Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ipepulung Josua kerina suku Israel i Sikem. Idilona pertua-pertua, peminpin-peminpin, hakim-hakim, ras kepala-kepala pasuken Israel, jenari ngadap ia kerina ku lebe-lebe Dibata.
2 Nina Josua man kerina bangsa e, "Enda me kai si ikataken TUHAN, Dibata Israel 'Nai nini-ninindu ringan arah lepar Lau Eprat janah isembahna dibata-dibata si deban. Sekalak i bas nini-ninindu e nari eme Terah, bapa Abraham ras Nahor.
3 Kenca bage Kubuat ninindu Abraham i bas taneh si i lepar Lau Eprat nari, Kutaruhken ia ku taneh Kanaan. Nterem Kubahan kesusurenna. Kubereken man bana Isak,
4 jenari man Isak Kubereken Jakup ras Esau. Man Esau Kubereken taneh deleng-deleng Edom jadi sikerajangenna, tapi ninindu Jakup ras anak-anakna lawes ngincuah ku Mesir.
5 Kenca si e Kusuruh Musa ras Harun, janah Kubahan kesusahen si mbelin man Mesir. Tapi kam kubaba ndarat i jah nari, jenari iayaki kalak Mesir ia alu gereta perang ras tentera erkuda.
6 Kubaba nini-ninindu ndarat i Mesir nari. Tapi asum nini-ninindu seh i Lawit Merah,
7 nderkuh ia ku Aku mindo penampat, jenari Kutamaken kegelapen kelang-kelangna ras kalak Mesir. Kubahan lawit reh ergalun i babo kalak Mesir si erbahanca ia gedap kerina. Itehndu kai si Kubahan man Mesir. Ndekah kam ringan i gurun pasir.
8 Kenca bage Kubaba kam ku taneh Amori si ringan arah Timur Jordan. Ilawanna kam, tapi Kubereken man bandu kemenangen. Ibuatndu tanehna, janah Kukernepken ia tupung kam merangisa.
9 Kenca bage raja Moap, Balak anak Sipor, erperang ngelawan kam. Itenahkenna Bilham anak Beor jenari ipindona man bana gelah isumpahina kam.
10 Tapi la Aku nggit megiken Bilham, emaka ipasu-pasuna kam, janah alu bage Kuselamatken kam i bas Balak nari.
11 Ikeparindu Lau Jordan jenari seh kam i Jeriho. Ilawan kalak Jeriho kam, bagi si ibahan kalak Amori, Peris, Kanaan, Heti, Girgasi, Hewi, ras kalak Jebusi, tapi Kubereken man bandu kemenangen ngelawan ia kerina.
12 Asum kam merangisa, Kuhuntakken ia kerina gelah ipelawesndu raja kalak Amori si dua e. Si e labo erkite-kiteken pedangndu ntah panahndu.
13 Kubereken man bandu taneh si la nggo pernah ikerjakenndu ras kota-kota si la pernah ipajekkenndu. Genduari kam ringan i je janah man buah anggur si labo kam nuanca, ras buah saitun i bas batangna nari si labo kam nuanca.'"
14 "Dage genduari," nina Josua ngumputi rananna, "pehagalah TUHAN janah sembahlah Ia alu tutus ate ras patuh. Pedauhlah dibata si nai isembah nini-ninindu i Mesopotami ras i Mesir, janah man TUHAN sajalah kam ersembah.
15 Adi la iakapndu mehuli ersembah man TUHAN, pilihlah sendah ise atendu isembahndu, dibata si isembah nini-ninindu i Mesopotami, ntah dibata kalak Amori si inganindu tanehna genduari. Tapi adi aku ras isi jabungku, TUHAN saja ngenca isembah kami."
16 Ngaloi bangsa e Nina "Ndigan pe la kami nggit nadingken TUHAN jenari nembah man dibata si deban!
17 TUHAN Dibata kami maba kami ras bapa kami i bas perbudaken nari i Mesir, janah idah kami tanda kuasa si IbahanNa. IjagaiNa kami gelah terkelin ku japa pe kami mentas arah tengah-tengah bangsa-bangsa si ibentasi kami.
18 Asum kami merangi taneh enda, ipelawes TUHAN kerina kalak Amori si ringan i jenda. Emaka kami pe nembah man TUHAN. Ia kap Dibata kami."
19 Nina Josua man bangsa e, "Tapi ntah labo kam ngasup nembah man BaNa. Ia Dibata si Badia, Sitonggal! Ia Dibata si mecimberu. La IalemiNa dosandu
20 adi itundaleknndu jenari nembah man dibata-dibata si deban. Tapi erkusur Ia ngelawan kam jenari IukumNa kam. La banci la IkernepkenNa kam, aminna gia mehuli Ia gelgel nari man bandu."
21 Nina bangsa e man Josua, "Lang! Ate kami nembah man TUHAN saja."
22 Nina Josua man bana kerina, "Kam jine jadi saksindu maka kam nggo milih TUHAN janah ersembah man BaNa." "Ue," nina kerina, "kami saksina."
23 "Adi bage pedauhlah dibata si deban si lit i bas kam," nina Josua ngumputisa, "janah ersumpahlah kam man dirindu jine maka kam setia man TUHAN, Dibata Israel."
24 Jenari nina bangsa e man Josua, "Ate kami ersembah man TUHAN Dibata kami. Ate kami ngikutken PedahNa."
25 Emaka ibahan Josua sada perpadanen ras bangsa e i bas wari e, janah i bas ingan e, i kota Sikem iberekenna man bana undang-undang ras peraturen si man ikutenken.
26 Isuratken Josua pedah-pedah i bas kitap undang-undang Dibata. Kenca bage ibuatna sada batu galang jenari itamakenna i teruh kayu jati i bas ingan TUHAN si badia.
27 Ikatakenna man bangsa e kerina nina, "Batu enda jadi saksi man banta. Nggo ibegi batu enda kerina kata si ibelasken TUHAN man banta. Dage, batu e jadi ersaksi ngelawan kam, gelah ula kam ngelawan man Dibatandu."
28 Kenca bage isuruh Josua bangsa e lawes, janah sekalak-sekalak ia mulih ku taneh baginna.
29 Kenca si e mate Josua anak Nun, suruh-suruhen TUHAN e. Tupung e umurna seratus sepuluh tahun.
30 Ikuburken ia i tanehna jine i Timnat Sera i taneh deleng-deleng Eperaim arah Utara Deleng Gaas.
31 Kidekah geluh Josua, bangsa Israel nembah man TUHAN. Janah kenca ia mate pe tetap denga kalak Israel nembah man TUHAN, kidekah nggeluh denga peminpin-peminpin si nggo naksiken kerina si nggo ibahan TUHAN man Israel.
32 Badan Jusup, si nggo ibaba bangsa Israel i Mesir nari, ikuburken i Sikem, i bas taneh si itukur Jakup i bas anak-anak Hamor nari, bapa Sikem, alu seratus duit pirak. Taneh tetap jadi sikerajangen kesusuren Jusup.
33 Eleasar anak Harun mate jenari ikuburken i Gibea, kota i taneh deleng-deleng Eperaim si nggo ibereken man anakna Pinehas.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA