Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gu ta’ ce’ nyamanna ja’ sakenga tang cethak possa’ ban aeng akantha somor, ban tang mata akantha pancoran se agili terros! Tanto sengko’ seyang malem bisa nanges terros, nangese reng-oreng tang bangsa se epate’e moso.

² Ja’ sakenga e ra-ara sengko’ nemmo kennengngan se ekenneng gabay pangenebban monggu ka oreng se badha e dhalem parjalanan, sengko’ tanto buru dha’ essa’, ajauwi tang bangsa jareya. Reng-oreng jareya kabbi kiyanat, kompolanna reng-oreng se ta’ esto atena,

³ se to-sabakto bisa lecek cacana. Sanagara reya barang se teppa’ tadha’ kennengnganna, sabaligga sabarang se ta’ jujur neggu’ kobasa. PANGERAN adhabu, "Tang ommat ngalakone kajahadan tadha’ ambuna, ban ta’ endha’ ngakone Sengko’ menangka Allahna."

⁴ Oreng kodu te-ngate ngadhebbi kanca, maske taretan tonggal ebu tonggal eppa’ ta’ ekenneng parcaja keya. Sabab reng-oreng jareya bi’ Yakub tadha’ bidana, padha saleng tepo sataretanan. Oreng ajalan man-dha’emman abirbir petenna ta’ parduli se epetenna jareya kancana.

⁵ Kabbi padha saleng tepo, tadha’ se jujur cacana. Colo’na la biyasa lecegan, ta’ endha’ ngonduri dusana. Mare kakejjemman se settong nyosol settonganna, mare panepowan se settong epaterros ban settonganna, se kantha jareya tadha’ ambuna; reng-oreng jareya ta’ endha’ narema PANGERAN.

⁶ (9:5)

⁷ Daddi PANGERAN Se Mahakobasa adhabu, "Akantha emmas bi’ Sengko’ Tang ommat eoji, sopaja padha’a daddi morne. Epabaramma’a pole bi’ Sengko’ Tang ommat reya, se la ngalakone kajahadan sabannya’na rowa?

⁸ Cacana reng-oreng jareya ce’ babajana, bisa madhateng pate akantha pana se badha raconna. Sabarang oca’na lecek kabbi. Cacana manes ngapencot ate, tape sanyatana ajira’a oreng.

⁹ Masa’ bangsa se kantha jareya bi’ Sengko’ ta’ epadhatengngana okoman se sabandhing ban kasala’anna? Sengko’ madhatengnga babales ka reng-oreng jareya; Sengko’, PANGERAN, la ngoca’!"

¹⁰ Sengko’, Yeremiya, ngoca’, "Sengko’ nanges sambi sossa polana tana e talon, nong-gunong ban e ra-ara padha kerreng sarta ta’ tao elebadi manossa. Monyena sape ban dumba la ta’ tao ekaedhing pole, no’-mano’ sarta ban-keban laenna padha buru tadha’ karena."

¹¹ PANGERAN adhabu, "Yerusalim bi’ Sengko’ epadaddiya jur-gujuran, kennengnganna pangetegganna pate’ alas. Tha-kottha Yehuda bakal daddiya seppe ban ta’ ekennengnge oreng pole."

¹² Sengko’ atanya, "GUSTE, aponapa nagara ka’dhinto me’ ediggal daddi tana kajal sareng kerreng akadi ra-ara kantos ta’ elebadi oreng? Ponapa badha oreng se cokop penter kaangguy ngarte parkara ka’dhinto sadaja? Pasera se ampon eparenge oneng sareng Junandalem, sopaja oreng gapaneka kengenga materros ka reng-oreng laennepon?"

¹³ PANGERAN adhabu, "Mangkana epakantha jareya polana Tang ommat la eberri’ pangajaran bi’ Sengko’, tape sakabbinna pangajaran jareya la ta’ eparduli pole bi’ reng-oreng jareya. Tang ommat jareya ta’ ta’at ka Sengko’, ban ta’ endha’ atoro’ ka Tang parenta.

¹⁴ Reng-oreng jareya cengkal sarta nyemba ka la-brahala Ba’al akantha se eajarragi bangatowana.

¹⁵ Daddi, mara edhingngagi apa se ejalannagiya bi’ Sengko’, PANGERAN Se Mahakobasa, Allahna Isra’il: Tang ommat bi’ Sengko’ eberri’ana tamennan se pae’ menangka kakanna ban racon menangka nom-enomanna.

¹⁶ Reng-oreng jareya bi’ Sengko’ epacar-mencar ka antarana sa-bangsa se gi’ ta’ ekennal bi’ reng-oreng jareya otabana bi’ bangatowana. Sengko’ terrosa ngerem tantara se maancora Tang ommat jareya sampe’ tadha’ karena sakale."

¹⁷ PANGERAN Se Mahakobasa adhabu ka ommadda, "Tetene badha apa e nagara reya, pas duli ngolok tokang tanges. Soro dhateng duliyan, soro anyanye lagu kasossa’an."

¹⁸ Oreng Yehuda ngoca’, "Duli reng-oreng jareya soro anyanyeyagi nyanyeyan tanges ban kasossa’an, sopaja pepena sengko’ ban ba’na bacca egili’i aeng mata."

¹⁹ E Siyon badha sowarana oreng nanges ngoca’ kantha reya, "Sengko’ ban ba’na mate kabbi sarta epamalo parana. Sengko’ ban ba’na kodu ondur dhari nagara reya, ko-bengkona sengko’ ban ba’na padha ancor tadha’ karena."

²⁰ Sengko’ ngoca’, "Edhingngagi bu-dhabuna PANGERAN, he, reng-oreng babine’an! Ana’ babine’anna ba’na padha ajari nyanyeyan tangesan, ca-kancana ajari nyanyeyan kasossa’an.

²¹ Maot la maso’ lebat e candhela, narabas ka dhalem karaton; nyangkarem na’-kana’ e rong-lorong ban ngangodhadan e lon-alon.

²² Mayyit ajalamperran e man-dhimman akantha bu-rombu e tana; padha ban gandum se eketthok pas edina ban ta’ epakompol pole. Jareya dhabuna PANGERAN se kodu epanapa’ bi’ sengko’."

²³ PANGERAN adhabu, "Oreng penter ta’ olle ngambuwagi kabicaksana’anna, oreng se kowat ta’ olle ngambuwagi kakowadanna ban oreng sogi ta’ olle ngambuwagi kasogiyanna.

²⁴ Mon badha barang se eedirragiya oreng, se kodu ekabunga polana kennal ban ngarte ka Sengko’; polana oreng jareya tao ja’ Sengko’ taresna salanjangnga ban Sengko’ masegek hokom ban kaadilan e dunnya. Jareya kabbi masenneng Tang ate. Sengko’, PANGERAN, se ngoca’ kantha jareya."

²⁵ PANGERAN adhabu, "Bakal dhapa’a baktona Sengko’ ngokoma oreng Messer, Yehuda, Edom, Amon, Mo’ab ban reng-oreng se abengko e ra-ara se obu’na eketthok epapandha’. Reng-oreng jareya kabbi esonnat akantha oreng Isra’il, tape tengkana reng-oreng jareya ban bariya keya reng-oreng Isra’il padha ban oreng se ta’ asonnat, sabab reng-oreng jareya ta’ ta’at ka parjanjiyan se elambangngagi bi’ sonnat jareya."

²⁶ (9:25)

Yeremia

Video Yeremia 9

Ikuti Kami:

KONTAK | PARTISIPASI | DONASI