¹ Ol aisili an Kristus Yesus hup dena. Nonol lone sennak, okamana ansa de yang gulsun sremnak, Zini in mes gweka. Zen Alap han e gweka, hen Alap han man apde eka. Zeno bosena “Alap onakore engaya gwen hap de Ol.”
² Zen nonol lonesen nakon Alap han e gweka.
³ Zen Zen kitak Alap mo gun sun yang tasibirki, hen hom tangan– aha mo yang gulsun nuye.
⁴ Ëngaya gwen hap de ausuna zen Zebon onak. Zep zini engaya gwen hap dena Zebon en nulin gwenan, dekam zep enho nakon engatan gwe-gwenan.
⁵ Zeno ngatanna in okama kawesinnik awe zil ine gwenan. Kawesinni man sap ngatanna insa husus gwe-gwibirin, hwena ber-ber gunnu banakan dep?
⁶ Ki zep hwena Alap zini zer soneka, bosena Yohanis.
⁷ Zen ngatan nabare Zini in hap de olsa tingare zi hip golngeir guzim zika– dekam de zeno ol toran nakon taibliblan hap.
⁸ Yohanis zen ngatansa de golzimdin hip de Zisi hom. Zen hwena zebe hap de olsa de zi hip ayang gul gwizimdin hip de zi.
⁹ Dekam tingare zi hip de ngatansa golzimdin hip de Zini man hatan hap golek de gweꞌanka.
¹⁰ Zep engaya gwen hap de ola bare Zini in okamanak awe orep mes gweka. Zen sap Zen okamanak de zisi yang tasibirki, hwena hom tame dak.
¹¹ Zen zere mo hlil irin zini Israel hon hata zaka, hwena beya nik hom neirink.
¹² Hwena men zen en daibliblak, zen en zep neirink. Zebe mae en hap zep dekam de Alap mo walas hap ejowen hap dena golzimki.
¹³ Zen auhu-kama zi mo we tan en nakon hom Alap mo walas hap ejowek, ahaksa zi zere mae mo dwam gwibin nikon, ahaksa zi mo syal gwibin nikon. Hwena Alap Zen zere mo walaskam dikim eliwehen hap kwang guludaka.
¹⁴ Zep engaya gwen hap de ola bare Zini in zi tangan hap jowe zaka, hendep neban mae golegwe gweka. Ëe ama Desa anakan kara la gwek, “Eiwa, zeno sosonna ngatan zi mo lang nakorena. Sosonna in Bi zem onakorena, sap Zen an Zen– zere mo Tane aha-ere naye. Zen taibliblan tanganna hen kwasang-kwasang enna.”
¹⁵ Yohanis kim hla taka, dekam zep zebe hap dena ol mamkam anakan gubiridaka, “An Zen– asa de zertrozan Zi niye, mensae anakan gubirida gwekke, ‘Men Zen de asa zertroꞌan zaka, Zen mamna. Ëe an betekna. Sap asa de jaha gwen sremnak, Zen orep mes gweka.’” Kirekam Yohanis ol mamkam gubiridaka.
¹⁶ Alap mo Tanena in, Zen kwasang-kwasang enna, zep Zen etan-etankam nebe mae hap dawemna gol gwizimnira.
¹⁷ Sap Alap onakore titi tabin ola, zen Musa Bak nep ayang gulzimki. Hwena Alap de nesa totoresa kwasang gwibirida gwen hap de ol dawemna, zen Kristus Yesus nep golhatazim zika. Ol dawemna in, zen eiwa de tangan naye.
¹⁸ Zini hom tangan Alapsa hla dak. Hwena zere mo dang tininak de Tanena, men Zen aha-en zere mo alpnak gwe gwenda hen apde eka, Zen mes Bi zikhip dena nebe mae hap ayang gulzimki. Zen hen ki Alap.
¹⁹ Yohanis kim hamal hap tonbirida gweka, dekam zep Yahudi mo mam-mamna Yerusalem kon zini lup nul sonek– zen de Yohaniꞌi takensiblin hap. Zen Alap mo golak de syal tan zisi hen Lewi Bak mo ausu nakore zisi lup nul sonek. Kim yaing gwezak, ki zep dakensiblik, “Em san ha an Zen? – mensae kara e gweblananye.”
²⁰ Yohanis dam-dam enkam zep zenaka kira taka, “Ëe an nenaka de ngaya tabin hip de Zisi hom.”
²¹ Ki zep etan dakensiblik, “Ki em nara mo weinak dep de zi? Em san ha diki Alap mo olsa de ayang gul gwizimdin hip de zini Elia Bak Swe? Hwena angkam Yohanis mo bosekame etan hataꞌan zala.” Ki zep ding gulzimki, “Ëe an zeno weinak dep hom.” Ki zep etan dakensiblik, “Ki san ha em Musa mo weinak dep de Alap mo olsa ayang gul gwizimdin hip de zi?” Ki zep ding gulzimki, “Kirekam hom.”
²² Ki zep dakensiblik, “Ki em an nara mo weinak dep dena? Em de enaka kira tan sremkam, ki hwena men zen asa lup nul sonek, ee banakan asa enbiridal?”
²³ Yohanis dekam zep Alap mo olsa de ayang gul gwizimdin hip de zini Yesaya Bak Swe mo ngein sin dep de ol hli yulzimdin nikon ding gulzimki, “Ëe an ‘zi srem lang nakon de anakan taken gwen hap de zi, “Haen, nere mae mo Teipsinni kip nen orasa dam-dam tablan– desan deka hata zaka.”’ Ano syala kirekam.”
²⁴ In zen takensiblin hap yaing gwezak, ahakon hen Farisikam de gubirida gwen zi hon de biti gwenna.
²⁵ Zen dekam zep dakensiblik, “Ki hwena em ba habe baptis ta gwibi'ira? – sap em ngaya tabin hip de Zisi hom, hen Elia Bak Swe ne Musa Swe nik mo weinak dep de zisi hom.”
²⁶ Ki zep ding gulzimki, “Ëe an weyakame baptis ta gwibi'in, hwena eno mae mo ngirinnik ki gweꞌara– Mensa ena tame la srem gweꞌan.
²⁷ Zen asa zertroꞌan zala. Hwena ee an dawem naka hom– Zebon onak de babu gwen hapye. Sap zeno tana maesa de ngan sosublunna, ee toton bejene.”
²⁸ In kitak Betaniak ki lwak, weyana Yordan mo yakla hata sezan san de enak. Yohanis zen zewe baptis ta gwibirki.
²⁹ Kaꞌankam, ki zep Yohanis Yesussu hla ta guku, ki zep gubiridaka, “Ëre wake emki hla tan. Zen in Zen– Alap mo Domba Tane naye. Zen Zen sa Zenaka sosok tala– tingare okamanak de zi mo karek-kareksa dikim ngan gulsuzimdin hipye.
³⁰ Zen in Mensae anakan emsa gubirida gwek, ‘Asa de zertrozan Zini, Zen mamna. Ëe an betekna. Sap asa de jaha gwen sremnak, Zen orep mes gwe gweka.’
³¹ Ëe home menkam anakan tame taꞌak, ‘An Zen– nesa de ngaya tabin hip de Zini inye.’ Hwena Alap asa baptis ta gwibin hip dam tasiki– dekam de Desa Israelk de zi hip zertreizimdin hip.”
³² Hen Yohanis insa hlaulku zen dam-dam enkam anakan tonbiridaka, “Ëe ama Alap mo Enhosa hla taser. Mawana ohola mo kim ati gwesan zala, ki zep hendep ing gwe heblan hap Zebon zau zula.
³³ Hwena Alap mes asa hamal hap anakan gu-gubluka, ‘A dekon esa tame tala: Men Desae hla taꞌanka ere mo Enho de Zebon dep ati gwennak hen ing gwe heblannak, Zen Zen sa hwena ere mo Enhona inkam baptis ta gwibiri.’
³⁴ Ëe hwena namen mese ere mo nwekam hla tal, zen in zebe damnak anakan kira gweꞌan, ‘In eiwa, Zen Zen– Alap mo Tane naye.’”
³⁵ Kaꞌankam etan baptis ta gwibin zini Yohanis zao gweꞌanka. Ëe hen zere hon de ang e gwen zi darena zaoe eꞌak.
³⁶ Dekon zep Yesussu tamarannak kara ta soneꞌanka, dekam zep etan gubiridaka, “In Zen– Alap mo Domba Tane naye.”
³⁷ Ëe kime kirekam asalblak, dekam zebe Yesussu ang eblak.
³⁸ Asa kim ake guku, ki zep lero gwizimdin niban asa takensizimki, “Em basae leibiꞌira?” Ki zebe ding ulblik, “Rabi Bak, eno gwe gwenna endawe?” “Rabi”kam de ol-gunnu, zen Ibrani olkam. Zeno enlalana “guru.”
³⁹ Dekam zep asa ding gulzimki, “Haen. En esa ki ze hla kuli.” Dekam zebe ang eblak, hen ama zeno gwe gwenna hla kuk. Yakla nwena dekam san ha empat enkam, kam-en. Yaklana dekam zep asa zigweka.
⁴⁰ Ëe in zen Yohanissi asalblak hendep Yesussu ang eblak, aha zini in mo bosena Andreas Bak. Andreas in, Simon, aha bosena Petrus mo oso.
⁴¹ Zen ki zep nabal-bakam aya zemka duweblaka, ki zep gubluka, “Ëe mese Mesiaꞌa ertowenan!” “Mesias”kam de ol-gunnu, zen hen Ibrani olkam. Yunani olkam enlalana “Kristus,” hen zeno enlalana, “Alap mo zer sonenna– Israelsa de Zen ngaya tabin hip.”
⁴² Andreas ki zep Yesus osan dep kwang tahal zaka. Kim zerhata zaka, Yesus ki zep ze nwekam srap tasiki, zao zep gubluka, “Em in Simon Bak, Yohanis mo tane. Hwena Ëe ama emsa bose taꞌan ‘Kefas’kam.” “Kefas”kam de bosena in, Ibrani olkam enlalana apdenak– zere mo Yunani olkam de bosena Petrus hunye. Zeno enlalana “kaso yawal.”
⁴³ Kaꞌankam ki zep Yesus Galilea mo lang san dep de song gwen hap dwam gweꞌanka, ki zep hendep song gweka. Zao zep Pilipus Baksa zertoweka, ki zep ze gubluka, “Em Asa ang gwebla.”
⁴⁴ Pilipus in Betsaida wal, hen Andreas ne Petrus ne zao hen e gweka.
⁴⁵ Pilipus dekam zep hwena Natanaelsa duweblaka, ki zep ze gubluka, “Ëe mese ertowenan– Zini mensa Musa zere mo titi tabin olak hamal hap zebe hap dena ale gulblukaye, hen mensa Alap mo olsa de ayang gul gwen zini nen guk gweblakye. Zen Nazaret wal, bosena Yesus, Yusup Bak mo tane.”
⁴⁶ Ki zep Natanael weha ol makan ding gulbluka, “Nazaret walya san ha ki? – dawem naye.” Ki zep ding gulbluka, “Haen, en neik ki ze hla ta.”
⁴⁷ Yesus onak kim zerhataꞌan zaka, ki zep gu-gubluka, “An Israel wal tangan. Hwena zebon onak hom– zisi de yane-ne tan hap de enlala naye.”
⁴⁸ Ki zep Natanael takensiblika, “Em banakane asa tame tala?” Ki zep ding gulbluka, “Ëe mese emsa hla tal– Pilipus de emsa kwang tan sremnak. Tenya ara mo ausunake nikin sira.”
⁴⁹ Ki zep ding gulbluka, “Guru, Em in Alap mo Tane! Em in Israel mo teipsinni!”
⁵⁰ Yesus ki zep ding gulbluka, “Na-en tangan ba habe asa taibliblaꞌara? – owas betek tola an en hapye. Sap Ëe anakare enkame emsa gublul, ‘Ëe ama emsa tenya ara ausunak hla tal.’ Hwena em etan mamkam de owassa esa kara guluda gwera– dekam tangan de dawemkam Asa taibliblan hapye.”
⁵¹ Ki zep hwena gulk sun de ol blaorankam kitak asa gubiridaka, “Eiwa tangan nakae emsa gubiridaꞌan: Em esa nglisa talusun nuka hla laser, hen Alap mo dam taha nakore zini ngatan zi mo lang nakore Zi Tanganna Abon osan sa tatak gwese gwer, hen Abon osan sa atiti gwe-gwezal.”