¹ Pilatus ki zep jana zisi gubiridaka– Yesussu de zerhan hap, zao de mam enkam tangolen hap.
² Jana zini in dekam zep dokot te ngi-ngisa mlin-mlin nuk, desa zep nolak ala nul soneblak– teipsin zi hip de emaskam de weir sosublun makare naka. Zen hen teipsin zi hip de bajusa, sam dan kil makare naka, ala nosoblak.
³ Zena zao zep botonkam blikip neisik gweblaꞌanzak– anakare swre tan ola ban, “Dawem, bian. Em in zen– Yahudi mo teipsin niye.” Kire ola ban zep nwe-mase san lek-lek da gweꞌak.
⁴ Etan kim ner halzak, Pilatus ki zep etan wet sobirida zaka, ki zep ze gubiridaka, “Emki hla tan. Ëe ama etan ep zertreizimꞌin– em dikim anakan etawa gwen hap, ‘Ëe home zeno karekna hlaulblunan.’”
⁵ Yesussu kim nerwet soꞌanzak, dekam nama ngi nabare dokot te weir sosun nuban hen teipsin zi hip de baju naban. Pilatus dekam zep gubiridaka, “An zen– zini inye.”
⁶ Hwena Alap mo golak de mam-mam wenya hen Alap mo golak de jana nabare zi mo mam-mamna kim hla dak, dekam zep ol mamkam egu ane gweꞌak, “Desa te-lidak sonnak makan laink. Te-lidak sonnak makan laink.” Pilatus ki zep hwena ding gulzimki, “Ki amki e-en te-lidak sonnak makan laink, sap ee home mae karekna hlaulblul.”
⁷ Hwena Yahudi zini in dekam zep ding nulblik, “Are mae mo titi tabin olak zen eiwa tan hap dena, sap zen man zenaka gubluka, ‘Ëe an Alap mo Tane.’”
⁸ Pilatus kim kirekam sane gweꞌanka, dekam zep dawemkam airiꞌanka.
⁹ Dekam zep etan gol zebon til halka, hen dekon zep etan Yesussu de zertilzin hap gubiridaka. Kim nertilzik, zao zep takensiblika, “Em in enda kone hata zaka?” Hwena hom ding gulbluka.
¹⁰ Dekam zep gubluka, “Em san ema asa de ding gulblun hap baes gweꞌara? Ki san abon onak hom? – emsa de zeser sonen hap denaye, ahaksa emsa de te-lidak sonnak makan ta irin hip denaye.”
¹¹ Dekam zep ding gulbluka, “Alap de ebe hap golblan sremkam, dekam eno sosonna hom– dekam de Asa banakan mae gweblan hap denaye. Zen zep, zini men zen Asa ebe hap nergublul, zeno mae mo karekna man ebon onakon taman kiniꞌan.”
¹² Pilatus kim kirekam salblaka, dekam zep wet soka, zao zep sap zi beyana insa etan gubiridaka– dekam de Yesussu zeser sonen hap. Hwena Yahudi zi mo mam-mamna in man ol mamkam anakan egu ane gweꞌak, “Ki san em hen Romak de teipsin tangan zi nik mo jal zi?! Yesus in man zenaka gu gweblaka, ‘Ëe an eno mae mo teipsinni.’ Kirekam de gunnu, zen neno mae mo Romak de teipsin tangan zi nik mo jal zi. Eme zeser soneꞌanka, dekam man nwe-mase gweꞌan: Em hen neno mae mo Romak de teipsin tangan zi nik mo jal zi.”
¹³ Kirekam kim salbiridaka, dekam zep Yesussu de zerwet son hap gubiridaka. Zena dekam zep klis gun hup de komal tum yawalak nikin aneka. Homanna men zewe nikinki, orep mes bose nuk “Kaso Homan”kam. Desa Ibrani olkam man nen gwibirin “Gabata”kam.
¹⁴ Yakla nwena dekam bolak mes zauku, hen yaklana in, Paska hap de yaklana enamna, kim Paskanak dep de kambingni damerak– dekam de kaꞌan aumwa hap tembane yawalsa hohle gun hup. Pilatus dekam zep gubiridaka, “An zen, eno mae mo teipsin niye.”
¹⁵ Hwena zi beyana in man etan mamkam egu ane gweꞌak, “Jek-jak lak! Jek-jak lak. Te-lidak sonnak makan laink.” Pilatus dekam zep takensibiridaka, “San ki ee asa ere mae mo teipsin zini ansa te-lidak sonnak makan tain?” Alap mo golak de mam-mam wenya dekam zep ding nulblik, “Ano mae mo teipsin zini aha-en– Romak de teipsin tangan zi niye. Ahana hom.”
¹⁶ Hendep ki zep Pilatus te-lidak sonnak de makan ta irin hip zerguzimki. Jana nabare zini dekam zep hendep irik dahak.
¹⁷ Yesus hup dekam zep zere hap de te-lidak soblanna we noso soneblak. Ki zep hendep we so halka, hendep kwatap tek bosena Zi Nol Swrak zihataka. Ibrani olkam man desa nen gweblanan “Golgota”kam.
¹⁸ Zao zep te-lidak sonna iwe makan daink. Zao aha darena hen man makan nosoink– Yesus mo eihya-lip eihya-lipkam. Zenaka ngirinnik.
¹⁹ Pilatus man gubiridaka– dekam de Yesus mo te-lidak sonnak anakarekam de ol ale gunsu makan gul irin hip, “An Nazaret walya Yesus– Yahudi zi mo teipsinni.”
²⁰ Yahudi zini beyakam ol ale gunnu insa baca nul gweꞌak, sap men zewe makan daink, zen Yerusalem kon langanak hom. Hen zen dan-ahare olkam ale nuk: Ibrani olkam, Roma mo olkam, hen Yunani olkam.
²¹ Alap mo golak de mam-mamna dekam zep Pilatussu nenblak, “Emki alena insa de wet gulsun hup gubiridan. Bap zen anakan lwan, ‘Yahudi zi mo teipsinni.’ Diki anakan de ale gun hup emaka gubiridala, ‘Zini an man zenaka gu gweblaka, “Ëe an Yahudi zi mo teipsinni.”’”
²² Hwena Pilatus man ding gulzimki, “Men kirekame ale gun hup gubiridal, mes ki kire enkam ale nul. Wet gulsun hup ama baes gweꞌan.”
²³ Dan-ner dan-nerkam de jana nabare zini kim Yesussu te-lidak sonnak makan da inꞌik, dekam zep zeno pakeanna zere mae hap hli-hli dak. Hwena olk de baju blal zemka man neizim kinik. Zen dawem tanganna, yan wei maena hom, zep kalk son hap baes neizimk.
²⁴ Dekam zep zenaka nenbiridak, “Bap nen kalk son. Nen esa dobe abukam dam lasil– zen de teisyan hapye.” Zen dekam zep tame gun sremkam syal neibik– mensa Alap mo olak orep hamal hap anakan ale nukye, “Zen sa ano pakeanna hli-hli dal. Hen ano bajusa de teisyan hap de zini, dobe abukam sa dam dasil.” Kirekam mes ki hamal hap dena Alap mo olak lwak, zen zep ki kirekam hendep tame gun sremkam syal neibik.
²⁵ Yesus mo te-lidak son golek denak we walya hen man ze ezauꞌuk: An zem Maria, an zik mo osona, hen Klopas Bak mo wenya– zen hen bosena Maria, hen ena Magdala kore wenya Maria.
²⁶ Yesus hon de ang ta gwen zini ahana zao hen golek zauꞌunka– mensa Zena kwasang gwe-gweblakake. Yesus kim an zemka hlaulku, hen zere hon de ang gwe-gwen zini insa hla taka, dekam zep an zemka gubirki, “Anyan, in zen, eno tanena. Zen zen sa hwena ano tim bwanak emsa golgwe gwera.”
²⁷ Zere hon de ang gwe-gwen zini insa ki zep hen gubluka, “Eno anena in zen.” Yaklana inkam zep hendep nonola zere mo golak golgweka.
²⁸ Yesus kim tame gulku, “Ëre mo syala kitak mese sul sonenan,” dekam zep gu aneka– mensa hamal hap ale nukke Alap mo olak, Zen de anakan gun hup dena, “Ëe ama ho-hole gweꞌan.” Zen Alap mo ola insa dikim hen sul sonen hap ki kirekam gu aneka.
²⁹ Zao hen ki– kama ngatdarakkam de blome betekna, anggur ho enen naban. Jana nabare zini in dekam zep yera jaubum makare naka anggur hona iwe os nul inek, desa zep te bosena hisop tek gwenkam Yesus mo mipnak dep noltre seblak.
³⁰ Kim akasibirki dekam zep gu aneka, “Ano syala angkam mes sowe henan.” Dekam zep nola hondang gwebla hanaka, hendep tilsiki.
³¹ In kim Yesussu te-lidak sonnak makan daink, yaklana Jumatkam. Yahudi mo mam-mamna man anakan edwam gwek, “Te-lidak sonnak de zi dan-aharena in, bap zen Hari Sabatnak nama etehe sonen.” Mae hap kirekam edwam gwek: Sap kaꞌan Hari Sabat yawal– Paska hap dena. Zep Yahudi zi mo mam-mamna Pilatussu abe dak, “Emki gubiridan– dekam de te-lidak sonnak de zi mo balaka tadrebir-zimdin hip, dekam de nabakam juwen hap, hen nabakam dikim lup guluhen hap.”
³² Jana nabare zini dekam zep sek gwezak, dekam zep balaka kam nosozimk– zi darena mensa Yesus mo irgwa taha nakon hen dam taha nakon makan noso inkye.
³³ Hwena Yesus onak kim yaing gwezak, dekam zep hla dak, “Zen mes tili.” Zeno bala zep kam nosobla srem gwek.
³⁴ Hwena ahanik zep zabanak toman nokwa tiyerkam dang gulblula heka. Desan zep kala ban ho naban nabakam su ne hezak.
³⁵ Ëe an zene bukuna ansa syal gwibiꞌin, ee ama ere mo nwekam kara tabiꞌik, in zebe ebe mae hap eiwa gulzimꞌin: Ëe tawana, in eiwa kire tangankam lwak. Ëe mae habe ebe mae hap kirekam eiwa gulzimꞌin: Em dikim hen Yesussu taibliblan hap.
³⁶ An kitak mae hap ki kirekam lwak: Sap zep dena man Alap mo olak hamal hap ale nuk, “Zere mo danna molya kam nosoblak.”
³⁷ Alap mo hamal hap de olak anakan ki hen lwak, “Zini in desa dang nulbliꞌak, zen sa kara dal.”
³⁸ Hyanak ki zep Arimatea walya Yusup Pilatus osan dep song gweka, ki zep Yesus mo tok naka dikim lo tasin hip abe taka. Yusup in sap Yesus hon de ang gwe-gwenna, hwena zen aningkim ang gwe-gweka, sap zen Yahudi mo mam-mam naka airibirida gweka. Pilatus kim gubluka, “Amki,” dekam zep Yesus mo tokna zizeryahe halka.
³⁹ Nikodemus Bak man Yusupsu mas gweblaka. Nikodemus in, men zen orep Yesussu kam zini takake. Zen deban de drenen hap de irase dawem nabare kire-kiresa golhal zaka– muru ban gaharu naban de siri gun nuka. Kire-kirena in, zeno dohonna tiga-pulu empat kilogram enkam.
⁴⁰ Drenen hap de kaso hulak kim nerhatahak, zao zep kaen ngap-ngapkam itatak taka. Kim itatak taꞌanka, irase dawem nabare kire-kirena insa man kaenna iwe nutul sone gweꞌak– deban de tahalen hap, Yahudi zini men kirekam zi tokna neibirida gwenanke.
⁴¹ Men zewe Yesussu te-lidak sonnak makan daink, zewe golek denak te tra nwe-awesna ki. Te trana iwe hwena kaso hul gun esena ki– mensa te-ala beya zi hip hamal nul gublukke. Hwena men zebe hap hamal nulblik, dekam nama hom tiꞌinka.
⁴² Kaso hul gunnu in golek, hen Hari Sabatnak dikim hatan hap aha-ere jam maekam hom lwaꞌak. Zep Hari Sabatnak de syal tan srem hap nabal-bakam aha hap de kaso hul hamal gulblunnak bohekam idre neka.