Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "He umma’ Israel, punna erokko ammotere’, ammotere’ mako mae ri Nakke. Pelaki rolong anjo barhala-barhala Kukabirissia, nampa majarre’ mako mae ri Nakke.
2 Punna assumpako lanri arengKu siagang lambusukko nuadele’ siagang tojeng lalang tallasa’nu, lanapalaki sikontu bansaya sollanna Kubarakkaki ke’nanga, kammayatompa lamammuji ke’nanga mae ri Nakke."
3 Nakana Batara mae ri pandudu’na Yehuda siagang Yerusalem, "Jamai buttanu tenayapa nujamai; teako appakioroki bine ri tampa’ napattimboia poko’-poko’ akkatinting.
4 Ta’gala’ jarreki janjinnu siagang iNakke, Batara, siagang sa’laki kalennu untu’ iNakke, he pandudu’ Yehuda siagang Yerusalem. Punna tena, lallumpai larroKu siagang la’rinrai rapang pepe’ tenaya nakkulle nibuno manna pole ri nai. Yangasenna anjo kammaya lanatujuko lanri panggaukang-panggaukang ja’dala’nu."
5 Tuiki tarompe’nu ri sikontu pa’rasangang! Bajiki batenu akkio’ siagang lompoi. Suroi lari pandudu’ Yehuda siagang Yerusalem mange ri kota-kota niaka tembo’ pattahanganna.
6 Picinikiangi oloang mangea ri Sion, bulu’Na Batara, a’liliko linta’, teako ammantangngi a’mereki. Appabattui Batara bala siagang kaancurang lompo battu wara’.
7 Rapang singa assuluka battu ri paccokkoanna kamma tomminjo a’lampami pammanrakia ri bansa-bansa battua ero’ ampanraki Yehuda. Laruntungi Yehuda a’jari kamma loro tampa’ tenaya napammantangngi tau.
8 Lanri kammana, angngarru’ siagang appiraung mako, ammake mako kaeng karung tanra susanu. Lanri a’rinra-rinrana larroNa Batara tenapa nammono’ battu ri Yehuda.
9 Nakana Batara, "Ri anjo alloa sikamma karaenga siagang sikamma pamarentaya latappela’mi sumanga’na; sikamma imanga lannekkereki siagang sikamma na’bi-na’bia lata’bangkai."
10 Nampa kukanamo, "O Batara Kaminang Tinggia, Kiballe-balleimi tu Yehuda siagang pandudu’na Yerusalem! Kikana angkana lania’ kaamangngang, nampa kamma-kamma anne nyawana ikambe niancangi ri pa’dang."
11 Lania’ wattunna sallang anjo tu Yehuda siagang pandudu’na Yerusalem anggappai kabara’ angkanaya ammiriki anging bambanga battu ri paranga tattuju mae ri ke’nanga. Anjo anginga teai anging biasa, anri’bakanga bawang awang,
12 passangalinna anging lompo battua lanri parenta KalenNa Batara, untu’ ampitujui hukkungang umma’Na.
13 Ciniki, ammumbami musua sanrapang rammang. Kareta-kareta pa’bundu’na rapangi anging barubu, jarang-jaranna gassingangngangi larina najangang-jangang rajawali. Cilaka maki’! Panra’ maki’!
14 Yerusalem, pelaki kaja’dallanga battu ri atinnu sollannu nipasalama’. Siapapi sallona anjo pikkirang-pikkirang ja’dalaka lanuboli’ ri atinnu?
15 Appakkaramula battu ri kota Dan, kammayatompa battu ri pa’moncongang Efraim, battumi sikamma tunisuroa angngerang kabara’ kodi.
16 Napakaingaki ke’nanga bansa-bansaya siagang napabattuangi pandudu’na Yerusalem angkanaya nia’mi battu bella mae musua. La’gora-gorai ke’nanga ero’ ambunduki kota-kota Yehuda
17 siagang lanatammulili Yerusalem rapang tau akkammika koko. Nakajariang ngaseng anjo sikammaya lanri tu Yehuda nabaliangi Batara. Le’ba’mi a’bicara Batara.
18 Yehuda, kalennu tonji ampabattui anjo balaya mae ri kalennu. Batenu attallasa’ siagang sikamma panggaukannu a’jari passabakkang mae ri sikontu anjo passessa ampa’rissiai atinnu.
19 Tamaka sessana atingku, takutahangngami pa’risika. Takukulleami ampakasanannangi kalengku annenrengi nyawaku ri barambangku, lanri kulangngere’na sa’ra tarompeka, siagang gora assa’raya ero’ a’bundu’.
20 Ma’mole-molei battu balaya angngancuruki sikontu pa’rasanganga. Ti’ring nipanraki kemaku, nikae-kaei kaenna.
21 Siapapi sallona lakucini’ tau a’bunduka sipaccappu’? Siapapi sallona lakulangngere’ sa’ra tarompe’ appakatongoloka?
22 Nakana Batara, "tolo sikali anjo ummakKu, tamangngassengai ke’nanga ri Nakke. Rapanji ke’nanga ana’-ana’ tenaya namappilangngeri tenaya pammahanna manna sike’de’; cara’deki ri kaja’dallanga, tena apa-apa nakulle ri kabajikanga."
23 Accinika’ mae ri buttaya, kosongi naroso’ nicini’, acconga’ nai’ ri langi’, angngapa natena apa-apa accaya.
24 Kuciniki monconga siagang bulu’-bulu’ tinggia teai sipato’ batena ta’goccang.
25 Tena kucini’ rupatau, manna jangang-janganga anri’ba’ ngasemmi.
26 Butta copponga a’jari parang kalotoro’mi, ancuru’mi kotaya tassimbung-simbung, lanri tamaka larroNa Batara mae ri umma’Na.
27 (Napaui Batara angkanaya sikontu linoa la’jariparang lompoi, mingka tena nalaNapanraki taba sikali.)
28 Lasusai buttaya, sassang makkapuki langika. Le’ba’mi akkana Batara siagang talaNapinrayami rancanaNa. Le’ba’mi Napattantu Natappuki talammonokai manna sike’de’.
29 Nilangngere’mi sa’ra jaina pasukang a’jaranga siagang angngeranga pana, nasiposoimo taua ri palaria. Romanga napantamakki ke’nanga, bulu’ batua naambi’. Sikontu kotaya a’jari sino ngaseng, tenamo tau ero’ ammantang anjoreng.
30 He Yerusalem, nibokoi mako na tena apa-apa akkulle nugaukang! Untu’ apa nummake baju eja nanubelo-beloi kalennu siagang bulaeng na pera’, kammayatompa numodei matannu siagang paccalla’? Tena matu-matunna numodei kalennu, nasaba’ sikamma tanrinnu taerokami mae ri kau, ba’lalo ero’mi ke’nanga angngallei nyawanu.
31 Allangngereka’ sa’ra kunrareng rapang baine eroka ammana’; rapang baine lolo allassukanga ana’ bungasa’, kammaminjo karru’na Yerusalem siagang sukkara’na a’mai’. Akkaeng-kaengi limanna nakkunrareng, angkana, "Bala kugappa — lanibunoa’ ri musua!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA