Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas bulan pewaluhken, tahun peduaken kenca Darius jadi raja Persia, reh kata TUHAN man Nabi Sakaria anak Berekia, kempu Iddo.
2 TUHAN si Mada Kuasa nuruh Sakaria ngatakenca man bangsa e nina, "Aku, TUHAN, nembeh kal ateKu kempak nini-ninindu,
3 tapi genduari Kukataken man bandu: Mulihlah ku Aku, maka Aku mulih ku Kam.
4 Ula kam bagi nini-ninindu nai. I bas paksa si nai-nai nabi-nabi nehken katangKu man bana, gelah itadingkenna kejahaten ras dosa-dosana. Tapi la ia nggit megiken ras matuhi Aku.
5 Nini-ninindu ras nabi-nabi e lanai nggeluh genduari.
6 Arah nabi-nabi suruh-suruhenKu Kubereken man nini-ninindu perentah ras kata pertenget, tapi la diatena. Erdandanken si e dat kiniseran ia. Kenca bage jera ia janah iakuina maka Aku, TUHAN si Mada Kuasa nggo ngukum ia sue ras perbahanenna, bagi si nggo Kutetapken i bas ukurKu."
7 I bas tahun peduaken kenca Darius jadi raja, i bas wari dua pulu empat, bulan si pesepulusadaken (eme bulan Sebat), reh kata TUHAN man bangku arah pengenehenen.
8 Kuidah malekat TUHAN ngersak kuda si megara. Ngadi ia i teruh batang kayu i bas sada baluren, janah arah pudina lit piga-piga kuda si deban, rupana megara, mekambing, ras mbulan.
9 Kusungkun malekat e, ningku, "Kai ertina si e, Tuan?" Erjabap ia nina, "Banci kucidahken man bandu kai ertina.
10 TUHAN nuruh kuda e kerina niar-niar doni enda."
11 Kenca bage iturikenna man malekat e nina, "Nggo isiar kami doni enda, janah idah kami kerina doni enda teneng dingen dame."
12 Kenca bage nina malekat ndai, "O TUHAN si Mada Kuasa, nggo nembeh AteNdu man Jerusalem ras kota-kota Juda pitu puluh tahun dekahna. Kasa kai nari dekahna maka IcidahkenNdu perkuah AteNdu man bana?"
13 Ialoi TUHAN malekat ndai alu kata-kata pengapul si melias,
14 jenari isuruh malekat e aku ermomo kerna kai si ikataken TUHAN si Mada Kuasa e; nina TUHAN, "Mbelin kal kekelengenKu man Jerusalem, dingen katangKu si badia e tetap lit i bas ukurKu.
15 Tapi nandangi bangsa-bangsa si nggeluh ersenang-senang nembeh ateKu, sabap tupung Kuamper rawangKu man bangsangKu, reh ka ia ngurupi nambahi kiniseran bangsangKu e.
16 Dage genduari nggo mulih Aku ku Jerusalem encidahken perkuah ateKu man kota e. Rumahku ipajekken pagi mulihi, dingen kota e ipanteki ka."
17 Isuruh malekat ndai ka pe aku ngatakenca bagenda, "Ikataken TUHAN si Mada Kuasa maka kerina kota-kota e senang ka pagi akapna mulihi, janah IsampatiNa pagi sekali nari Jerusalem dingen IkatakenNa maka kota eme kota si kelengna kal atena."
18 I bas pengenehenen si deban kuidah empat tanduk.
19 Kusungkuni malekat si pernah ngerana ras aku e ningku, "Kai ertina tanduk e?" Ngaloi ia nina, "Tanduk e nggambarken bangsa-bangsa doni si nggo engkerapken kalak Juda, Israel, ras Jerusalem."
20 Kenca bage icidahken TUHAN man bangku empat kalak pande besi.
21 Nungkun aku, "Kai ate kalak enda maka ia reh?" Ngaloi TUHAN nina, "Kalak enda reh lako pebiar-biar ras ngeruntuhken bangsa-bangsa si ngeradasken negeri Juda dingen engkerapken pendudukna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA