Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pahari handiai ungkup hong Tesalonika, je manjadi ungkup ain Hatalla Bapa itah tuntang Tuhan Yesus Kristus! Ikei, iete Paulus, Silas tuntang Timoteus

² maharap keleh Hatalla Bapa tuntang Tuhan itah Yesus Kristus manenga berkat tuntang kasanang akan keton.

³ Pahari handiai, ikei patut harajur manyewut tarimakasih akan Hatalla tagal keton. Ikei puna patut malalus taloh je kilau te, awi keton sasar percaya dengan Kristus, tuntang keton sasar sinta dengan sama arep keton.

⁴ Jete bukue ikei hakotak tahiu keton gagenep tingkat ikei maja kare ungkup ain Hatalla. Hayak tama-tamam angat ikei manyarita kapercayan keton je segah dengan Kristus katika keton aton huang kapehe tuntang kajake je buah keton.

⁵ Tuntang hong hetoh gitan Hatalla adil toto mahakim oloh: Keton jari manyarenan kapehe tagal Lewu Taheta ain Hatalla, tuntang tagal te keton kareh ianggap patut mangat tame hete.

⁶ Ie kareh malalus taloh je adil, tuntang handak mambaleh hapan kapehe akan oloh je mawi keton kapehe.

⁷ Tuntang akan keton je wayah toh buah kapehe -- kalote kea akan ikei -- Hatalla kareh manenga kalapang hong andau Tuhan Yesus mohon bara sorga tuntang mamparahan Arepe dengan kare malekat Ayue je bara kuasa

⁸ tuntang hapan apui je lenda-lendang. Ie mohon uka mahukum kare oloh je dia mangasene Hatalla tuntang dia belom manumon auh Barita Bahalap tahiu Yesus Tuhan itah.

⁹ Kare oloh te kareh manarima hukum kabinasa sampai katatahie, inganan balua bara marak oloh ain Tuhan tuntang bara kuasan Ayue je hai;

¹⁰ taloh samandiai te kareh manjadi hong andau Ie akan dumah uka Ie impahai awi ungkup Ayue tuntang uka ihormat awi oloh handiai je percaya. Keton kareh mahin melai hong marak ungkup ain Hatalla te, awi keton jari percaya dengan barita je inyampai ikei akan keton.

¹¹ Jete sababe ikei harajur balakudoa akan keton. Ikei balakudoa mangat Hatalla manun keton manjadi oloh je patut uka belom manumon kahandak Ayue; maka akan jete Ie mantehau keton. Keleh Hatalla, hapan kuasan Aie, manggenep kahandak keton uka malalus kahalap, tuntang maninduh-mamparasih kakare gawi je ilalus keton awi keton percaya dengan Kristus.

¹² Awi kalote Tuhan itah Yesus impahai awi keton, tuntang Yesus kea mampahai keton tagal kahalap atei Hatallan itah tuntang Tuhan Yesus Kristus.

2 Tesalonika

Video 2 Tesalonika 1

Ikuti Kami:

KONTAK | PARTISIPASI | DONASI