Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Due jelo sesampun nike araq gawẽ ngawinang lẽq kote Kana, lẽq Galilea, dait mamiq bini Deside Isa araq lẽq derike.

² Deside Isa kance pengiring-pengiring-Ne tepesilaq ẽndah lẽq gawẽ ngawinang nike.

³ Sewaktu ie pade kurangan aiq anggur, mamiq bini-Ne bebase lẽq Deside Isa, "Aiq anggur ie pade sampun bis."

⁴ Jawab Deside Isa, "Inaq napi saq side kayunang lẽq Tiang? Ndẽqman waktune Tiang nyatayang diriq."

⁵ Laguq mamiq bini Deside Isa bebase lẽq pelayan-pelayan, "Laksaneang napi saq Ie manikang lẽq side."

⁶ Lẽq derike araq enem gentong saq tesadangang jari bisoq naẽ menurut adat Yahudi. Gentong nike sopoq-sopoq isine kire-kire satus liter.

⁷ Manik Deside Isa lẽq pelayan-pelayan nike, "Isiqang gentong-gentong nike." Ie pade isiq gentong-gentong nike jangke penoq.

⁸ Beterus Deside Isa bemanik lẽq ie pade, "Mangkin bait aiq nike sekediq dait atong ojok ketue saq ngatur gawẽ." Ie pade jauq aiq nike ojok ketue.

⁹ Terus ketue nike rasaq aiq saq sampun jari anggur nike. (Ie ndẽq nenaoq lẽman mbẽ anggur nike, cume pelayan-pelayan saq ngisiq aiq doang saq nenaoq.) Beterus ketue nike ngerapetin pengantẽn mame,

¹⁰ terus bebase lẽq ie, "Biasene dengan nyugulang anggur saq paling maiq juluan dait lamun selapuq temuẽ sampun puas nginem baruq anggur saq biase. Laguq side nyimpen anggur saq paling solah jangke mangkin!"

¹¹ Nike keajaipan penembẽq saq tepiaq siq Deside Isa. Ie ngelaksaneang nike lẽq Kana lẽq Galilea. Siq tande nike Ie nyatayang kemuliean-Ne. Make pengiring-pengiring-Ne percaye lẽq Ie.

¹² Sesampun nike Deside Isa lumbar ojok Kapernaum bareng-bareng kance mamiq bini-Ne, sanak-sanak-Ne dait pengiring-pengiring-Ne. Ie pade mererepan lẽq derike pire jelo ngonẽqne.

¹³ Sewaktu sampun rapet Hari Raye Paskah Yahudi, Deside Isa lumbar ojok Yerusalem.

¹⁴ Lẽq Gedẽng Allah lẽq Yerusalem, dait-Ne dengan-dengan saq jual sampi, dombe, kedit dare; dait ẽndah tukang tukah kẽpẽng tokol lẽq derike.

¹⁵ Deside Isa piaq pecut lẽman tali, beterus siuh-Ne selapuq sampi dait dombe nike lẽman dalem Gedẽng Allah. Balik-belah-Ne mẽje-mẽje saq tekadu taoq nukahang kẽpẽng jangke selapuq kẽpẽng ie pade begelanyatan.

¹⁶ Beterus Deside Isa bemanik lẽq dagang kedit dare nike, "Jauq selapuqne niki. Ndaq jariang Gedẽng Bapa Tiang taoq bedagang!"

¹⁷ Beterus pengiring-pengiring-Ne inget bahwe araq tetulis, "Rase kasih Tiang lẽq Gedẽng Deside, nguasein atẽn Tiang."

¹⁸ Pare penguase Yahudi nantang Deside Isa, basen ie pade, "Silaq miaq keajaipan jari tande lẽq tiang pade bahwe Pelungguh berhak ngelaksaneang maraq niki."

¹⁹ Jawab Deside Isa, "Runtuhang Gedẽng Allah niki, dait dalem telu jelo Tiang bau penganjeng malik."

²⁰ Terus ie pade bebase, "Teperluang waktu petang dase enem taun jari penganjeng Gedẽng Allah niki, laguq Pelungguh gen penganjeng malik dalem telu jelo?"

²¹ Laguq Gedẽng Allah saq temaksut siq Deside Isa nike, rage-Ne mẽsaq.

²² Beterus sesampun Deside Isa idup lẽman ninggal, pengiring-pengiring-Ne inget bahwe hal nike sampun Ie manikang. Make ie pade percaye napi saq tetulis lẽq Kitab Suci dait napi saq temanikang siq Deside Isa.

²³ Deside Isa araq lẽq Yerusalem sengonẽq Perayaan Paskah, luwẽq dengan percaye lẽq Ie lantaran keajaipan-keajaipan saq Ie piaq.

²⁴ Laguq Deside Isa mẽsaq nẽnten percayeang diriq-Ne lẽq ie pade, sẽngaq Ie kenal selapuq dengan.

²⁵ Ndẽq perlu dengan ngebẽng kesaksian tipaq Ie mengenai sai juaq, sẽngaq Ie mẽsaq wikan napi saq araq lẽq dalem angen manusie.

Yohanes

Video Yohanes 02

Ikuti Kami:

KONTAK | PARTISIPASI | DONASI