egu gwer, “Alap mo Enhona kirekam abe hap ola ing gul soneblaka.” Ahaksa sap sa anakan eboton gwe-gwer, “Paulus kirekam asa tonbiridaka.” Ahaksa sap sa boton ale nabare suratna ebe mae hap anakare ola ban noltrei gwizim, “Paulus kirekam awe ale gulku.”
³ Zi de kirekam emsa yasik ta gwibir zinna, em bahem nabakam etim gul gwen, “In eiwa, mes ki lwak. Nen home tame uk.” Sap Yesus mo yakla yala in na-en molya ki lwak– karek yawal de hatan sremnakye. Zen diki nonol zini beya tangan nik sa Alapsa de betek gweblanna baes tal, hen karek gol gwen zi mo teipsinni sa damnak jowe zala. Zen men desa aumwa hap denak syauk blanak tak da ineꞌakke.
⁴ Zen Alap mo jal zi. Tingare boton alap-alapna mensa zini blikip neisibirida gwenan, hen sap eiwa de Zini Alap Zena, zini in sa kitak desa anakan lamang ta gwibiri, “Zen kitak betekna. Ëe an Zen– teipsin tangan Zi niye.” Hendep Yerusalemk de Alap mo gol mwanak sa nikin zira, hen dekon sa anakan gubiridala, “Ëe an Zen– Alap.”
⁵ Hwena ee mese kirekam emsa tonbirida gwek– in kime nama emsa golelowehe gwekye. Hwena san ha ema eititi eibik?
⁶ Zep ena hen tawana: Ahana man Zini. Zen Zen angkam jal zini in hap orana isin tasibliꞌara. Hwena yaklana mensa Alap jal zini in hap dam tasiblika, zen dekam sa Aha Zini in orana insa kles tyasiblila. Jal zini in dekam sa damnak zenaka zertre zala.
⁷ Hwena jal zini in mo sosonna angkam man aningkim okamanak syal gwe-gweꞌan– dekam de zisi kareksa dikim gol gwen hap yasik ta gwibin hipye. Hwena Alap kim ora isin tasiblin hap de Zini insa zersiꞌinka, jal zini in dekam sa damnak okamanak de zi niban golesyal tala. Hwena zao molya holo gwek, Bian Yesus hen dekam sa zere mo ngatan zi mo lang nakore ngatan naban hata zala. Zen dekam sa jal zini insa ol gu anen enkam timbwas ta zala.
⁸ (2:7)
⁹ Hwena nonol jal zi yala in sa dowal mo kigi mo sosonsa golhata zala. Zen dekam sa serkam de owas-owasna syal gwe-gwibiri– dekam de zi kil ti gwen hap, “An Zen eiwa– Alapye.”
¹⁰ Zini men zen juwen ora san ang ta gwenan, zen zen sa nabakam jal zini in mo serkam de yasik tabinni in san ang tal, sap zen Alap onakore eiwa de ola man nol drak-drak nei gwibirin. De dokwak nulinam, ki zen maka engaya gweꞌan.
¹¹ Zen in zep Alap kire zini gubiridaka, “Zen dikire yasik tabin sin ang ta gwek.” Kire zini zen desan sa ki hendep ang tal.
¹² Zen zep hendep aumwanak, kitak men zen eiwa de ola insa daiblibir srem gwek, hen men zen zere mae mo lowehen karekna derek neisik gwibik, zen sa tingan etimbwas gwer.
¹³ Hwena aya-wal oso-wal, em Bian Yesus mo kwasang gwibiridan wenya. Ëe in zebe golzausun sremkam Alap hap dawemna anakan ol gweblanan, “Ema asa sam tabirki.” Sap Zen mes okamana awe nonol lonesen nakon engaya gwen hap de wenya emsa anakan dam tasibirki, “An zen sa eiwa de ol san ang tal, hen ere mo Enho de ing gwe hebiridankam sa elalak gwesil.”
¹⁴ In zep hendep kirekam lwak: Ëe kime Yesus hup de ol dawemna ebon mae onak olhatak, Bian Alap dekam zep emsa enho nakon Bian Yesus osan dep anakan kwang guludaka, “Haen. Ano Tane mo ngatan zi mo langnak de ngatannak emki lowehen.”
¹⁵ Zen in zep, aya-wal oso-wal, em tatem ezaun. Mensae ekkam ahaksa suratkam ebe mae hap ayang ul gwizimk, desa dawem enkam urensik gwek.
¹⁶ Ëe in zebe nere mae mo Bian Yesus hun Bian Alap han ebe mae hap dikim dawemsa ol gwizimdin hip abe oso gwenan, sap Zen mes nesa serkam kwasang eibiridaka. Zeno nik mo kwasang-kwasang nakon, nen in zebe enho tatetekam anakare enlala naban lowehe gwenan, “Mensa ngein sin dep dena nesa en gubiridaka, nen eiwa kirekam esa ulin.”
¹⁷ Dikire Eirzi-Bia eno mae mo enhona tatete la gwizimk hen sosonna ebe mae hap ol gwizimk. Dekam eno mae mo syala hen ola zeno nik mo nwenak sa dawemkam dakastil gwer.