Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Maporus ma hanima, ale ginompar ni Benjamin, luar hun Jerusalem! Sompul hanima ma tarompit i Tekoa, anjaha pajongjong ma partanda i Bet-Kerem; ai ondam do roh hamagouan hun utara ampa hasedaon banggal.
2 Sampalan na majenges anjaha na hinarosuhkon do boru Sion, tapi siparsedaon do.
3 Roh do hujai parmahan pakon hulanan ni sidea; pasukon ni sidea do lampolamponi inggot Sion ai, ganup sidea marmahan bani iananni bei.
4 Nini sidea, ʻMarugas ma, marporang dompak sidea! Tangkog ma, dorab ma, sanggah siang ope ari! Aah! Domma bod ari, marganjang ma halinoh.
5 Eta! Borngin ma dorab hita! Parseda hita ma rumah bolonni.ʼ”
6 Ai sonon do hata ni Jahowa Zebaot, “Roboh ma hayu-hayuni, bahen ma hubuan dompak Jerusalem! Ai huta siuhumon do on; ai odoh-odoh tumang do masa ibagas.
7 Songon bah tubuh na manjurlak-jurlakkon bahni, sonai do marjurlak-jurlak hajahatonni; odoh-odoh ampa hasamboron do tarbogei ibagas, pamunuhon ampa pangoyaton do tong masa i lobei-Hu.
8 Sai ra ma ho palumbaon ale Jerusalem, ase ulang rotap uhur-Hu mangidah ho, ase ulang Hubahen ho gabe halimisan, gabe tanoh na so marpangisi.”
9 Sonon do nini Jahowa Zebaot, “Pangkei ma ho marturiak pasal simasima ni Israel songon pambahen bani hayu anggur; papangkei ma marhitei tanganmu ranting-rantingni ai, songon binahen ni sibuat buah anggur!
10 Bani ise ope ahu marsahap ampa palumbahon ase ibogei sidea? Toggor ma, tutup do pinggol ni sidea, seng marpanangar, tonggor ma, gabe sirisaon do hata ni Jahowa bani sidea, seng iharosuhkon sidea ai.”
11 Halani ai gok do uhur hu bani ringis ni Jahowa, loja do ahu manahan-nahan ai. Useihon ma ai bani dakdanak na i pasar, ampa bani humpulan ni garama homa; dalahi pakon naboru, maningon rap do tangkapon, na matua pakon na sayur matua.
12 Ondos bani halak na legan ma rumah ni sidea, sonai homa jumani pakon jolmani. “Tongon pagostongon-Ku do tangan-Ku dompak pangisi ni tanoh in,” nini Jahowa.
13 “Ai haganup sidea na etek ronsi na magodang, ganup do sidea impolan bani pansarian na so tiba dalanni, nabi pakon malim ganup mangkorjahon panipuon.
14 Hampung do panambari ni sidea bani naborit ni bangsang-Ku, marhitei na mangkatahon, ʻDamei do! Damei do!ʼ hape seng dong damei.
15 Patut do sidea maila, ai sihagigihononkon do ihorjahon sidea. Hape, seng be ibotoh na maila, seng be ibotoh hailaon. Halani ai jurgang do sidea rapkon na jurgang in, anjaha bani paroh-Ku marlulu bani sidea, maningon tompas do sidea,” nini Jahowa.
16 Sonon do hata ni Jahowa, “Jongjong ma hanima bani dalan, tonggor ma, anjaha sungkun ma pasal dalan sapari, atap ija do dalan na dear ai; dalani hanima ma ai, ase jumpah parsaranan tonduynima.ʼ Tapi nini sidea do, ʻSeng pot hanami mardalan ijai.ʼ
17 ʻHubahen do parjaga bani sidea, ningku, ʻPardiatei hanima ma sora ni tarompit ai!ʼ Tapi nini sidea, ʻSeng benahanami manangihon ai.ʼ
18 Halani ai tangihon ma ale bangsa-bangsa, anjaha pardiatei ma ale humpulan, atap aha na sihol pamasaon-Ku bani sidea!
19 Tangar ma, alo tanoh, tonggor ma, parohon-Ku do hamagouan bani bangsa on, ai ma buah ni hasamboron ni paruhuranni, ai seng iparimbagaskon sidea hatang-Ku, anjaha iambukkon do titah-Ku.
20 Benahang-Ku ma dahupa na hun Seba, atap rompah-rompah na maharga hun nagori na madaoh? Seng tarharosuhkon Ahu galangan situtungonnima, anjaha galangan sisayatonnima pe seng benahang-Ku.ʼ
21 Halani ai sonon do hata ni Jahowa, ʻTonggor ma, Nahkonon-Ku do i lobei ni bangsa on batu partolsuan, na mambahen sidea mangkatartolsu, bapa sonai age anak, hasoman romban rumah ampa kawan pe rap magou do.ʼ
22 Sonon do hata ni Jahowa, ʻTonggor ma, roh do sada bangsa na banggal, bingkat hun ujung-ujung ni tanoh on.
23 Marsior anjaha martanja do sidea, bisang do sidea anjaha seng itanda holong ni atei. Songon parhasak ni laut do parhasak ni sidea; mangajak huda do sidea, gopas marsinjata roh marmunsuh dompak ho, ale boru Sion.
24 Ibogei hanami do baritani, gabe galek ma tangannami; biar do mandorab hanami, na maborit songon puang-puang na mangarou.
25 Ulang laho hanima hu juma, atap mardalani i pasar; dong do podang ni munsuh ijai, habiaran do inggot.
26 Ale boru ni bangsang-Ku, marbaju guni ma ho, anjaha margulu ma ho bani abuan! Tangis ma ho, songon na manangisi anak sasada, ai sompong do sipangagou roh hu banta.ʼ”
27 “Domma Hupabangkit ho gabe sipanguji bani bangsang-Ku, ase itanda ho anjaha iuji ho parlahou ni sidea.
28 Haganup do sidea sipanlawan, marparlahou panukasion; doskon tombaga pakon bosi do sidea, haganup do sidea sipangagou.
29 Ombus-ombus do pangombusan, malala timah ibagas apuy; hape soya horja na papitahkon ai, halani lanjar do seng ra bali na jahat ai.
30 pirak na niambukkon do goranon sidea ai, halani domma itulak Tuhan sidea.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA