Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E bulan se kapeng ballu’ e taon se kapeng dhuwa’ pamarenta’anna Rato Darius e Persiya, PANGERAN adhabuwagi pessen reya ka sengko’, Nabbi Zakhariya ana’na Berekhya kompoyya Ido.

² PANGERAN ngotos sengko’ ngoca’ kantha reya ka ommadda, "E jaman lamba’ Sengko’, PANGERAN Se Mahakobasa, ce’ peggella ka bangatowana ba’na.

³ Tape sateya Sengko’ ngoca’ ka ba’na: Mara abali ka Sengko’, dhaggi’ Sengko’ abaliya ka ba’na.

⁴ Ja’ pakantha bangatowana. Lamba’ para nabbi manapa’ Tang sen-pessen ka bangatowana ba’na jareya sopaja padha’a ambu se alako jahat ban agabay dusa. Tape kabbi padha ta’ parduli ban ta’ endha’ atoro’ ka Sengko’.

⁵ Badha e dhimma para bangatowana ba’na ban para nabbi jareya sateya? Kabbi la padha tadha’.

⁶ Kalaban parantara’anna bi-nabbi, Tang abdi jareya, Sengko’ aberri’ ta-parenta ban parengeddan-parengeddan ka bangatowana ba’na. Tape tadha’ se ngedhingngagiya, daddi kabbi padha kodu nanggung okomanna. Saellana jareya reng-oreng jareya pas atobat ban ngakone ja’ Sengko’, PANGERAN Se Mahakobasa, la ngokom reng-oreng satembang ban kasala’anna, sarta menorot katantowan dhari Sengko’."

⁷ E tanggal pa’ lekor bulan Syebat, iya reya e bulan sabellas, e taon se kapeng dhuwa’ pamarenta’anna Rato Darius, PANGERAN manapa’ pessenna ka sengko’. E dhalem settong pangaton e baja malem,

⁸ sengko’ nangale’e malaekadda PANGERAN netene jaran mera. Malaekat jareya ambu e settong cora e antarana ka-bungkana murad. E budhiyanna manjeng ran-jaran laenna, badha se mera, se mera jambu ban se pote.

⁹ Sengko’ atanya ka salerana, "Guste, ponapa arteepon sadajana jaran paneka?" Saodda, "Bi’ sengko’ eduduwagiya ka ba’na apa artena.

¹⁰ Ran-jaran jareya ekerem PANGERAN epamareksa’a bume."

¹¹ Ran-jaran jareya areppot ka malaekat, "Abdidalem ampon mareksa epabalattra saantero bume, nyatana dunnya ka’dhinto aman sareng taremtem."

¹² Malaekat jareya adhabu, "PANGERAN Se Mahakobasa, pettong polo taon abittepon Junandalem duka ka Yerusalim sareng ka tha-kottha e Yehuda. Kantos bilaepon Junandalem teptebba duka sareng ta’ kasokan apareng sapora ka tha-kottha gapaneka?"

¹³ PANGERAN nyaodi malaekat jareya bi’ dhadhabun se malepor ate,

¹⁴ ban malaekat jareya ngotos sengko’ manapa’ apa se edhabuwagi PANGERAN Se Mahakobasa, "Sengko’ ce’ neserra ban talebat mekkere kottha Yerusalim, Tang kottha se socce.

¹⁵ Tape Sengko’ ce’ peggella ka sa-bangsa se arassa aman ban taremtem. Sabab e bakto Sengko’ ngampet peggella Tang ate ka Tang ommat, sa-bangsa jareya nambai kasangsara’anna Tang ommat.

¹⁶ Sateya Sengko’ abali ka Yerusalim aberri’a sapora ka kottha jareya. Tang Padalemman epaddegga pole ban kottha Yerusalim epabaliya akantha asalla."

¹⁷ Malaekat jareya ngotos sengko’ manapa’agi pessen reya keya, "PANGERAN Se Mahakobasa ajanji ja’ tha-kotthana bakal ma’mora pole, ban ja’ PANGERAN sakaleyan aggi’ nolonga Yerusalim sarta bakal ngakone Yerusalim jareya menangka kaagunganna."

¹⁸ E dhalem pangaton laen sengko’ nangale’e tandhu’na sape pa’-empa’.

¹⁹ Sengko’ atanya ka malaekat se abu-dhabu ka sengko’ gella’, "Ponapa arteepon dhu’-tandhu’ ka’dhinto?" Saodda, "Dhu’-tandhu’ reya parsemmonna karaja’an-karaja’an se kowat se masalebbudan pandhudhu’ Yehuda, Isra’il ban Yerusalim."

²⁰ PANGERAN laju noduwagi ka sengko’ pandhi kaempa se ngeba tokol.

²¹ Sengko’ atanya, "Aponapa’a reng-oreng ka’dhinto?" Dhabuna, "Matako’a ban magulu’a sa-bangsa se la maancor Yehuda ban masalebbudan pandhudhu’na."

Zakharia

Video Zakharia 1

Ikuti Kami:

KONTAK | PARTISIPASI | DONASI