Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Ai tonggor ma, bani ari ai pakon bani panorang ai, anggo mulak Hubobahon ma na tarbuang hun Juda pakon Jerusalem,
2 patumpuon-Ku ma haganup bangsa parbegu anjaha patuadon-Ku ma sidea hu habungan Josapat, jadi uhumon-Ku ma sidea ijai, halani bangsang-Ku pakon tean-teanan-Ku Israel, na nierap ni sidea hu tongah-tongah ni bangsa sipajuh begu-begu, anjaha na binagini ai tanoh-Ku,
3 halani marsijomput na sinurat sidea pasal bangsang-Ku, ibere sada dakdanak dalahi libei ni sada boru jalang, anjaha ijual sada dakdanak naboru libei ni anggur, anjaha isobur ma ai. (Nah. 3:10)
4 Anjaha hanima pe, ale Tirus, Sidon ronsi haganup jajahan ni Pilistea, ahanima do Ahu? Sihol dong paulakonnima hu Bangku, atap sihol dong balaskononnima hu Bangku? Podas anjaha barah ma balaskonon-Ku pambahenannima hubani ulunima.
5 Ai ibuat hanima do pirak pakon omas-Ku, anjaha iboan hanima arta hasudungan ni uhur-Hu hubagas rumah panumbahannima.
6 Ijual hanima do anak ni Juda pakon Jerusalem hubani halak Gorik laho paganggangkon sidea daoh hun tanoh ni sidea.
7 Torih ma, parohon-Ku ma sidea hun tanoh panjualannima bani sidea anjaha balaskonon-Ku ma pambahenannima hubani ulunima.
8 Jualon-Ku ma anaknima pakon borunima hu tangan ni halak Juda, anjaha sidea manjual ai hubani halak Seba, hubani sada bangsa na daoh;” ai Jahowa do na mangkatahon ai.
9 “Tingtingkon nasiam ma in i tongah-tongah ni bangsa sipajuh begu-begu. Marugas ma nasiam hu parporangan, puhoi nasiam ma sagala puanglima, roh ma marporang sagala dalahi siparporang.
10 Patopahon nasiam ma hudali nasiam bahen podang, ampa sasabi nasiam bahen tanja; hatahonon ni na galek in ma, ʻPuanglima do ahu.ʼ
11 Papodas anjaha roh ma nasiam sagala bangsa na inggot, martumpu ma nasiam hujai.” Ham ale Jahowa, patuad ma hujai puanglima.
12 “Misir anjaha tangkog ma sagala sipajuh begu-begu hu pamah Josapat, ai ijai do sihol marparatas Ahu laho manguhum sagala bangsa sipajuh begu-begu na inggot in. (ay. 2)
13 Sabihon ma sasabi in, ai domma toras sisabion. Roh ma nasiam manluntak, ai domma gok pangilangan. Domma sampur homa sagala tong, ai buei do hajahaton ni sidea.
14 Marhulan-hulan sidea i habungan pamutusan; ai dohor ma ari ni Jahowa i pamah pamutusan.
15 Manggolapi do mata ni ari pakon bulan, anjaha ijolomi sagala bintang do sinalsalni.”
16 Morom ma Jahowa hun Sion, anjaha ipagogoh sora-Ni hun Jerusalem, gabe dugur ma langit pakon tanoh on. Tapi Jahowa do haporusan bani bangsa-Ni ampa batar-batar bani halak Israel.
17 “Gabe tandaon nasiam ma, Ahu do Jahowa, Naibata nasiam, na marianan i Sion, dolog hapansingon-Kin. Gabe pansing ma Jerusalem, anjaha seng bontason ni halak na legan be in.
18 Bani ari ai manekteki ma anggur hun sagala dolog, mabaor dadih hun buntu-buntu, anjaha mardalan bah humbani sagala bah ni Juda. Kaluar ma sada bah tubuh hun rumah ni Jahowa mangarbahi habungan Sittim.
19 Gabe tanoh dorging ma Masir anjaha gabe halimisan na lungun Edom halani hajahaton na binahen ni sidea hubani halak Juda, na manduruskon daroh ni na so marpipot i tanoh ni sidea.
20 Tapi siianonkon do Juda ronsi sadokah ni dokahni, anjaha Jerusalem marsundut-sundut.
21 Anjaha balaskonon-Ku do daroh ni sidea, na so Hubalaskon ope. Jadi marianan ma Jahowa i Sion.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA