Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sekali, seh me kata TUHAN man Nabi Juna anak Amittai.
2 Nina, "To, laweslah ku Niniwe, kota si mbelin e, jenari kataken maka kota e nggo ersalah, sabap kerina kejahatenna tangkas man bangKu."
3 Tapi Juna lawes ku ingan si deban, atena lompat i bas TUHAN nari. Lawes ia ku Jope, janah idapetina i je sada kapal si nandangi erlayar ku Sepanyol. Igalarina ongkosna, kenca bage inangkihina kapal ndai, guna erlayar ku Sepanyol ras anak kapal e, sabap lompat atena i bas TUHAN nari.
4 Tapi ibahan TUHAN angin si meter rembus ku lawit, janah angin ras galumbang si merawa e menam pe pecah atena ibahanna kapal e.
5 Seh kal biarna anak kapal e, emaka nderkuh ia kerina mindo penampat man dibatana sekalak-sekalak. Guna engkurangi berat kapal e, iambekken kalak ndai ku lawit barang-barang si lit i bas kapal. Sanga si e badeh kal pertunduh Nabi Juna; nggo kepeken ia lawes medem ku ruangan si lit i bas kapal e.
6 Rembang reh ku je kapten kapal, emaka nina man Juna, "Kuga maka kam tunduh saja? Kekeken, ertotolah man dibatandu, mbera-mbera iperdiatekenna kita, maka ula kita bene."
7 Kenca bage nina kalak ndai sapih-sapih ia, "Ertikam-tanduklah kita, gelah sieteh erdandanken salah ise maka kita kena cilaka enda." Jenari ertikam tanduk ia, kena gelar Juna.
8 Emaka nina anak kapal e kempak Juna, "Kataken man kami, erdandanken salahndu kin maka kita kena cilaka enda? Kai dahinndu? I ja nari kam? Kalak kai kam?"
9 "Aku kalak Heber," nina Juna njabapsa. "Aku nembah man TUHAN, Dibata nu langit, si njadiken lawit ras daraten."
10 Kenca bage iturikenna pe tole maka lompat atena i bas TUHAN nari. Emaka mbiar kal anak-anak kapal e, janah nina man Juna, "Uga maka bage perbahanndu!"
11 Sanga si e angin ras galumbang lawit tetap reh rawana. Emaka isungkun anak-anak kapal e Nabi Juna nina, "Kuga arus perbahan kami man bandu gelah lawit enda ulanai merawa man kami?"
12 Ngaloi Juna nina, "Ambekkenlah aku ku lawit maka tenang ka ia mulihi. Kueteh maka erkiteken salahku nge maka angin kaba-kaba enda reh engkenai kam."
13 Tapi la akapna mehuli ngikutken kata Juna. Emaka asa gegehna icubakenna engkayuhken kapal e ku tepi, tapi la ngasup ia perban angin tetap reh gegehna nungsangsa.
14 Erdandanken si e ertoto kalak ndai man TUHAN nina, "O TUHAN, mekuahlah AteNdu, ula min IbuatNdu kesah kami erkiteken ibunuh kami kalak si la ersalah. Sabap Kam jine kap si nggo erbahan sue ras PeratenNdu."
15 Kenca bage iangkat kalak ndai Juna, jenari ibenterkenna ku lawit, janah minter teneng lau lawit e.
16 Ngidah si e seh kal biarna anak kapal e man TUHAN. Emaka igelehna asuh-asuhen jadi persembahen man TUHAN, jenari erjanji ia nembah TUHAN.
17 Kenca Juna ibenterken ku bas lawit, isuruh TUHAN sada nurung si seh kal galangna nelen Juna. Telu wari telu berngi dekahna ia i bas beltek nurung e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA