Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ He, reng-oreng Yerusalim, kassa’ ajalan e salanjangnga lorong e kotthana ba’na! Sare e man-dhimman, abassagi dibi’! Pareksa e lon-alonna kottha apa badha oreng settong bai se jujur se aehteyar sopaja bisa’a esto ka Allah. Mon badha, tanto PANGERAN apareng sapora ka Yerusalim.

² Ba’na ngoca’ ja’ ba’na nyemba ka PANGERAN, tape oca’na ba’na jareya ta’ terros ka atena.

³ Sanyatana se ekarsa’agi PANGERAN reya coma kaestowan. Ba’na epokol bi’ PANGERAN, tape ba’na ta’ parduli. Ba’na eparemmok, tape ba’na ta’ endha’ eajar. Ba’na cengkal, ta’ endha’ atobat dhari sa-dusana.

⁴ Sengko’ apekker, "Reng-oreng reya coma ra’yat se ta’ tao pa-apa. Tengkana budhu lantaran ta’ tao apa se ekarsa’agi GUSTE Allahna dhari aba’na.

⁵ Mon bariya dina sengko’ ngadhebba ka ja-pangraja, sengko’ matora ka ja-pangraja jareya. Tanto ja-pangraja jareya tao apa se ekarsa’agi GUSTE Allah dhari reng-oreng jareya." Tape reng-oreng jareya ta’ endha’ keya eparenta PANGERAN, ta’ endha’ ta’at ka Salerana.

⁶ Jareya sababba arapa reng-oreng jareya me’ epateyana bi’ can-macan se kalowar dhari alas, ebit-sebbida pate’ alas se dhateng dhari ra-ara. Macan toltol bakal jar-ganjira e man-dhimman nyare mangsana e seddi’na tha-kotthana reng-oreng jareya, ban saneyap oreng se kalowar tanto eceppa’. Kadaddiyan se kantha jareya lantaran reng-oreng jareya bannya’ dusana, ban li-baliyan mongkore Allah.

⁷ PANGERAN adhabu, "Arapa’a Sengko’ me’ nyapora’a dusana Tang ommat jareya? Reng-oreng jareya la ondur dhari Sengko’, nyemba ka se banne Allah. Reng-oreng jareya bi’ Sengko’ eberri’i kakanan sampe’ kennyang, tape reng-oreng jareya seggut azina ban seggut entar ka del-sondel.

⁸ Reng-oreng jareya akantha jaran se lempo ban raja napso baraina; kabbi padha terro ka binena kancana.

⁹ Gu ta’ la samasthena Sengko’ ngokom bangsa se kantha jareya ban males kalakowanna ta’ iya?

¹⁰ Sengko’ madhatengnga moso me’ olle marosak kebbun anggurra reng-oreng jareya, tape bun-kebbun jareya ta’ epasampe’a mosna. Bi’ Sengko’ moso jareya esorowa notto carangnga bungkana anggurra, sabab rang-carang jareya banne Tang andhi’.

¹¹ Ommat Isra’il ban Yehuda la akiyanat onggu ka Sengko’. Sengko’, PANGERAN, la ngoca’."

¹² Ommadda PANGERAN ca’-ngoca’ se ta’ bendher parkara PANGERAN. Ca’na reng-oreng jareya, "Pya, PANGERAN ta’ kera apa-rapa. Sengko’ ban ba’na ta’ kera epacalaka’ ban ta’ kera badha perrang otabana kalaparan.

¹³ Anggep bai bi-nabbi rowa angen, sabab bi-nabbi jareya ta’ narema dhabuna PANGERAN."

¹⁴ PANGERAN, Allah Se Mahakobasa laju adhabu ka sengko’, "Yeremiya, sarrena reng-oreng jareya ngoca’ kantha jareya, bi’ Sengko’ epadhatengngana balai se menorot reng-oreng jareya ta’ kera kalakon. Tang ca’-oca’ bi’ Sengko’ epakantha’a apoy e colo’na ba’na. Bangsa jareya epakantha’a kaju, se bakal ekello’a apoy jareya sampe’ epatadha’."

¹⁵ He, ommat Isra’il, PANGERAN parappa’na madhateng settong bangsa dhari jauna epanyerranga ba’na. Bangsa jareya la badha molae lamba’ mola, bangsa se ce’ kowadda, se basana ta’ ekataowe bi’ ba’na.

¹⁶ Kang-tokang panana talebat bangalan, ban ta’ andhi’ panganeser mon mate’e oreng.

¹⁷ Reng-oreng jareya bakal matadha’a hasella tanana ban kakanna ba’na, ban mateyana na’-ana’na ba’na. Sape ban dumbana ba’na bakal esambelliya, ban bun-kebbunna anggurra sarta ka-bungkana arana ba’na bakal epamosna’a. Tha-kottha se badha bintengnga se eandellagi ba’na bakal epaancora bi’ reng-oreng jareya.

¹⁸ PANGERAN adhabu, "Maske kantha jareya, Sengko’ ta’ mamosna’a Tang ommat jareya e bakto jareya.

¹⁹ Tape mon reng-oreng jareya atanya arapa Sengko’ me’ madhateng kasossa’an se kantha jareya, kabala Yeremiya, ja’ akantha reng-oreng jareya se adina’agi Sengko’ e nagarana dibi’ polana ngabdiya ka ba-dibana bangsa laen, bariya keya reng-oreng jareya bakal daddiya abdina reng-oreng manca e nagara laen."

²⁰ PANGERAN ngotos sengko’ manapa’ pessenna reya ka toronanna Yakub se badha e Yehuda,

²¹ "Edhingngagi reng-oreng se budhu ban goblok! Ba’na andhi’ mata tape ta’ nangale, andhi’ kopeng tape ta’ ngedhing!

²² Sengko’ reya PANGERAN; arapa ba’na me’ ta’ tako’ ka Sengko’? Arapa ba’na me’ ta’ ngetter nangale’e Sengko’? Sengko’ se agabay penggir sereng se ta’ bisa elebadi aengnga salanjangnga. Tase’ bisa raja aengnga ban omba’na bisa ngamok, tape ta’ bisa ngalebadi bates jareya.

²³ Tape ba’na cengkal ban dujan alaban; ba’na nyalethong ban ondur dhari Sengko’.

²⁴ Ba’na ta’ tao enga’ se ahormadana Sengko’, mangkana Sengko’ se ngerem ojan e bakto parmola’anna ban dhi-budhina mosem nambara’. Sengko’ keya se aberri’ mosem anye sabban taon.

²⁵ Tape sa-dusana ba’na jareya se andaddiyagi ba’na ta’ bisa ane’madi jareya kabbi.

²⁶ He, Tang ommat, badha reng-oreng jahat e antarana ba’na. Akantha oreng se noguwi jira’ se epasang epamega’a mano’, kantha jareya keya reng-oreng jareya masang jira’ mega’a manossa.

²⁷ Akantha tokang pekadda mano’ ngesse’e korongnga ban mano’, bariya keya reng-oreng jareya ngesse’e bengkona ban rang-barang ollena tepowan. Kalaban cara se kantha jareya reng-oreng jareya daddi sogi ban kobasa

²⁸ sarta lempo ban ma’mor. Kajahadanna reng-oreng jareya tadha’ batessa; ta’ adil e dhalem parkarana na’-kana’ jatim, ban ta’ abillai parkarana reng-oreng se tatendhes.

²⁹ Tape Sengko’, PANGERAN, ngokoma reng-oreng jareya polana jareya kabbi; Sengko’ malessa lalakonna bangsa jareya.

³⁰ Badha kadaddiyan se talebat nako’e e nagara reya:

³¹ bi-nabbi acaca lecek, mam-imam aladine ngala’ karebba dibi’, ban ba’na, Tang ommat, senneng ka kabadha’an se kantha jareya. Tape apa se elakonana ba’na mon are dhi-budhina la dhapa’?"

Yeremia

Video Yeremia 5

Ikuti Kami:

KONTAK | PARTISIPASI | DONASI