Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob sar barita ai ibogei ganup raja, na i dipar ni Jordan, na i dolog pakon na i hondot das hu Libanon, sagala na i pasir ni Laut Bolag ai, ai ma halak Het, Amori, Kanaan, Peresi, Hewi pakon Jebusi,
2 jadi martumpu ma sidea, sauhur laho marporang dompak si Josua pakon Israel.
3 Tapi dob ibogei pangisi ni Gibeon, na binahen ni si Josua hubani Jeriko pakon huta Ai,
4 dihut ma sidea mambahen akal, laho ma sidea pasirsir bohal, ibuat sidea ma guni na buruk-buruk sitampeihonon bani halode ni sidea, pakon gusi hulingkuling, ianan ni anggur na dob buruk, marigat anjaha idungkap,
5 ampa sipatu na buruk anjaha na nidungkap bani nahei ni sidea; hiou na buruk bahen hiou, anjaha ganup bohal ni sidea mapir anjaha lapukon.
6 Dob ai laho ma sidea marayak si Josua hu parsaranan na i Gilgal, anjaha nini ma hubani pakon dompak halak Israel, “Na roh hun tanoh na daoh do hanami, on pe bahen nasiam ma parpadanan bennami.”
7 Nini halak Israel ma dompak halak Hewi ai, “Ra i tongah-tongahnami do nasiam marianan; jadi sonaha ma pambahennami parpadanan pakon nasiam?”
8 Jadi nini sidea ma dompak si Josua, “Jabolonmu ma hanami.” Nini si Josua ma dompak sidea, “Ai ise do nasiam, anjaha hunja do roh nasiam?”
9 Nini sidea ma hu bani, “Na roh hun tanoh na madaoh tumang do hanami jabolonmu on, halani barita ni Jahowa Naibata nasiam; ai ibogei hanami do barita-Ni pakon haganup na binahen-Ni i tanoh Masir,
10 sonai homa haganup na binahen-Ni hubani na dua raja ni halak Amori, na i dipar ni Jordan, hubani si Sihon raja ni Hesbon, pakon hubani si Og raja ni Basan, na marianan i Astarot.
11 Jadi ihatahon pangintuainami pakon sagala pangisi ni tanohnami ma bennami, ʻBoan nasiam ma bani nasiam bohal i dalan, laho ma nasiam manjumpahkon sidea anjaha hatahon nasiam ma hubani sidea, “Jabolon nasiam do hanami, on pe pungkah nasiam ma parpadanan pakon hanami.”
12 Rutinami on, milas ope iboan hanami hun rumahnami bahen bohalnami bani parbingkatnami hubani nasiam on, tapi anggo nuan domma pala mapir anjaha lapukon.
13 Anjaha parnahan ni anggur on bayu ope, sanggah iisi hanami on, hape tonggor ma, domma pala marigat, anjaha ha hiounami pakon sipatunami on, domma pala buruk ibahen pardalanan na daoh tumang.ʼ”
14 Jadi ijalo halak ai ma humbani bohal ni sidea ai, tapi seng pala marpanungkun sidea hubani Jahowa.
15 Ibahen si Josua ma pardameian hubani sidea, anjaha ipungkah ma parpadanan bani sidea, laho pagoluhkon sidea; pala marbulawan kopala ni tumpuan ai pasal sidea.
16 Tapi dob salpu tolu ari, dob ibahen parpadanan ai bani sidea, ibogei sidea ma, dohor do hape sidea i lambung ni sidea, anjaha marianan i tongah-tongah ni sidea.
17 Jadi bingkat ma halak Israel, gabe das ma sidea hu huta ni sidea patolu-arihon. Huta ni sidea, ai ma: Gibeon, Kafira, Beerot pakon Kiriat-Jearim.
18 Tapi seng ibunuh halak Israel sidea, halani na dob marbulawan ai kopala ni tumpuan ai hubani Jahowa, Naibata ni Israel pasal sidea. Jadi marungut-ungut ma ganup tumpuan ai dompak kopala ai.
19 Nini sagala kopala ai ma hubani ganup tumpuan ai, “Domma pala marbulawan hanami pasal sidea hubani Jahowa Naibata ni Israel, halani ai seng bulih bunuhonta sidea.
20 On ma bahen hita hubani sidea, napagoluh ma sidea, ase ulang mangonai banta ringis, halani bulawan ai, na dob binulawankonta bani sidea.”
21 Nini kopala-kopala ai ma dompak sidea, “Paturut ma sidea manggoluh.” Gabe siparsoban pakon sialop bah ma sidea bani ganup tumpuan in, songon na dob hinatahon ni kopala-kopala ai bani sidea.
22 Jadi idilo si Josua ma sidea, anjaha nini ma dompak sidea, “Mase ma ioto-otoi nasiam hanami, marhitei na mangkatahon, ʻDaoh tumang do hanami humbani nasiamʼ hape i tongah-tongahnami do nasiam marianan?
23 On pe, hona papa ma nasiam, seng be maronti bani nasiam na gabe jabolon, parsoban pakon sialop bah i rumah ni Naibatangku.”
24 Nini sidea ma mambalosi si Josua, “Domma das barita bennami jabolonmu, na tinonahkon ni Jahowa Naibatamu hubani juakjuak-Ni si Musa, sihol berehonon-Ni bani nasiam ganup tanoh on, anjaha siapkononmu ganup pangisi ni tanoh on hun lobei nasiam; jadi mabiar tumang ma hanami pasal hosahnami i lobei nasiam, gabe ibahen hanami sonon.
25 On pe, tonggor ma, ibagas tanganmu do hanami; bahen ham ma na dear, anjaha na pintor ninuhurmu sibahenonmu bennami.”
26 Jadi ibahen ma sonai hubani sidea, ipaluah ma sidea hun tangan ni halak Israel, ase ulang ibunuh sidea.
27 Itotapkon si Josua ma sidea humbani ari ai nari gabe parsoban pakon sialop bah bani tumpuan ai pakon bani anjapanjap ni Jahowa ronsi sadari on bani ianan sipilihonni ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA