¹ Zini dekam ki, bosena Lazarus. Zen Yerusalem golek denak ena Betaniak somor dare zeban zigwe gweka– Maria ne Marta ne ban.
² Maria in zen Yesus mo tanana irase dawem nabare minyakkam ngan sosubluk, hen zere mo nol ala blal-blalkam sasa soblak. Hwena nama de ngan sosublun sremnak, aya zem in dekam zep sang-sang gweka.
³ Dekam zep Yesussu anakan en soneblak, “Bian, eno dang tininak de wal bosena man sang-sangna sabak gweꞌara.”
⁴ Yesus kim salka, ki zep asa zere hon de ang ta gwen wenya gubiridaka, “Zeno sang-sangna in tin hip denaka hom. Zen hwena mae hap hla tak: Dekam de ze Alap mo Tanena ano ngatan zi mo lang nakore sosonsa goltreizimdin hip, hen Alap mo bosesa dekon teip gulsublun hap.”
⁵ Yesus sap man Marta, Maria, hen eis zem Lazarus maesa dang tini tabirki,
⁶ hwena kim Lazarussu kirekam salblaka, Zen hwena man ze etan dare yaklakam asa golegweisiki.
⁷ Ki zep hwena asa gubiridaka, “Angkam nen etan Yerusalem mo lang san dep lwan dahan.”
⁸ Hwena ee ama ding ulblik, “Bian guru, ner hom dekon am Emsa kasokam de i tiblan hap alp dasik, hwena angkam ema hohol gweꞌara– nabakam de etan desan lwahan hap!”
⁹ Hwena dekam zep ap gulk sun de ol blaorankam ding gulzimki, “Aha-ere yaklakam yakla nwena dua-blas jam enkam am zil gwenda. Zi de yaklam te naseranna, zen bejen zaran, sap okamana ansa de ngatan gun hup dena dekam man zil ane gwenda.
¹⁰ Hwena kawesinnik de te naserankam, dekam ki altil gwenan, sap dekam ngatanna hom.”
¹¹ Kirekam kim asa gubiridaka, ki zep etan ola ap mas gulzimki, “Neno mae mo wal bosena mes ta guk halka. Ëe ama li tan hap song gweꞌan.”
¹² Ëe hwena dekam ama ding ulblik, “Bian, zen ba hap de duweblan hap? Sap zen de sang-sang hap nisi tankam, zen zen sa totoresa luwera.”
¹³ Hwena Yesus insa ki ola gulk sun “ta guk han”kam blaonka, zeno enlalana, “Lazarus mes tilki.” Hwena ee ama zeno ola tim uk, “Eiwa, nisi taꞌara.”
¹⁴ Zen zep etan damnak asa gubiridaka, “Lazarus mes tilki.
¹⁵ Ëe menkam mae habe tol ngaya tan hap duwebla srem gwek: Sap zen dekam sa eno mae mo Asa de taibliblanna bil gwer. Zep haen, nen duweblan.”
¹⁶ Ëe, Yesus hon de ang ta gwen wenya, ano mae mo ahana Tomas, men desae asyas olkam en gweblak “dan de we son walas”kam, zen zep asa gubiridaka, “Haen, nen ang gweblan– zao eka Bian han apdekam ertik.”
¹⁷ Yesus kim ena iwe asa goleyaing gweꞌan zaka, zao zep nenblak, “Lazarus Bak mes tilki. Mes tol kaso hulak nennek. Angkam zewe yaklana mes dan-ner dan-ner ner.”
¹⁸ Ëna Betania zen Yerusalem kon golek. Zeno langana dan-ahare kilometer enkam.
¹⁹ Zen in zep ze Yahudi zini beyakam Marta ne Maria neka du neizimzik– dekam de zeno nik mo enlwansa se ta sonezimdin hipye.
²⁰ Marta kim anakan sak, “Yesus angkam man golek de gweꞌan zala,” dekam zep ala tablan hap song gwek. Maria hwena hom ang gwibik. Zen man golak gwek.
²¹ Marta kim hla ta guk, ki zep gu gubluk, “Bian, Eme awe gwenanam, ano eisni molya tilinam.
²² Hwena ee tawana: Sap angkam mae de Em ba mae hap Alapsa abe taꞌanam, Zen sa kirekam ebe hap golblala.”
²³ Ki zep ding gulbirki, “Eno osona in sa etan ngaya gwera.”
²⁴ Ki zep hwena ding gulbluk, “Ëe tawana: Zen aumwa hap de yaklanak sa ngaya gwera– tingare ahakore wenya ban.”
²⁵ Yesus ki zep etan gubirki, “Ëe an Zen– juwen nakon de ngaya tabin hip de Zini. Hen hendep de ngaya tabin hip de Zini, Ëe an Zen. Zini men zen Asa taibliblanna, zen sap sa juwe gwer, hwena sa etan engaya gwe-gwer.
²⁶ Hen zini men zen nama de gwennak Asa taibliblanna, zen molya hendep denaban juwek. Em san ema Asa kirekam taibliblaꞌara?”
²⁷ Ki zep ding gulbluk, “Eiwa, Bian, ee mese anakan Emsa taibliblak, ‘Em in Alap mo zer sonen Zi tangan– okamanak de zisi de ngaya tabin hip Dena. Em an Alap mo Tane.’”
²⁸ Marta kim kirekam gubluk, zena ki zep gol san dep lwahak, ki zep oso zem Mariasa i mwa ennak gubik, “Bian Guru mes golek de gwenan zala. Zen man emsa de goltowen hap dwam gweꞌara.”
²⁹ Kirekam kim salbik, nabakam zep luwek, hendep dekam zep ala tablak.
³⁰ Yesus hom dekam enak hataꞌan naka. Zen nama dekon eiszimꞌinka– men zewe Martasa goltowekake.
³¹ Yahudi zi beyana in zen Maria mo enlwansa dikim se ta sonebin hip golak lowe heꞌak, zen kim nabakam de luwe ine kininnak hla nuk, dekam zep enlala neibik, “Zen aya zemka de drenen kaso hulak de gosa gwen hap song gweꞌan.” Zep noltro kinik.
³² Hwena Maria kim abon mae onak hatazak, Yesussu kim ze hla tak, ki zep ze zeno nwenak anakare ola ban ik gwe hezak, “Bian, Eme awe gwenanam, ano ayana molya tilinam.”
³³ Mariasa kim go gwennak kara guꞌunka, hen men zen ang neibirzik, desa de hen aitin-aitin go tannak kara tabinkim, enhona man tangan dowebla hanaka.
³⁴ Dekam zep takensibiridaka, “Em endawe ennek?” Ki zep ding nulblik, “Haen. En esa ki ze kaso hula insa hlaulu.”
³⁵ Yesus ki zep hen gona gweꞌanka.
³⁶ Yahudi zi beyana in dekam zep egu gweꞌak, “Emki hla tan. Zen man sap serkam dang tini taka.”
³⁷ Hwena ahakon man eguk, “Zen ki am zi nwe diminni dawem taka. Ba hap Lazarus Swesa nabakam dawem taza srem gweka?”
³⁸ Ki zep hendep Yesus kaso hulak iwe go gwendan naban goleyaing gweka. Hula insa mes kaso yawalkam mat nulsuk.
³⁹ Ki zep gubiridaka, “Kasona insa em irhi gun.” Marta ki zep ding gulbluk, “Hwena angkam asena karek tangan nakake! Sap angkam yaklana mes-am dan-ner dan-ner ner– drenen hyanakye.”
⁴⁰ Ki zep ding gulbirki, “Men kirekame emsa gubir, em de Asa taibliblankam, em esa ki hlaulu– Alap kim de soson zemka goltreizimꞌinkaye.”
⁴¹ Kasona insa kim irhi nuk, ki zep ngli san kara gwe seka, ki zep Alapsa gu soneblaka, “Bian, Em Asa sam taꞌara, sap ano abena ema sal gwenda.
⁴² Ëe sap tawana: Em home Asa salsik gweblanda. Hwena Ëe mae habe kirekam dawemna ebe hap golblanan– zi beyana an dikim esane gwen hap, hen zen dikim Asa anakan taibliblan hap, ‘An eiwa Alap zer soneka.’”
⁴³ Kim kirekam gu sonesiki, ki zep ol mamkam takenblaka, “Lazarus, em wet sozan.”
⁴⁴ Dekam zep hendep wet so zaka. Taha-tanana nama deyol ngap-ngapkam de tahalenna, hen aha deyola nwe-masenak. Ki zep Yesus gubiridaka, “Dekam hil-hil la soneblak.”
⁴⁵ Zini men zen Maria mo enlwansa de se ta sonebin hip zao lowe heꞌak, kim owasna insa hla nuk, dekam zep beyakam Yesussu daibliblak.
⁴⁶ Hwena ahakon kim lwan dahak, dekam zep Farisikam de gubirida gwen wenyaka nenbiridak– Yesus mo owas syal gwibinni insa.
⁴⁷ Zen zep Farisikam de zini hen Alap mo golak de syal tan zi mo mam-mamna Yahudi zi mo teipsin sinodenak dena kwang nulidak– dekam de egolek de gwen hap. Zao zep egu gweꞌak, “Nen banakan esa eblal? Zini in owas-owasna man beya gul gweꞌara!
⁴⁸ Nen de nwe enkam kara tankam, ki hwena tingan desa sa daibliblal. Dekam hwena desa sa langna ansa de teipsinkim irik gin hip dam dasil. Dekam hwena Roma mo mam-mamna sa nesa jal neibiridal. Ki hwena Alap mo gol yala ansa dekam sa dri nulzir hen neno kore naka sa damerazal.”
⁴⁹ Dekam zep zini bosena Kayafas Bak, men zen tahunna inkam Alap mo golak de syal tan zi nikon teipsiki, zen zep gubiridaka, “Em in enlala joblo-topna!
⁵⁰ Diki dawemna nebe mae hap aha-ere zi de tinni airis– dekakim tingare Yahudi zi juwe srem gwek.”
⁵¹ Kayafas kim kirekam gubiridaka, zen zere en mo enlala nakon hom ki gubiridaka. Tahunna dekam Alap mo golak de syal tan zi nikon zen teipsiꞌinka. Zen in zep, kim kirekam Yesussu de zersin hip sap gubiridaka, hwena man nwe-mase gwek– san de Alap mo olsa de anakan hamal hap ayang gulzimdinni kiye, “Yesus sa tingare Yahudi zisi dikim ngaya tabin hip tili.”
⁵² Hwena Yesus Zen Yahudi zi en hap hom tilki. Zen diki tingare Alap mo hlil irin zi hip, sap Yahudi srem zi, men zen tingare lang san sekwak gwenkam lowe henda gwenanke, desa dikim aha-en gun hup tilki. Hwena Kayafas Bak in kim kirekam guku, zena gulk sun de enlalana hom dam gulsuku.
⁵³ Yaklana inkam zep Yesussu de tan hap ola zim-zim nik.
⁵⁴ Zen in zep dekam Yesus Yahudi zi mo nwe nakon langa gwesiki. Hwena dua-blaskam de wenya asa en zep golesek gweka– e bosena Efrayim san dep, zi srem lang golek denak. Zao zep asa golelowehe gweka.
⁵⁵ Tahunna men kiye, kim Yahudi mo yakla yala Paskanak golek de gwe-gwek, dekam e-e san de wenya beyakam Yerusalemk tagal gwe-gwezak. Dekam yaklana iwe de hatan sremnak nabakam etagal gwe-gwezak– dekam de Alap mo golak otweran maesa de tru ta seblankam zere mae mo karek-kareksa Alap mo nwenak ber-ber gun hup, hen hokam de nola kon zenaka hle tabirida gwen maekam.
⁵⁶ Zen zep zeno mae mo tagal gwen hap de yakla yala inkam Yesussu Yerusalemk de gweblaꞌak. Hen kim Alap mo golak etagal gwe-gweꞌak, dekam man zenaka anakan dakensibirida gweꞌak, “San ha sa yakla yala an hap hata zala? San ha molya? Em banakane enlala eblaꞌan?”
⁵⁷ Hwena Farisikam de zi niban Alap mo golak de syal tan zi mo mam-mam naban mes tingan anakan tawa dabiridak, “Yesussu de hla tankam, nabakam asa enbiridazak, akakim balk lak.”