Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana Mosa, abdina PANGERAN rowa, seda, PANGERAN adhabu ka gantena Mosa, iya areya Yusak, pottrana Nun,
2 dhabuna, "Mosa Tang abdi rowa la mate. Sateya mara ba’na ban sakabbinna ommat Isra’il akes-rengkes, pas alengka Songay Yordan, maso’ ka nagara se bi’ Sengko’ ebagi ka reng-oreng jareya.
3 Sengko’ la ngoca’ ka Mosa ja’ dhaera se elebadi ba’na bi’ Sengko’ la ebagi ka ba’na ban ka sakabbinna Tang ommat.
4 Batessa dhaera ba’na jareya molae dhari sagara beddhi e bagiyan lao’ sampe’ ka Pagunongan Libanon e bagiyan dhaja, ban dhari Songay Efrat se raja e bagiyan temor, terros sakabbinna nagara Het sampe’ ka Tase’ Tengnga e bara’.
5 Saomorra ba’na, tadha’ se bisa’a makala ba’na, Yusak. Sabab Sengko’ abarengngana ba’na terros akantha se abarengnge Mosa lamba’ rowa. Bi’ Sengko’ ba’na ta’ edina’agiya kadibi’an.
6 Ba’na payakin ban pabangal, sabab ba’na bakal mimpina bangsa jareya e bakto ngobasane nagara se bi’ Sengko’ la ejanjiyagi ka bangatowana.
7 Pandha’na, ba’na kodu yakin ban bangal ongguwan. Ba’na kodu ajaga sopaja ba’na ta’ada ka sakabbinna hokom se eajarragi Mosa Tang abdi rowa ka ba’na. Ja’ sampe’ badha se eenthengngagi, me’ olle ba’na ahasel.
8 Ketab hokom rowa baca’agi terros ka Tang ommat. Ajari ketab jareya terros seyang malem, me’ olle ba’na ajalannagi sabarang se kasebbut e dhalemmanna. Mon ba’na ajalannagi kom-hokom jareya kabbi, odhi’na ba’na bakal ma’mora ban ahasela.
9 Kaenga’e ja’ Sengko’ la nyoro ba’na sopaja ba’na yakin ban bangal atena! Ba’na ja’ sampe’ tako’ otaba korang samangat, sabab ba’na entara dha’ emma bai ros-terrosan ebarengnge Sengko’, GUSTE Allahna."
10 Yusak pas makon para pamimpinna ommat Isra’il
11 alengleng e parkemahanna ommat Isra’il sopaja manapa’ papakon reya, "Mara asadhiya sango, sabab tello are aggi’ ba’na kabbi kodu alengka Songay Yordan ngobasa’ana nagara se eparengngagi ka ba’na bi’ GUSTE Allahna."
12 Ka suku Ruben, suku Gad ban saparona suku Manasye, Yusak adhabu,
13 "Kaenga’e, Mosa, abdina PANGERAN rowa la malae ba’na ja’ tana e temorra Songay Yordan rowa la eparengngagi ka ba’na bi’ GUSTE Allahna, epadaddi nagarana ba’na.
14 Ana’ binena sarta ebinna ba’na olle paggun neng e dhinna’, tape tantarana kodu asadhiya kaangguy aperrang to-sabakto, sarta mangkat ajangadha’i reng-oreng Isra’il laenna alengka Songay Yordan. Ba’na kodu nolonge reng-oreng Isra’il jareya
15 sampe’ reng-oreng jareya ngobasane ban ngennengnge nagara e bara’na Songay Yordan se eparengngagi ka reng-oreng jareya bi’ GUSTE Allahna. Saellana bangsa Isra’il eparenge odhi’ aman kabbi bi’ PANGERAN, ba’na olle abali ka tanana dibi’ e temorra Songay Yordan, se eparengngagi ka ba’na bi’ Mosa, abdina PANGERAN rowa."
16 Suku Ruben, Gad ban saparona suku Manasye laju nyaot kabbi, "Ponapa se edhabuwagi panjennengngan sareng abdina elakonana; epakona ka’amma saos sareng panjennengngan, abdina mangkada.
17 Abdina padha ta’ada ka panjennengngan, akadi se ta’at ka Mosa. Moga-moga GUSTE Allah kasokana asarengnge panjennengngan saterrossa, akadi se asarengnge Mosa.
18 Pasera se ta’ poron atoro’ ka kakobasa’anna panjennengngan badhi eokom mate. Panjennengngan kodu yakin sareng bangal!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA