Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri bulang sampulo ri taung makasalapang ri pamarentahanna Zedekia karaeng Yehuda, Nebukadnezar karaeng Babel siagang sikontu tantarana battumi siagang nabundukimi Yerusalem.
2 Ri tanggala’ salapang bulang appa’ taung makasampulo asse’re pamarentahanna Zedekia, niruntummi tembo’ kotaya ri musu,
3 na niallemo Yerusalem. Battumi sikamma pagawena karaeng Babel nampa a’lampa mange ammempo ri Pakke’bu’ Lompo Tangngaya. Ri alla’na ke’nanga niaki Nergal-Sarezer, Samgar Nebo, Sarsekim kapala ruma tanggana balla’ karaenga, Nergal-Sarezer Rabmag siagang perwira-perwira tantara maraenga.
4 Ri wattunna Karaeng Zedekia siagang sikontu tantarana naciniki anjo sikontu apa kajarianga, ero’mi ke’nanga lari mange ri Lappara’na Yordan ia memang anjo bangngia. Anjorengi ke’nanga ri koko balla’ karaenga angngalle oloang, nampa assulu’ battu ri pakke’bu’ lompo ampasisambungai ruaya tembo’ ri anjo tampaka.
5 Mingka niondangi ke’nanga ri tantara Babel nampa najakkala’ Zedekia ri lappara’na Yerikho. Nampa nierang Karaeng Zedekia mae ri Karaeng Nebukadnezar ri kota Ribla ri daera Hamat, nampa nitappuki hukkungang mate.
6 Anjoreng tommi ri kotaya nibuno sikamma ana’na ri dallekanna, siagang sikontu pagawena nibuno ngaseng todong.
7 Le’baki anjo nikocci’mi assulu’ matanna Zedekia, nampa nisikko’ na nierang mange ri Babel.
8 Lalang kammana anjo tu Babel natunumi balla’ karaenga sikamma balla’na ngaseng ra’yaka, kammayatompa naruntungi tembo’-tembo’ kalli’na Yerusalem.
9 Kala’busanna ra’ya’ niaka ija ammantang ri kotaya, siagang sikamma tau le’baka lari a’limbang ri tu Babel, niengka’mi mange ri Babel ri Nebuzaradan, komandang pasukang lompona Babel.
10 Sipa’gang ra’ya’ kaminang kasi-asia siagang tenaya barang-baranna, nibokoi ri Yehuda siagang nisarei koko anggoro’ siagang koko maraenga.
11 Karaeng Nebukadnezar le’baki nasuro Nebuzaradan, iamintu komandang pasukanna, appasulu’ parenta kammaya anne.
12 "A’lampako amboyai Yeremia, siagang jagai baji’-baji’. Teako apa-apai; gaukangi apa nakaerokia."
13 Jari Nebuzaradan siagang rua perwira tinggina, iamintu Nebusyazban siagang Nergal-Sarezer kammayatompa sikontu perwira tantara Babel maraenga,
14 naallema’ battu ri paranglakkenna balla’ karaenga. Nampa napassareanga’ ri Gedalya ana’na Ahikam, cucunna Safan, ia mustia angngantarakka’ ammotere’ siagang salama’. Jari ammantamma’ ri alla’na ra’yaka.
15 Ri wattungku nitarungku ija ri paranglakkenna balla’ karaenga, Nasuroa’ Batara,
16 ampauangi Ebed-Melekh anjo tu Sudanga, angkanaya Batara Kaminang Koasaya, iamintu Allata’alana Israel, akkana kammai anne, "Kamma Kupaua riolo, laKupabattui balaya mae ri anne kotaya, siagang teai kakalumanynyangngang. Lanuciniki anjo passala’ kammaya kajariang.
17 Mingka iNakke, Batara laKula’langngiko. Tena nalaKupassareangko mae ri tau nukamallakkanga.
18 Tena nulanibuno, lanri laKupasalamakko. Lasalamaki nyawanu lanri tanjengko mae ri Nakke. INakke Batara, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA