Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 He, Libanon, mara bukka’ labangnga, sopaja ka-bungkana arassa ba’na ekello’a bi’ apoy!
2 He, bungkana daru, mara nanges, sabab ka-bungkana comara la padha robbu, ka’-bungka’an se gus-bagus la padha gujur. He, ka’-bungka’an se ja-raja e Basan, mara nanges, sabab las-alas raja la ebasbas sampe’ rata.
3 Edhingngagi tangessa para pangobasa, la obus kajaja’anna! Edhingngagi gaungnga can-macan e alas; sabab la rosak alas kennengnganna e salanjangnga Songay Yordan.
4 GUSTE Allah adhabu ka sengko’, "Mara ba’na tha-kantha daddi oreng ngowan se ngowan dumba se esambelliya.
5 Reng-oreng se melle mate’e ba-dumba jareya tape ta’ eokom. Se ajuwal dagingnga ba-dumba jareya ngoca’, ‘Molja’agi PANGERAN! Sateya sengko’ ban ba’na sajan sogi!’ Reng-oreng ngowan jareya ta’ tao neser ka ba-dumba peyara’anna."
6 "Sengko’ ta’ neserra ka sapa’a bai e nagara reya. Sengko’ dibi’ se magiya sakabbinna pandhudhu’na ka pangobasa. Para pangobasa jareya bakal maancora nagara reya, ban Sengko’ neng-ennengnga, ta’ arebbu’a nagara reya dhari kakobasa’anna."
7 Sengko’ Zakhariya, eopae bi’ gar-sodagar dumba jareya esoro ngowan ba-dumba se esambelliya. Sengko’ andhi’ tongket dhadhuwa’; se settong bi’ sengko’ enyamae "Kamora’an" ban settonganna "Panyengset". Saellana jareya sengko’ molae ajaga ban meyara ba-dumba jareya.
8 Badha oreng ngowan katello se mapeggel sengko’. Bi’ sengko’ eojuk e dhalem bakto sabulan.
9 Sengko’ pas ngoca’ ka ba-dumba se saambalan rowa, "Sengko’ ta’ ngowana ba’na pole. Se kodu mate dina me’ mate, se tompessa me’ olle tompes. Karena me’ olle saleng pate’e."
10 Tongket se bi’ sengko’ enyamae "Kamora’an" rowa bi’ sengko’ ekala’, pas epotel kaangguy maburung parjanjiyan se ebadhi PANGERAN bi’ sakabbinna bangsa.
11 E are jareya keya parjanjiyan jareya epaburung. Gar-sodagar dumba rowa ngabassagi sengko’, padha apangrasa ja’ PANGERAN abu-dhabu kalaban ropa sabarang se elakone sengko’.
12 Sengko’ ngoca’ ka reng-oreng jareya, "Mon sampeyan saroju’, bajarragi opa kaula. Mon bunten, enggi ta’ osa." Bi’ reng-oreng jareya sengko’ laju eberri’i opa tello polo pesse salaka. PANGERAN adhabu ka sengko’, "Pesse jareya maso’agi ka dhalem kas e Tang Padalemman." Daddi pesse salaka tello polo jareya bi’ sengko’ epamaso’ ka dhalem ekkas e Padalemman Socce. Sajareya pangarga’anna reng-oreng jareya ka sengko’!
13 (11:12)
14 Saellana jareya sengko’ motel tang tongket settonganna, iya reya se bi’ sengko’ enyamae "Panyengset," ban parsatuwanna Yehuda ban Isra’il pas pegga’.
15 PANGERAN pas adhabu ka sengko’, "Mara ba’na pakantha oreng ngowan sakaleyan aggi’, tape sateya daddi oreng ngowan se ta’ becce’.
16 Sabab Sengko’ nyoro settong oreng ngowan epajaga Tang dumba, tape oreng jareya ta’ marduli dumba se elang; dumba se posang ta’ esare, se loka ta’ etambai, ban dumba se gi’ odhi’ ta’ epakane. La’-mala’ ngakan dagingnga dumba se paleng lempo ban nyabudi kokodda.
17 Ta’ salamet oreng ngowan se ta’ aguna jareya! Dumbana se saambalan edina. Perrang bakal ngaherana kakobasa’anna. Lengngenna bakal lempowa ban mata kanganna bakal buta’a."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA