¹ Suratna an kitak de Kristen zini ebe mae hap, Simon onakon– mensa hen “Petrus”kum nen gweblananke. Asa Kristus Yesus Zen dam tasiki– zere mo nganak de syal gwe-gwen hapye. Dawem kitak! Yesus Zen Zen– nesa de ngaya tabin hip de Zini. Hen Zen neno mae mo Alap. Zen Bi zem Alap mo nwenak lalak enkam gwe gweka, zen in zep hendep nesa ngaya tabirki. Nebe mae hap mensa Alap Kristus Yesussu dikim taibliblan hap dena golzimki, zen serkam de heꞌho gwibin tanganna, hen nen desa apdenake urensiꞌin.
² Zep Alap han nere mae mo Teipsinni Yesus hun Zen diki Zen sa serkam de kwasang-kwasangna Zenaka de tame son wenya nebe mae hap ol gwizimdi. Hen nen zere nik mo taha terenak esa lowehe gwer.
³ Alap Zen mae hap nesa kwang guludaka: Zere mo ngatannak hen heꞌho gwibinnik dikim hendep denaban lowehe gwen hap. Zep Zenaka de tame tan wenya nebe mae hap, Zen mes zere mo serkam de sosonna sowehen tangankam golzimki– nen dikim zere mo nwenak de etal gwesinkim eliwehe gwen hap denaye.
⁴ Nen dikim kirekam eliwehe gwen hap, Zen zep gu-gubiridan ola nebe mae hap dohonse gulzimki– serkam de heꞌho gwibin tangan naka. Zep nen de desa kitak gwirensinkim, zen dekam sa Alap mo Enhona nebe mae hap sosonna mam gul gwizimdi, hen nen dekam esa auhu-kamanak de hole-hle nakon ehil gwe hana gwer. Sap zen zen syauk sun de ora san dep nesa da tabiridahal gwenan.
⁵ Zen in zep syal-syalkam emki ealp gwe-gwen– dawemkam dikim Yesussu de taibliblannak etatete gwen hap. Ëtatete gwen hap de syala, zen a kirekam moye: Nonol tanganna dam-dam enkam em gwen. Zao anakan de kles son hap denaka em tawa gwibin, “An dawemna. An karekna.”
⁶ Zao enaka em zerinik gwe-gwen. Zao kareksa de goltowen maenak tatem em zaun. Hen Alap en hon em tal gwesin.
⁷ Hen ahana, Kristen bose omka em kwasang gwibirida gwen. Zao hen ahana, kitak de zi bose omka em kwasang gwibirida gwen.
⁸ Kirekame lowehe gweꞌak, dekam Yesussu de taibliblannak esa etatete gwe zaher, zep hendep molye kareknak altink. Hen aha zi mo nwenak dekam sa anakan wet sol, “Zini an eiwa mes tangan Yesussu tame dak, hen mes hli-hli dasik.”
⁹ Hwena kirekam men zen de egwe srem gweꞌak, zen toton bejen. Kirekam de zini nwena mes ehwalen-hwalen gwek, hendep ahakon mes tangan ehai gwek. Sap kire zini, Yesus mensa nesa karek-karek nakon ngan tasibirki, zen hom desa enlala nei gwibirin.
¹⁰ Hwena zen zep, aya-wal oso-wal, emki enlala syal-syala ban Yesussu de taibliblannak etatete gwen. Zen dekam esa ere mae mo enhonak anakan tame ul gwer, “Eiwa, asa mes Yesus kwang taka hen dam tasiki.” Dekam em molye eiwa de ora nakon esyan nahla gwek.
¹¹ Hen dekam nesa de ngaya tabin hip de Teipsin Zini Kristus Yesus sa ngatan zi mo lang nakon isrip-sri naban nesa lup gulin gwera– zere mo irik ginnik dikim hendep denaban lowehe gwen hapye.
¹² Sap eiwa, em mese kitak insa tawa eibik, hen Alap onakore ol dawemnak tateme ezauꞌun, hwena ee nama asa kirekam emsa enlala sobirida gwer.
¹³ Ëe de nama tim niban okamanak awe emsa golegwei inen dannak, zen ano syal– kirekam de emsa enlala sobirida gwen hap denaye.
¹⁴ Sap ee tawana: Ëe nabakam asa sopna alsil– men kirekam Bian Yesus asa hamal hap gu-gublu halkaye.
¹⁵ In zebe anakan alp gwe-gweꞌan, “Ëe de ere mo walassa hli yuludankam, zen bap zen Yesussu de taibliblan hap de ola ansa eititi gwibin.”
¹⁶ Ëe men kime emsa anakan enbirida gwek, “Bian Yesus Zen zere mo soson yawala ban sa gollwahal zala,” zen zi mo yasik tabin ol enlala gwibinsi home kirekam ayang ul gwizimk. Sap ee ere mae mo nwekame Yesussu hla lak– in kim kwatapnak ngatan zi mo lang nakore ngatanna wale ta zakye.
¹⁷ In kim ze asa golelowe heꞌanka, ee dekam ere mae mo ikime ngatan zi mo lang nakore ola esak– Teipsin Zini Alap kim Tane zem insa boltere taꞌankaye. Alap dekam anakan gu aneka, “An ere mo Tane– ere mo dang tininak de tanganna. Ama tangan sam gwesik gweblanan.”
¹⁸ (1:17)
¹⁹ Zen in zep, mensa Alap mo ol ayang gul gwen zini Yesus hup dena hamal hap nen gubirida gwek, zen bejen zalta dep lwa kinin. Zeno mae mo ola zen okama kawesinnik awe men kiye– lampu ngatanna. Zep desa enhonak em lone gwen– hendep Yesus mo lwa halzan yaklanak de hatak. Zen yakla nwe de hata sezan makan sa lwahal zala. Zen dekam sa zere mo tim nikore ngatankam eno mae mo enhona ngatan tabir-zim zira.
²⁰ Nonol tanganna emki ansa enlala gwe-gwibin: Zini mensa Alap mo hamal hap de ola ayang nul gwek, zen auhu-kama zi mo dwam gwibin sin hom ayang nul gwizimk. Zen hwena Alap mo Enho ing gwe hebirida gweka, zep ki eton gwek. Zen in zep, mensa zen ale nul gwek, zini bejen desa zere en mo enlalakam totoresa dam gulsun. Zen diki Alap mo Enho de ing gwe heblankam de dam gulsun.
²¹ (1:20)