¹ Aha yaklakam kim Yesus asa golesek gweka, ki zebe zi nwe diminni hla laꞌak. Zeno nwena jaha gwennak ki hendep dimin neblak.
² Ëe zere hon de ang ta gwen wenya dekam zebe Yesussu lakensiblik, “Guru, nara karek gweka? – an zep ki zini an jaha gwennak hendep nwe dimin gwekaye. San ha zen jaha gweblan sremnak karek gweka? San ha an-bi zik mo karek nakon ki gweka?”
³ Ki zep ap ding gulzimki, “Zen zi mo karek nakon hom ki gweka. Zen an mae hap ki nwe dimin gweka– dekam de zi Alap mo sosonsa zebon hlaun hup.
⁴ Nen nama ngatannake lowe heꞌan, zep angkam nama lwaꞌan– dekam de nen Alap mo syalsa gol gwen hapye, Asa men kirekam de syal gwen hap zer sonekaye. Hwena kawesin hip de yaklanak sa hen hatal. Dekam zini toton bejen syal gwen.
⁵ Ëe de nama okamanak gwenkam, Ëe an Zen– okamana an hap de ngatan naye.”
⁶ Kirekam kim gubiridaka, ki zep ol tepna kamanak tipsiki, desa zep son naban siri gulku. Dekam zep zini in mo nwena dra soblaka.
⁷ Ki zep hwena gubluka, “Wake, aili hona Siloamk ngan sosuk.” Aili hona in mo bosena “Siloam” zen enlala naban. Neno mae mo olkam, “Zer Sonen.” Kim ze ngan sosuku, dekam zep hendep kara gweka, ki zep gol san dep song gweka.
⁸ Zere mo gol golek denak de wenya hen men zen mwin-mwankam hla da gwek dekam zep denggwan gweblaꞌak, “An san ha zen hom? – men zen ora alpnak de nikirin nikon te-ala hap nesa aberbe ta gwibirkiye.”
⁹ Ahakon man egu gweꞌak, “An zen.” Hwena ahakon man egu gweꞌak, “Zen hom. An deban nwe-masena apdenak.” Hwena Zen zep zenaka kira ta gweꞌanka, “Ëe an dwan zenke.”
¹⁰ Ki zep dakensik gweblaꞌak, “Em banakane kara gwera? Nara emsa dawem tala?”
¹¹ Ki zep ding gul gwizimꞌinka, “Zini bosena Yesus kama bleblesa syal gwibiri, dekam zep ano nwena ap dra soblala. Ki zep hwena asa gublula, ‘Aili hona Siloamk ngan sosuk.’ Kime ze ngan sosul, dekam zebe kara gwer.”
¹² Dekam zep dakensiblik, “Zini in angkam endawe gweꞌara?” Ki zep ding gulzimki, “Ëe home tawa gweblaꞌan.”
¹³ Dekam zep in zen nwe dimin nikon dawem gweka desa Farisikam de zi hip dikim zerteizimdin hip nerhak.
¹⁴ Yaklana in dekam Yesus kama bleblena syal gwibirki hen dawem taka, zen Hari Sabatkam.
¹⁵ Farisikam de zini zen hen man dakensik gweblaꞌak, “Em banakane kara gweka?” Desa hen man ding gulzimki, “Zen ano nwena kama bleblekam dra soka. Kime ngan sosuk, dekam zebe kara gwek.”
¹⁶ Farisikam de zini in ahakon dekam zep egu gweꞌak, “Zini in Alap mo zer sonen naka hom, sap zen Hari Sabat hap denaka ngip gul gwenda.” Hwena ahakon man egu gweꞌak, “Hwena kareksa de gol gwen zini, zen bejen owas-owasna syal gwibin– zen in kirekam syal gwe-gwibiridaye.” Zen in zep ehliwek.
¹⁷ Ki zep etan zini insa dakensiblik, “Zep ena banakane enlala gweblaꞌara? – sap zen eno nwesa dawem soka.” Ki zep ding gulzimki, “Zen Alap mo olsa de ayang gul gwizimdin hip de zi sike.”
¹⁸ Hwena Yahudi mo mam-mamna in hom anakan daibliblaꞌak, “Zen menkam eiwa nwe diminni,” dekam zep an-bi zemka kwang nosok– desa de hen takensizimdin hip.
¹⁹ Ki zep dakensizimk, “Zen san eiwa eno nik mo tane? San eiwa nwe dimin nikae ki hendep jaha gweka? Zen ki angkam banakan kara gweka?”
²⁰ Ki zep ding ulzimk, “In eiwa, ano nik mo tane sake. Eiwa, zen nwe dimin nika ki jaha gwek.
²¹ Hwena ee tawa naka hom– zen banakarekam mes yap angkam kara gweka? Men zen dawem taka ee hen home tame laꞌan. Zen mes dwan-am zise gweka. Amki zena en naka lakensik gweblak.”
²² An-bi zem kirekam ding ulzimk, sap zen man Yahudi mo mam-mamna insa anakare hap airibiridaꞌak, “Zen sa nesa karek nosol.” Sap Yahudi mo mam-mamna anakan mes ola aha-en nuk, “Zi de anakan gunnu, ‘Yesus zen eiwa Alap mo Zer Sonenna– nesa de ngaya tabin hip,’ desa esa but srem gola kon olealsa sone gwibir.”
²³ In zep an-bi zem in anakan ding ulzimk, “Zen mes dwan-am zise gweka. Amki zena en naka lakensik gweblak.”
²⁴ Ki zep etan zini insa tilzin hap nenblak, zao zep nenblak, “Emki nglinak de Zi mo nwe kara gwennak asa eiwakam gubiridan! Sap zini in zen emsa dawem taka, ee mese tawa eblak: Zen kareksa de gol gwen zi.”
²⁵ Ki zep ding gulzimki, “San ha eiwa kareksa de gol gwenna? San ha hom? Ëe home desa tawa gweblaꞌan. Hwena aha-ene tawa gwibiꞌin: Ëe menkam nwe diminni. Hwena angkam ee mese kara gwek.”
²⁶ Ki zep etan dakensiblik, “Zen banakarekam emsa gweblaka? Banakan eno nwena dawem soka?”
²⁷ Ki zep ding gulzimki, “Ëe mese desa emsa tonbiridal, hwena em ema asa asalsiblil. Em ba habe desa de etan esane gwen hap edwam gweꞌan? Ki san ema hen edwam gweꞌan– zebon de ang ta gwen hapye?”
²⁸ Dekam zep lamang tan naban nenblak, “Em in zi karekna in hon de ang gwe-gwenna! Ëe an Musa Baksa de ang gwe-gweblanna.
²⁹ Nen mese etawa gwek: Alap ki Musa Bak hap ola ton sone gweblaka. Hwena Yesussu home anakan tawa eblaꞌan, ‘Zen tri ta seꞌara.’”
³⁰ Ki zep ding gulzimki, “Hwena an wehasa hom! Em home anakan tawa eblaꞌan, ‘Zen tri ta seꞌara,’ hwena zen ano nwesa dimin nen naka dawem soka.
³¹ Nen mese etawa gwek: Alap karek gol gwen zisi bejen salblan. Hwena zi de Alapsa betek gweblanna, hen zeno dwam gwibin sin ang gwe-gwenna, desa man salbirida gwenda.
³² Okamana ansa de yang gulsun nukon hom tangane anakan esak, ‘Zini man nwe dimin nika de jaha gwen zi bose zemka dawem taka.’
³³ Zini in de Alap onakon hatazan sremkam, zen molya banakare owas maena syal gwibirinam.”
³⁴ Ki zep hwena ding nulblik, “Em in karek gol gwen naka de jaha gwenna, hwena angkam ema tim guꞌura, ‘Ëe asa Yahudi mo mam-mamna ansa tawa tabir!’” Ki zep hendep but srem gola in kon neralsa sonek.
³⁵ Yesus kim salblaka, “Zini mensa mes neralsa soner,” ki zep teblaka. Kim hla taka, zao zep takensiblika, “Em san ema ngatan zi mo lang nakore Zi Tanganna anakan taibliblaꞌara? – ‘Zen Alap mo Zer Sonenna.’”
³⁶ Ki zep ding gulbluka, “Aya Bak, Zen nara Zi? Tame tankam ee amaka taibliblaꞌan.”
³⁷ Ki zep ze gubluka, “Em mese Desa hla tanda. Zen an Debane ola lonꞌnara.”
³⁸ Ki zep ding gulbluka, “Bian, ee ama Emsa taibliblaꞌan!” Dekam zep ze boklena kom soblaka.
³⁹ Yesus ki zep kitak asa gubiridaka, “Ëe kire habe okamanak hatazak– okamana awe de zisi de anakan klis gun hup: Nwe dimin wenya zen sa ekara gwer. Hwena ekara gwen wenya, zen sa enwe dimin gwer.”
⁴⁰ Ahakon Farisikam de zini men zen ze dekam lowe heꞌak hen sane daꞌak, ki zep dakensiblik, “Eno ol gulk sun de blaoranna in, san ha ema asa hen gubiridala? – ‘Em in nwe diminni.’”
⁴¹ Ki zep ding gulzimki, “Em de eiwakam enwe dimin gwenkam, dekam molye emsa gubiridaꞌanam, ‘Em ema ekarek gwenan.’ Hwena em ema ek enkam egunun, ‘Ëe nwe dimin nika hom,’ zen dekon zebe ekarek gwenan.”