Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jenari mulihken Jesus ku Jerusalem guna ngerayaken wari raya kalak Jahudi.

² I Jerusalem, deherken "Pintu Gerbang Biri-biri," lit sada kolam si igelari Betesda i bas cakap Heber. Kolam e lit lima serambina.

³ I bas serambi e nterem kalak si penakiten medem; lit si pentang, lit si cempang bage pe lit si mate serapen. (Itimaina lau e erburak,

⁴ sabap lit paksana lau e erburak ibahan malekat Tuhan si nusur ku bas kolam e. Kalak si tangtangna bengket ku bas kolam e asum launa erburak malem penakitna, amin sakit kai pe ia. Bage me pengakap kalak.)

⁵ Lit pe i je sekalak si nggo telu pulu waluh tahun dekahna ia penakiten.

⁶ Idah Jesus ia ampar i je janah IetehNa maka nggo ndekah ia sakit. Emaka nina Jesus man bana, "Atendu kin gelah malem penakitndu?"

⁷ Ngaloi si penakiten e, "O Tuan, la kap lit kalak si namaken aku ku bas kolam e asum erburak launa; asum kupala-palai ku bas, nggo lit kalak si deban leben asa aku."

⁸ Nina Jesus man bana, "Kekekenlah, angkat amakndu jenari dalanken!"

⁹ Paksa si e pe minter malem penakitna. Iangkatna amakna jenari erdalan ia. Si enda jadi asum wari Sabat kalak Jahudi.

¹⁰ Emaka nina kalak Jahudi si erkuasa man kalak si nggo malem e, "Wari Sabat kap sekalenda. Rikutken Undang-undangta la banci ibabandu amakndu e."

¹¹ Ngaloi ia, "Nina kalak si nggo pepalem aku ndai, 'Angkat amakndu jenari dalanken.'"

¹² Jenari nungkun kalak Jahudi e, "Ise kin si nuruh kam e?"

¹³ Tapi la itandai kalak si nggo malem e ise si mpepalem ia, sabap nterem kal i je jelma, janah Jesus nggo lawes arah tengah jelma si nterem e.

¹⁴ La ndekahsa kenca si e, jumpa Jesus ras ia i Rumah Pertoton. Nina Jesus man bana, "Genduari kam nggo malem; olanai bahan si la ngena ate Dibata, gelah ola jadi man bandu keleken asa si nggona."

¹⁵ Jenari lawes kalak si nggo malem e, iberitakenna man penguasa-penguasa kalak Jahudi maka Jesus kap si mpepalem ia.

¹⁶ Perbahan si e idarami kalak Jahudi e dalan guna niksa Jesus, sabap ipepalem Jesus kalak si penakiten i bas wari Sabat.

¹⁷ Tapi nina Jesus man kalak Jahudi e, "BapangKu erdahin kap lalap; emaka Aku pe arus erdahin."

¹⁸ Megi kata Jesus enda, ergegehna kalak Jahudi ndarami dalan munuh Jesus; sabap iakap kalak Jahudi labo saja undang-undang wari Sabat ilanggar Jesus, tapi ikataken Jesus pe maka Dibata e BapaNa, alu bage ipeseri Jesus bana ras Dibata.

¹⁹ Jenari ngerana Jesus man kalak Jahudi e, "Kukataken man bandu: Situhuna kai si ibahan Anak e labo rikutken sura-SuraNa. Kai i IdahNa ibahan BapaNa, e nge si IbahanNa.

²⁰ Perbahan Bapa e erkeleng ate nandangi AnakNa, IcidahkenNa man Anak e asa kai si IbahanNa. IcidahkenNa me pe man Anak e si terbeliden, gelah reh mamangna atendu kerina.

²¹ Bagi nggo ipegeluh Dibata mulihi kalak si nggo mate jenari IberekenNa kegeluhen man bana, bage me pe ibereken Anak e kegeluhen man kalak si ndalanken PeratenNa.

²² Bapa e labo ngadili ise pe. Tapi kuasa guna ngadili nggo IberekenNa man AnakNa,

²³ gelah kerina kalak mpehaga Anak e, bagi mpehaga Bapa. Ise la mpehaga Anak e, Bapa si nuruh Anak e pe la ipehagana."

²⁴ "Kukataken man bandu maka kalak si megiken katangKu, dingen tek man si nuruh Aku, ialokenna kap kegeluhen si tuhu-tuhu si la erkeri-kerin. Ia lanai iukum tapi nggo pulah i bas kematen nari janah ndatken kegeluhen.

²⁵ Kukataken man bandu: Tuhu-tuhu reh me paksana janah nggo seh pe; ibegi si mate me sora Anak Dibata, janah si megisa e nggeluh me.

²⁶ Bagi nggo ibereken Bapa kegeluhen man kerina si nasa nggeluh, bage me nggo ibereken Bapa man Anak e kuasa mereken kegeluhen.

²⁷ Bage pe ibereken Dibata man Anak e kuasa guna ngadili sabap Anak Manusia e me si isuruh Dibata.

²⁸ Ola atendu mamang kerna si enda; sabap reh me paksana maka kerina kalak mate si i bas kuburen megi sora Anak e,

²⁹ jenari ndarat me ia kerina i bas kuburen e nari. Kalak si nggo erbahan si mehuli ipekeke guna nggeluh; tapi si jahat perbahanenna ipekeke guna iukum."

³⁰ Tole nina Jesus, "Aku la ngasup erbahan kai pe alu gegehKu sisada; Kuadili kalak rikutken perentah Dibata, emaka rembang tengah nge keputusenKu, sabap labo Kubahan bagi ate-ateKu, tapi rikutken peraten si nuruh Aku nge."

³¹ "Adi Aku nurikenca kerna diringKu, la kap teraloken kai si Kuturiken e.

³² Tapi lit kap kalak si deban si erberita kerna Aku, janah Kueteh maka kai si iberitakenna e tuhu.

³³ Nggo isuruhndu persuruhenndu njumpai Johanes, janah nggo ituriken Johanes si tuhuna kerna Aku,

³⁴ Aku labo perlu manusia naksiken kerna Aku, tapi Kukataken enda man bandu gelah kam terkelin.

³⁵ Johanes bali kap ras lampu si gara dingen ersinalsal, janah nggo meriah ukurndu kentisik ngaloken sinalsalna e.

³⁶ Tapi i bas Aku lit saksi belinen asa si isaksiken Johanes, e me: Dahin si Kudahi si ibereken Bapa e man bangKu. Arah dahin si Kudahi, teridah kap maka Dibata nge si nuruh Aku.

³⁷ Janah Bapa si nuruh Aku e pe nggo ersaksi kerna Aku. Langa pernah ibegindu SoraNa ntah idahndu AyoNa.

³⁸ La ibegindu KataNa, sabap la kam tek man si IsuruhNa.

³⁹ Ipelajarindu Pustaka Si Badia sabap iakapndu idatndu me kegeluhen si tuhu-tuhu si la erkeri-kerin i bas Pustaka Si Badia nari. Situhuna Pustaka Si Badia e pe erberita kerna Aku nge!

⁴⁰ Tapi la kam nggit ndahi Aku guna ngaloken kegeluhen e."

⁴¹ "Labo Kuarapken manusia muji Aku.

⁴² Sabap Kutandai nge kam kerina; Kueteh nge maka i bas ukurndu labo atendu keleng Dibata.

⁴³ Aku reh i bas kuasa BapangKu, tapi la Aku ialokenndu. Tapi adi kalak si deban reh i bas kuasana jine ialokenndu ia.

⁴⁴ Perbahan kam ersura-sura gelah ipujiken temanndu manusia, la lit sura-surandu gelah ipujiken Dibata si tuhu-tuhu, emaka la kam banci tek man bangKu.

⁴⁵ Amin bage gia ola iakapndu Aku si ngaduken kam man BapangKu. Tapi Musa si iarap-arapkenndu e nge pagi si ngaduken kam kerina.

⁴⁶ Adi tek kin kam man si Musa, tek nge pe kam man bangKu, sabap Musa pe nuratken kerna Aku nge.

⁴⁷ Tapi adi la kam tek kerna kai si isuratken Musa, emaka la kam tek kerna kai si Kukataken."

Yohanes

Video Yohanes 5

Ikuti Kami:

KONTAK | PARTISIPASI | DONASI