Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E kottha Yerikho bang-labangnga kottha la ejaga bi’ gu-onggu sopaja ommat Isra’il ta’ sampe’a ngenneng maso’. Tadha’ oreng se ebagi kalowar maso’ kottha jareya.
2 Dhabuna PANGERAN ka Yusak, "Sateya bi’ Sengko’ kottha Yerikho ban ratona ban sakabbinna tantarana se ngal-bangal rowa epassra’agiya ka ba’na.
3 Ba’na ban tantarana kodu abaris alengleng e lowaranna kottha jareya saare sakaleyan sampe’ nem are abidda.
4 Imam kapetto, padha ngeba tarompet bang-sebang, kodu ajalan e adha’anna Petthe Parjanjiyan. E are se kapeng petto’, ba’na ban tantarana kodu alengleng e lowaranna kottha jareya pettong kale, sabatara mam-imam gella’ padha nope tarompedda.
5 Saellana jareya mam-imam jareya kodu nope tarompedda palanjang monyena. Mon ba’na kabbi ngedhing monyena tarompet se lanjang jareya, tantarana kabbi kodu asorak pakaja, pagarra kottha jareya tanto pas gujur. Ba’na kabbi pas kodu terros maso’ ka kottha jareya."
6 Yusak adikane para imam, pas adhabu, "Mara osong Petthe Parjanjiyan jareya, e antarana ba’na kapetto kodu ajalan e adha’anna Petthe jareya sambi ngeba tarompet."
7 Yusak pas makon tantarana alengleng e lowaranna kottha jareya, e budhiyanna barisan pangawal bagiyan adha’ se ajalan e adha’na Petthe Parjanjiyanna PANGERAN.
8 Daddi, menorot dhabuna Yusak, barisan pangawal bagiyan adha’ mangkat, ajalan e adha’na mam-imam se kodu nope tarompet; e budhiyanna jareya mam-imam se mekol Petthe Parjanjiyan, ban e dhi-budhi kadibi’ barisan pangawal bagiyan budhi. Saabidda barisan jareya ajalan, tarompedda terros epamonye.
9 (6:8)
10 Tape tantarana kabbi epessen ta’ olle asorak ban ta’ olle acaca’an mon gi’ ta’ eparenta’agi bi’ Yusak.
11 Kantha jareya Yusak se makon tantarana ngeba Petthe Parjanjiyan alengleng e lowaranna kottha jareya sakaleyan, saellana jareya pas padha abali ka parkemahan, sarta pas ngenep e jadhiya.
12 Kalagguwanna gi’ teng-petteng Yusak abungo, mam-imam ban tantarana pas abaris pole alengleng e lowaranna kottha jareya, atoranna epapadha ban se ba’ari’anna: dha’-adha’ kadibi’ barisan pangawal bagiyan adha’, e budhiyanna mam-imam se nope tarompet se bannya’na kapetto, esosol bi’ mam-imam se mekol Petthe Parjanjiyan, ban e dhi-budhi kadibi’ barisan pangawal bagiyan budhi. Sabatara jareya tarompedda epamonye terros.
13 (6:12)
14 E are se kapeng dhuwa’ reng-oreng jareya abaris pole alengleng e lowaranna kottha gella’ sakaleyan, ban saellana jareya pas abali ka parkemahan. Se kantha jareya ejalannagi sampe’ nem are.
15 E are se kapeng petto’ reng-oreng jareya jaga gu-laggu, e bakto pajjar buru moncar, pas abaris alengleng e lowaranna kottha Yerikho sampe’ pettong kale; carana padha bi’ se ejalannagi e re-are sabellunna. Pera’ e are se kapeng petto’ jareya reng-oreng buru alengleng e lowaranna kottha jareya sampe’ pettong kale.
16 E bakto alengleng pettong kalena, mam-imam gi’ buru nope tarompedda, Yusak makon pasukan Isra’il jareya sopaja aorak kabbi. Dhabuna Yusak, "Kottha reya bi’ PANGERAN la eparengngagi ka ba’na!
17 Kottha reya saessena kodu epamosna menangka tor-ator ka PANGERAN. Pera’ sondel se anyama Rahab ban la-balana malolo se ta’ olle epate’e, sabab Rahab jareya la nolong ta-matana ommat Isra’il.
18 Apa’a bai se kodu epamosna jareya ta’ olle kala’. Mon sampe’ badha se la’-ngala’ dhari pa-apa se kodu epamosna jareya, parkemahanna ommat Isra’il bakal ekennenga calaka’ ban balai.
19 Rang-barang se dhari salaka, emmas, dimbaga ban besse kodu epalaen, atorragi ka PANGERAN, sempen e kennengngan panyempennanna rang-barang kaagunganna PANGERAN."
20 Mam-imam gella’ pas mamonye tarompedda. Reng-oreng Isra’il e bakto ngedhing monyena tarompet jareya pas asorak epakaja, pagarra kottha jareya pas gujur. Tantara Isra’il padha terros nae’ kabbi, maso’ ka kottha jareya sarta pas ngobasane kottha jareya.
21 Reng-oreng se badha e kottha jareya, towa ngodha, lake’ bine’, epate’e bi’ peddhang kabbi. Bariya keya sape, dumba ban hemarra.
22 Dhabuna Yusak ka ta-matana se kadhuwa rowa, "Kassa’ ba’na entar ka bengkona sondel rowa, oreng jareya sabalana giba kalowar, menorot janji se la esanggubbagi bi’ ba’na."
23 Ta-mata se kadhuwa jareya mangkat, Rahab egiba kalowar abareng bi’ eppa’ ebuna, tan-taretanna ban la-balana se laen. Balana Rahab jareya sarta nor-dunorra, kabbi egiba ka lowar, ka kennengngan se aman e seddi’anna parkemahan Isra’il.
24 Saellana jareya kottha jareya saessena eobbar kabbi, se ta’ eobbar pera’ rang-barang se dhari salaka, emmas, dimbaga ban besse. Rang-barang jareya egiba, esaba’ e kennengnganna panyempennanna rang-barang kaagunganna PANGERAN.
25 Tape Rahab sondel rowa ban la-balana bi’ Yusak ta’ epate’e sabab Rahab jareya nolong ta-mata se kadhuwa se eotos Yusak ka Yerikho. (Sampe’ sateya reya na’ potona Rahab gi’ badha e Isra’il.)
26 E bakto jareya Yusak makalowar larangan kantha reya, "Pa’-sapa’a se ngoddi mateppa’ ban maddek kottha Yerikho reya pole, bakal ekennenga babastonna PANGERAN. Pa’-sapa’a se masang dhasarra bakal kaelangana ana’ sareyangnga; Pa’-sapa’a se masang bang-labangnga pagarra kottha jareya bakal kaelangana ana’ bungsona."
27 Daddi PANGERAN la abanto Yusak, ban asmana Yusak pas kalonta sanagara jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA