Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ibogei si Adoni-Zedek, raja hun Jerusalem, na dob itaban si Josua huta Ai anjaha isiapkon -- anjaha songon pambahenni hubani Jeriko pakon hubani rajani, lanjar sonai do ibahen hubani huta Ai pakon hubani rajani -- anjaha na dob mardamei pangisi ni Gibeon hubani Israel anjaha lanjar marianan i tongah-tongah ni sidea,
2 jadi mabiar tumang ma sidea; ai huta na bolon do Gibeon ai, songon sada huta pamatang, anjaha banggalan ope ai hun huta Ai, anjaha na garang marporang do ganup dalahi ni huta ai.
3 Dob ai ipadas si Adoni-Zedek, raja hun Jerusalem ma tonah on hubani si Hoham, raja hun Hebron, hubani si Piram raja hun Jarmut, hubani si Jafia raja hun Lakis, pakon hubani si Debir raja hun Eglon, nini ma,
4 “Tangkog ma nasiam marayak ahu, urupi nasiam ma ahu manaluhon Gibeon, ai domma sidea mardamei hubani si Josua pakon hubani halak Israel.”
5 Jadi martumpu anjaha tangkog ma na lima raja ni halak Amori ai, ai ma raja hun Jerusalem, raja hun Hebron, raja hun Jarmut, raja hun Lakis, raja hun Eglon, sidea pakon haganup bala ni sidea; ihubu sidea ma Gibeon anjaha iporang sidea ma huta ai.
6 Dob ai isuruh dalahi na hun Gibeon ma suruhanni hubani si Josua, hu parsaranan na i Gilgal, nini sidea ma, “Ulang ma talluskon tanganmu hun bennami jabolonmu, podas ma nasiam tangkog marayak hanami, paluah anjaha urupi ma hanami, ai domma martumpu mangimbang hanami ganup raja ni halak Amori, sagala na marianan i dolog.”
7 Jadi tangkog ma si Josua hun Gilgal, ia pakon haganup siimbang munsuh hasomanni, ronsi sagala na borani marmunsuh.
8 Nini Jahowa ma dompak si Josua, “Ulang ma ho mabiar mangidah sidea, ai domma huberehon sidea hubagas tanganmu, seng dong humbani sidea na martahan jongjong i lobei-lobeimu.”
9 Jadi sompong ma idorab si Josua sidea; layur sabornginni ai mardalan nahei sidea hun Gilgal.
10 Anjaha isonggoti Jahowa ma sidea i lobei ni Israel, talu tumang ma sidea ibahen i Gibeon, anjaha iayak ma sidea bani dalan na i raboyon ni Bet-Horon, italuhon das hu Aseka pakon hu Makeda.
11 Jadi sanggah na maporus ai sidea i lobei ni halak Israel, sanggah na i tuadan na i Bet-Horon ai sidea, gabe ipandabuhkon Jahowa ma bani sidea batu na banggal hun nagori atas das hu Aseka, gabe marmateian ma sidea; bueinan do sidea matei, ibahen udan sira-sira ai, ase na matei ibahen podang ni halak Israel.
12 Ijia ma ihatahon si Josua hubani Jahowa, bani ari sanggah iberehon Jahowa halak Amori hubani halak Israel, nini ma i lobei ni halak Israel, “Soh ma ho mata ni ari i atas ni Gibeon, anjaha ho bulan i atas ni habungan Ayalon!”
13 Jadi soh ma mata ni ari ai, anjaha bulan ai pe maronti ma paima sombuh iahap bangsa ai mambalas bani munsuhni ai. Ai lang tarsurat do ai ibagas buku ni halak parpintor? Jadi soh ma mata ni ari ai i parsitongahan ni langit, seng tarudu laho sundut, hira layur sadari.
14 Seng ongga masa songon ari ai, na dob in pakon i pudini, itangihon Naibata sora ni sada halak; ai Jahowa do marporang mangkopkop Israel.
15 Dob ai mulak ma si Josua pakon ganup Israel hasomanni ai hu parsaranan na i Gilgal.
16 Tapi domma maporus anggo raja na lima ai, anjaha marponop sidea hubagas liang i Makeda.
17 Jadi adong ma halak na patugahkon hubani si Josua, nini ma, “Domma dapot raja na lima ai, marponop ibagas liang i Makeda.”
18 Jadi nini si Josua ma, “Gulang nasiam ma batu bolon hu babah ni liang ai, anjaha hatahon nasiam ma dalahi hujai manjaga sidea.
19 Tapi ulang ma sohsoh nasiam, ayaki nasiam ma munsuh nasiam, bunuh nasiam ma parjagani na hun pudi, ulang palopas nasiam sidea masuk hu huta ni sidea, ai domma iondoskon Jahowa Naibata nasiam sidea hu tangan nasiam.”
20 Jadi dob talu ibahen si Josua rap pakon halak Israel sidea, bois tumang sidea ibunuhi -- deba hansa humbani sidea maluah anjaha sampang masuk hubagas huta na marbatar-batar --
21 jadi mulak ma ganup bangsa ai hu parsaranan, hubani si Josua i Makeda mardamei-damei, sada pe lang na pag paganjang unsumni hubani halak Israel.
22 Dob ai nini si Josua ma, “Ungkap nasiam ma babah ni liang ai; padarat anjaha boan nasiam ma hu bangku raja na lima ai.”
23 Jadi ibahen sidea ma sonai, iarahkon sidea ma luar hun liang ai hubani si Josua raja na lima ai: Raja hun Jerusalem, raja hun Hebron, raja hun Jarmut, raja hun Lakis pakon raja hun Eglon.
24 Jadi dob iboan sidea luar raja ai hubani si Josua, ipatumpu si Josua ma ganup dalahi ni Israel, ihatahon ma hubani puanglima ni bala, na bingkat rap pakonsi, “Roh ma nasiam, nahkon nasiam ma nahei nasiam hubani tangkuhuk ni raja-raja in!” Roh bei ma sidea, anjaha inahkon ma naheini hubani tangkuhuk ni sidea.
25 Dob ai nini si Josua ma dompak sidea, “Ulang ma nasiam mabiar, anjaha ulang ma bobor, pir ma tonduy nasiam anjaha totap ma uhur nasiam, ai sonin do bahenon ni Jahowa hubani ganup munsuh nasiam, na mamunsuhi nasiam.”
26 Dob ai ibunuh si Josua ma sidea, anjaha igantungkon sidea hubani lima hayu, anjaha lanjar gantung do sidea bani hayu ai ronsi bodari.
27 Tapi marayak laho matei mata ni ari, ihatahon si Josua ma patoruhon sidea humbani hayu ai, anjaha manggijigkon sidea hubagas liang, parponopan ni sidea hinan. Dob ai inahkon sidea ma batu banggal hu babah ni liang ai, anjaha ijai ope ronsi sadari on.
28 Makeda pe dapot si Josua do bani ari ai, italuhon marhitei podang; isiapkon ma ganup rajani ronsi sagala na manggoluh ibagas huta ai, sahalak pe lang ipalopas maluah, anjaha ibahen do hubani rajani, songon na binahenni hubani raja ni Jeriko.
29 Dob ai bingkat ma si Josua rap pakon halak Israel hun Makeda hu Libna, laho marporang dompak Libna.
30 Huta ai pe ibere Jahowa do hubani tangan ni Israel pakon rajani; anjaha itampuli ganup na marhosah na ibagas huta ai marhitei mata ni podang, seng dong na maluah age sahalak; anjaha ibahen do hubani rajani, songon na binahenni hubani raja ni Jeriko.
31 Dob ai bingkat ma si Josua rap pakon ganup Israel hun Libna hu Lakis, marsaran ma sidea ijai, anjaha iporang ma huta ai.
32 Ibere Jahowa ma homa age Lakis hu tangan ni Israel, gabe itaban ma huta ai padua-arihon; anjaha itampuli sidea ma ganup marhitei podang, sagala na manggoluh ibagas huta ai, usih songon na binahenni hu Libna.
33 Ijia ma tangkog si Horam, raja hun Geser, laho mangurupi Lakis; tapi italuhon si Josua ma ia rap pakon bangsani, ronsi sahalak pe lang dong na tading.
34 Dob ai bingkat ma si Josua rap pakon ganup Israel hun Lakis hu Eglon; marsaran ma sidea ijai, anjaha iporang ma huta ai.
35 Jadi itaban sidea ma huta ai bani ari ai, anjaha itampuli ma bani podang sagala na manggoluh ibagas huta ai; isiapkon ma bani ari ai, usih songon na binahenni hu Lakis.
36 Dob ai bingkat ma si Josua rap pakon Israel hun Eglon hu Hebron, anjaha iporang ma huta ai.
37 Jadi itaban sidea ma huta ai, italuhon ma ai marhitei mata ni podang, rajani pakon sagala dusunni pakon sagala na manggoluh na ibagas ai; sahalak pe lang ipalopas maluah, usih songon na binahenni hu Eglon. Isiapkon ma huta ai rap pakon sagala na marhosah na ibagas ai.
38 Dob ai mulak ma si Josua rap pakon Israel hu Debir, anjaha iporang ma huta ai.
39 Itaban sidea ma huta ai ronsi rajani pakon sagala dusunni, ibunuh ma sidea marhitei mata ni podang, anjaha isiapkon ganup sagala na marhosah na ibagas ai, sahalak pe lang ipalopas maluah; songon na binahenni hu Hebron pakon hu Libna ampa rajani, sonai do ibahen hu Debir pakon hubani rajani.
40 Sonai ma panaluhon ni si Josua bani haganup tanoh ai, tanoh dolog, tanoh dangsina, tanoh hondot pakon raboyon-raboyon ampa sagala rajani; sahalak pe lang ipalopas maluah, tapi isiapkon do haganup sagala na marhosah, songon na pinarentahkon ni Jahowa, Naibata ni Israel.
41 Italuhon si Josua ma sidea, hun Kades-Barnea nari das hu Gasa, pakon ganup tanoh Gosen das hu Gibeon.
42 Ganup raja-raja ai pakon tanohni itaban si Josua, sahali marporang tumang; ai Jahowa Naibata ni Israel do marporang mangkopkop Israel.
43 Dob ai mulak ma si Josua rap pakon ganup Israel hu parsaranan na i Gilgal.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA