Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma sira ka 'o dunia ma koisidadikuwasi 'ena 'una gee wisironga 'o Demo 'una nagau. 'O demo 'una ge'ena naga de ma Jo'oungu ma Dutu de 'una kaimatero de ma Jo'oungu ma Dutu.

² Ka ma di-disirakasi 'una naga de ma Jo'oungu ma Dutu.

³ 'O sagala moi-moi 'isikokidadi ma ngekomo 'una. Nako ko 'unawa ge'ena 'okia sonaa 'iodumu 'idadi-dadiku gee ka moi ma koi'iwa.

⁴ 'O Demo 'una ge'ena 'o 'ahu ma titi. De 'o 'ahu ma titi gu'una wo'asa 'o darangi 'o nyawaka.

⁵ 'O darangi ge'ena 'isiwara 'o darusu ma dodaka de 'o darusu koya'akunuwa yasongene 'o darangi ge'ena.

⁶ Naga wimoi ma Jo'oungu ma Dutu wisuloko woboano 'awi ronga 'o Yohanes.

⁷ 'Una woboa wositotara ma ngale 'o darangi ge'ena la 'o nyawa 'iodumu yongaku 'unaka.

⁸ 'O Yohanes 'una ge'ena ko 'o darangiwa. 'Una duga kawositotara ma ngale 'o darangi ge'ena.

⁹ 'O darangi ma dutu gee yakidisiwara 'o nyawa 'iodumika naga 'iboakau 'o duniano.

¹⁰ Ngaro 'o dunia de ma doda 'isidadi ma ngekomo 'una, ma gee 'una woboano 'o duniaka, 'o dunia ma nyawa kowinakowa ma ngale kowingakuwa.

¹¹ 'Una woboa 'awi daeraano ma 'awi nyawa-nyawa kowisidabinowa.

¹² Ma 'o nyawa 'iodumu gee widawongo de wingaku 'unaka, wakidiai 'ona yodadi ma Jo'oungu ma Dutu 'awi ngowa-ngowaka.

¹³ 'Ona yodadi ma Jo'oungu ma Dutu 'awi ngowa-ngowaka ge'ena koimaterowa de ngone 'o nyawa polahiri. Ngone polahiri ge'ena ka 'o nyawa ma du-duaka, ma 'ona yodadi ma Jo'oungu ma Dutu 'awi ngowa-ngowaka ge'ena sababu 'una ma sirete wakisidadi.

¹⁴ 'O Demo gu'una womadadiokau 'o nyawa, de womanoa naga ngoneka, de ngone pamakekau 'awi kumati. 'Awi kumati ge'ena ma Jo'oungu ma Dutuno to 'una 'awi Dea. Ngano 'una ge'ena ma Jo'oungu ma Dutu 'awi Ngowaka womatengo-tengoka. Ma ngekomo 'una, ngone pakokimake ma Jo'oungu ma Dutu 'awi singina ma sure de 'awi dora, de posironga wotiaioka.

¹⁵ 'Unau ge'ena gee 'o Yohanes wositotara wongose 'ato, "'O nyawa nu'unau gee ma sira tosikawasakau 'o nyawaka tongose 'ato, 'Dua wimoi 'asa woboa ma 'una 'ifoloi wi kuasa 'iamoko de de ngoi. Sababu ngoi kotolahiruawasi 'ena 'una nagau.'"

¹⁶ 'Una posironga de wonadoraka de posironga wonasibarakatioka koitogu-togumuwa.

¹⁷ Ma Jou 'awi besesongo wonakula ma ngekomo 'o Musa, ma ma Jo'oungu ma Dutu 'awi dora de 'awi di-diai gee 'itiai ma sala ngoneno wosidumutu ma ngekomo ma Yesus Kristus.

¹⁸ Komoiwasi wimake ma Jo'oungu ma Dutu duga ka to 'una 'awi Ngowaka womatengo-tengoka gee naga de ma Dea de ka 'o singina moi. 'Unau wosidumutu ngoneno ma Jo'oungu ma Dutu ge'ena nagu'una.

¹⁹ 'O Yahudioka manga balu-balusu gee yogogere 'o Yerusalemuoka yosuloko 'o 'imam-'imam de manga ro-riwo gee manga 'asali 'o Lewino yotagi 'o Yohanesika la yosano 'unaka 'ato ngona ne'ena ma kia.

²⁰ 'O Yohanes womasidemo wositi-tiaika wongose 'ato, "Ma Koana 'o Nyawa Wosilaha-laha gee ma Jo'oungu ma Dutu wosijajiokau ge'ena ko ngoiwa."

²¹ De 'ona yosanoli, "Nako koge'ena de ngona ne'ena nagu'una? Ma Nabii Elia?" 'O Yohanes wosango, "Ko'uwa." De yongoseli, "Ngona ne'ena 'o Nabii ma Amoko gee mida-damaa?" 'O Yohanes wosango wongose 'ato "Ko'uwa!"

²² Ge'enaka de 'ona yongoseli, "Nako koge'ena ge'ena nosidemono ngomino ngona ne'ena nagu'una. La ngomi 'idadi miositotara 'o nyawaka gee misulo-suloko ngomino. So moteke ngona, ngona ne'ena ma kia?"

²³ 'O Yohanes wosango, "Ngoiou ne'ena gee ma sirasi ma Nabii Yesaya wongose 'ato: ''O nyawa moi naga 'o tonaka 'ika-kakasaka wosigaso-gasoko wongose 'ato: Niosikatiai 'o ngekomo ma ngale ma Jou woboa.'"

²⁴ Naga yakisulo-sulokino go'ona yamuruo naga 'o Farisioka.

²⁵ 'Ona yosano 'o Yohanesika, "Nako ngona ko ma Koana 'o Nyawa Wosilaha-lahawa, ko 'o Eliawa, de ko 'o Nabii ma Amokuwa, de 'ido'oa so 'o nyawa naki'osiki?"

²⁶ 'O Yohanes wosango, "Ngoi 'o nyawa taki'osiki de 'o 'akere. Ma naga nia sigoronaka wimoi ngini kowininakowa.

²⁷ 'Una woboa woisidu'uruno. Ma ka 'awi tarupa ma gumini tasose ma koyadaenuwa."

²⁸ Ge'ena 'iodumu 'idadi 'o Betaniaka, 'o Yordan ma 'akeroka gee kiaka naga 'o Yohanes 'o nyawa waki'osi-'osiki ma songonasa dina.

²⁹ Ko ma bibinoka de 'o Yohanes wimake 'o Yesus woboa 'unano. De 'o Yohanes kawongosekau, "Ee, gudaue ma Jo'oungu ma Dutu 'awi Domba ma Ngowaka gee wadua-duangou ma ngale watuusu 'o nyawa 'o duniaka ma so-sowono.

³⁰ 'Unau ge'ena gee tinisidemo-demokau 'ato dua wimoi woboa woisidu'uruno, ma 'una 'ifoloi 'awi kuasa 'iamoko, sababu ngoi kotolahiruawasi 'ena 'una nagau.

³¹ Ma sira ngoi ma kotowinakowasi 'una ge'ena ma kia, 'ena momongo ngoi 'o nyawa taki'osiki de 'o 'akere la 'o Israeloka winako 'una."

³² 'O Yohanes wositotara naneda mita, "Ngoi tamake 'o Ngomasa 'Itebi-tebini 'i'uti daku 'o diwanguku 'isoka 'o pombo 'i'uti de 'imanoa 'unaka.

³³ Ma 'orasi ge'ena ngoi kotowinakowasi 'una ge'ena ma kia. Ma ma Jo'oungu ma Dutu wosuloko 'o nyawa taki'osiki de 'o 'akere, 'una wongosekau ngoino konee: 'Gee dua namake 'o Ngomasa 'Itebi-tebini 'i'uti de 'imanoa wimoioka, 'unau 'asa 'o nyawa waki'osiki de 'o Ngomasa 'Itebi-tebini.'"

³⁴ 'O Yohanes wongose, "Ngoi ma sirete towimakekau de ngoi ma sirete tinisidemo 'ato 'una ge'ena ma Jo'oungu ma Dutu 'awi Ngowaka."

³⁵ Ma bibinoka, 'o Yohanes de 'awi do-domoteke yamididi ge'enakauoli.

³⁶ Gee 'o Yohanes wimake 'o Yesus wotagi-tagioko de kawongosekau, "Winilega, gu'unau ma Jo'oungu ma Dutu 'awi Domba ma Ngowaka."

³⁷ 'O Yohanes 'awi do-domoteke yamididi go'ona kayo'isenoka 'o Yohanes koge'ena wongose, de yotagiokau 'o Yesus wimoteke.

³⁸ 'O Yesus womadutumu 'awi dudunisa de wakimake 'ona wimote-moteke, de kawosanokau, "'Okiau nianonu?" 'Ona yosango, "Rabi, kiaka nomanoa?" ('O Rabi ngone tanu, "'o Guru".)

³⁹ 'O Yesus wongose, "Nou, ngini ma sirete nialega!" 'Ona yotagi de de 'una de yamake kiaka 'una womanoa. Ma 'orasi ge'ena poilia 'o takoro soata 'o wange 'icako. Ge'ena ma wange 'ona yomanoa de de 'una.

⁴⁰ Yamididi gee yo'isenokau 'okia naga 'o Yohanes wakisidemoka de yotagi wimoteke 'o Yesus, wimoi ge'ena 'o Andreas, 'o Simon Petrus ma dodoto.

⁴¹ 'O Andreas wosijai-jai winonu 'o Simon Petrus to 'una 'awi riaka, so wimakeno de kawongosekau 'unaka, "Ngomi mimakamakekau ma Koana 'o Nyawa Wosilaha-laha gee wisironga ma Kristus!" Ngone tanu "Ma Jo'oungu ma Dutu Wiiri-iriki."

⁴² Ge'enaka de 'o Andreas 'o Simon wi'otaka 'o Yesusika. 'O Yesus widi-diriidi 'o Simonika de kawongosekau, "Ngona 'o Simon, 'o Yohanes 'awi ngowaka. Ngona 'asa nisironga 'o Kefas." ('O Kefas ge'ena 'o Yunanioka yongose 'ato 'o Petrus, ngone tanu "'O Teto 'Igi-gigie.")

⁴³ Ma bibinoka 'o Yesus waputusokau wotagi 'o Galileaka. De yomakamake de 'o Filipus de kawongosekau 'o Filipusika, "Nou noimoteke ngoi la nodadi 'ai do-domoteke!"

⁴⁴ 'O Filipus 'awi 'asali 'o Betsaida ma kotano, ge'ena la 'o Andreas de 'o Petrus manga gogeroka.

⁴⁵ 'O Filipus yomakamake de 'o Natanael de kawongosekau 'o Natanaelika, "Ngomi mimakekau 'o nyawa gee 'o Musa wingose-ngose naga ma Jo'oungu ma Dutu 'awi besesongo ma bukuoka, de gee 'o nabii yosika-kawasa. 'Una ge'ena 'o Yesus 'o Nazaretino, 'o Yusuf 'awi ngowaka!"

⁴⁶ Ma 'o Natanael wosango, "Tei! Kaidadi? 'o kianikia moi yaowa-owa de 'iboa 'o Nazaretino?" De 'o Filipus wosango, "Nou, ngona ma sirete wonilega!"

⁴⁷ 'O Yesus wimake 'o Natanael woboa de kawongosekau, "Winimake, gu'una 'o Israel toto. 'Una 'awi singina 'itiai."

⁴⁸ 'O Natanael wosano 'o Yesusika, "'Aba, kokia so noinako?" 'O Yesus wosango, "'O Filipus kowoni'asokuawasi 'ena tonimakekau 'o gota ma ronga 'o 'ara ma timiku."

⁴⁹ Ge'enaka de 'o Natanael kawongosekau, "'Aba Guru, ngona ne'ena ma Jo'oungu ma Dutu 'awi Ngowaka, ngona 'o Israeloka ma nyawa 'amia Koana!"

⁵⁰ 'O Yesus wongose, "Ngona nongaku ge'ena duga ka sababu ngoi tongose 'ato tonimakekau 'o gota ma ronga 'o 'ara ma timiku! Dua 'asa namake 'okia sonaa 'ifoloiosi 'ila-laagomo de ge'ena!"

⁵¹ De ge'ena 'o Yesus wongoseli, "Ne'ena tonisidemo tosigou-gounguku, ngona 'asa namake 'o diwanga 'ipelenga de ma Jo'oungu ma Dutu 'awi sagala mala'ekati 'i'uti doa ngoi 'o Nyawa ma Ngowaka 'ai bionoka."

Yohanes

Video Yohanes 1

Ikuti Kami:

KONTAK | PARTISIPASI | DONASI