Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lalang ri paccini’ maraengannaya pole, Napappicinikangi Batara mae ri nakke Imang Malompoa Yosua, sitabanga ammenteng ri dallekanna malaeka’Na Batara. Ri sa’rinna Yosua, niaki Setanga sadia untu’ antudui kalenna Yosua.

² Nakana malaeka’Na Batara mae ri Setanga, "Poro nihukkung laloko ri Batara, Setang! Poro nihukkung laloko ri Batara mangngarimangngia ri Yerusalem. Anne taua sanrapangi polong kayu nibesoka battu ri pepe’ a’rinraya."

³ Ammentengi Yosua anjoreng ammakeang care-care sannaka ra’masa’na.

⁴ Nakanamo anjo malaekaka mae ri sikamma pambantu-pambantuna ri suruga, "Pelaki care-care ra’masa’ niaka napake anne taua." Nampa nakana mae ri Yosua, "Kupela’mi dosanu, lakusareko pakeang beru."

⁵ Naparentakammi mae ri pambantu-pambantuna untu’ ampitabai soro’bang tangkasa’ ulunna Yosua. Naturukimi ke’nanga anjo passuroa. Le’baki anjo napipakeimi ke’nanga pakeang beru anjo Yosua na nijagai ri malaeka’Na Batara.

⁶ Nampa napabattu anjo malaekaka kananNa Batara mae ri Yosua angkana,

⁷ "Punna mannurukiko ri hukkung-hukkungKu siagang nugakang sikamma tugasa’ Kupassareanga mae ri kau, situlusu’nu lakkulle a’jari pamimping ilalang ri Ballakku siagang angngurusuki paranglakkenna. LaKupilangngeri sikamma pappala’ doannu, sangkamma Kupilangngerinna pappala’ doanna sikamma malaeka’ niaka ri ampikKu.

⁸ Pilangngeri, he ikau Imang Malompo Yosua, kammayatompa ikau ngaseng sikamma imang-imang aganna maraenga, ikau ngasemmi a’jari pangngebarang battu ri allo baji’ labattua. Anjo wattua laKusuroi atangKu niarenga ‘I Cu’la".

⁹ Kupadongkoki ri dallekanna Yosua se’re batu assulapa’ tujua laKusarea ukirang siagang tulisang-tulisang. LaKupelaki dosaya battu ri anne pa’rasanganga lalang siallo.

¹⁰ Punna battu sallang anjo alloa, tunggala’ taua lanakioki siampi’ balla’na untu’ battu siagang ampisa’ringi kasiamakkanga siagang salewanganga ri tangnga-tangngana koko anggoro’nu siagang poko’-poko’ aranu."

Zakharia

Video Zakharia 3

Ikuti Kami:

KONTAK | PARTISIPASI | DONASI