Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri tanggala’ appa’ bulang Kislew, iamintu bulang salapang, lalang taung makaappa’ ammarentana Karaeng Darius, Nasarema’ pole pasang Batara.
2 Le’ba’mi nasuro pandudu’na Betel iamintu Sarezer siagang Regem-Melekh kammayatompa ana’ buana ke’nanga mange ri Balla’Na Batara Kaminang Koasaya untu’ appala’ barakka’Na.
3 Nisuro tommi ke’nanga akkuta’nang mae ri sikamma imanga siagang sikamma na’bia kamma anne, "Maka paralluiji ikambe angkarruki kaancuranna Balla’Na Batara iamintu appuasa ri tunggala’ bulang makalima sangkamma le’baka nagaukang ikambe attaung-taung sallona allaloa?"
4 Iaminne pasanNa Batara battua mae ri nakke.
5 Nakana, "Pabattuangi mae ri sikontu pandudu’na anne pa’rasanganga siagang mae ri sikamma imanga, angkanaya anjo puasaya siagang karru’ nagaukanga ke’nanga ri bulang makalimaya siagang makatujua lalanna anne tujupulo taunga teai pappakalompo untu’ mae ri Nakke.
6 Kammayatompa ri wattunna angnganre angnginung ke’nanga, kasannangngang kalennaji naboya ke’nanga."
7 Iaminjo Napaua Batara tete ri na’bi-na’biNa ri jammang allaloa ri wattunna nipammantangngi ija Yerusalem siagang coppong katallassanna pandudu’na. Anjo wattua tena nanjorenja ri desa-desa ri tammulilina kotaya ammantang taua, mingka ba’lalo ri bageang timboro’ siagang ri bangkeng-bangkeng bulu’ niaka ri bageang ilau’.
8 Napassareangi Batara Kaminang Koasaya anne pasanga mae ri nakke,
9 angkana, "Attaung-taung allaloa Kupassareangi anne parenta-parentaya mae ri ummakKu, ‘Musti a’gau’ adelekko, mangngamaseang siagang baji’ pa’mai’ mae ri parannu tau.
10 Teako jallakkangi sikamma jandaya, ana’-ana’ kukanga, bansa maraeng battua ammantang ri tangnga-tangnganu, yareka inai-nai mamo niaka lalang kasusaang. Siagang tea tongko appareki rancana ja’dala’ mae ri parannu tau.’
11 Mingka kapala batui ummakKu siagang tena sikali naero’ mappilangngeri; natongkoki tolinna ke’nanga sollanna tena nallangngere’.
12 Napatterassangi atinna ke’nanga sa’genna a’jari sanrapang batu terasa’na. Teai sipato’ larroKu lanri tenana naero’ ke’nanga mannuruki ri ajarang-ajarang le’baka Kupassareang mae ri ke’nanga tete ri sikamma na’bia riolo.
13 Tena naKupiali pappala’ doanna ke’nanga, lanri tenana todong namappilangngeri ke’nanga ri wattungKu a’bicara.
14 Sanrapang anging barubu, Kubarrasaki ke’nanga sa’genna tarpassa ammantang ri sikamma pa’rasangang-pa’rasangang maraenga. Anne butta copponga a’jari sino sikalimi, tena sikali tau ammantang, siagang roso’mi buttana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA