Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sepatia anak Matan, Gedalya anak Pashur, Juhal anak Selemia, Pashur anak Malkia, ibegina cakapku man bangsa e.
2 Kupeseh kata Dibata man bangsa e ningku, "Kasa kalak si tading i bas kota enda la banci la mate erkiteken perang, kelihen ras penakit. Tapi si nadingkenca dingen ngendesken diri kempak bangsa Babilon la ia mate. Kesahna terkelin."
3 Kukataken pe man bana maka TUHAN nggo ngataken, "Kuendesken ateKu kota enda kempak tentera Babilon gelah irebutna."
4 Kenca bage lawes pegawai e ndahi raja nina, "Kalak enda la banci la iukum mate. Pengeranana kap erbahanca bene ukur tentera ras kalak si deban si tading i kota enda. Nampati pe antena lang tapi erbahan mesui ate jelma si nterem ngenca."
5 Nina Raja Sedekia njabapsa, "Merandal adi bage, bahanlah uga iakapndu mehuli. Labo kam kuolang-olangi."
6 Itangkapna aku jenari itantanna aku alu tinali ku bas sumur anak raja si Malkia gelarna i bas kesain pengawal istana kerajan. Sumur e la erlau, kubang ngenca lit i je emaka lucut aku ku bas.
7 Tupung e, lit sekalak suruh-suruhen gelarna si Ebedmelek. Ia kalak Sudan. Ibegina maka aku nggo itamaken kalak ku bas sumur e. Paksa e raja sangana runggu i bas Pintu Gerbang Benyamin.
8 Emaka idahi Ebedmelek raja ndai ku je, jenari nina,
9 "O raja salah kap perbahanen kalak ah, sabap Jeremia nggo itamaken ku bas sumur. La banci la mate kelihen me ia sabap lanai kap lit roti i bas kota enda."
10 Emaka isuruh Raja Ebedmelek muat telu kalak teman lako ngerintak aku nangkih i bas sumur e nari ope denga aku mate.
11 Kenca bage lawes Ebedmelek ras teman-temanna ku bas gudang jenari ibahanna piga-piga paken bekas itantanna kuteruh salu tinali man bangku.
12 Isuruhna aku namaken uis merigat-merigat e ndai i bas teruh kikikku maka ula kuakap mesui. Kulakoken bage.
13 Emaka iangkatna aku i bas sumur e nari. Kenca si e i bas kesain pengawal istana kerajan aku itahan.
14 I bas paksa si deban isuruh Raja Sedekia aku ku pintu si peteluken i bas Rumah Pertoton jenari nina, "Nungkun ateku man bandu gelah iturikenndu si tuhuna."
15 Ningku enjabapsa, "Adi kuturiken man bandu si tuhuna tentu ibunuhndu aku, dingen adi kuajarken pe kam labo diatendu pe."
16 Emaka erjanji Raja Sedekia man bangku alu erbuni-buni nina, "Ersumpah aku i bas gelar Dibata si enggeluh, Dibata si mereken kegeluhen man banta, maka la kam kubunuh entah pe ngendesken kam man kalak si atena munuh kam."
17 Kenca bage maka kuturiken man Sedekia kai si nggo ikataken TUHAN si Mada Kuasa Dibata nu Israel, "Adi iendeskenndu dirindu man tentera raja Babilon, geluhndu ikelini janah kota enda la iciluk. Kam ikelini subuk keluargandu.
18 Tapi adi la iendeskenndu dirindu, kota enda iendesken kempak kalak Babilon si nutung kota enda, janah kam pe la pulah i bas ia nari."
19 Tapi nina raja ngaloi, "Mbiar aku man temanta sada bangsa si nggo lawes ku pihak Babilon. Banci jadi iendeskenna aku man kalak e guna isiksa."
20 Ningku, "La bo kam iendesken kempaksa. Mindo aku man bandu gelah ikutkenndu kata TUHAN. Janah jadi nge si mehuli man bandu janah geluhndu ikelini.
21 Tapi TUHAN nggo ncidahken pengenehenen man bangku kerna kai sijadi kune kam la ngendesken diri.
22 I bas pengenehenen e kuidah diberu-diberu si tading denga i bas istana kerajan ibaba ndarat ngadap man opsir-opsir Babilon. Dengkehkenlah kai si ikatakenna tupung ia lawes: 'Raja nggo ibabai teman-temanna papak, nggo ikuasaina ia. Genduari kerina nahena nggo lucut ku bas kubang, teman-temanna nggo nadingken ia.'"
23 Ningku tole, "Kerina kemberahenndu, ras anak-anakndu, iendesken man kalak Babilon, janah kam pe la pulah. Kam jadi tabanen raja Babilon janah kota enda iciluk radas ku taneh."
24 Nina Sedekia ngaloi, "Ula ise pe bahan meteh kerna percakapen enda, maka ula bahaya geluhndu.
25 Kune ieteh pegawai kerajan maka aku nggo ngerana ras kam, reh me ia nungkun man bandu. Jenari erjanji man bandu maka kam la ibunuhna adi iturikenndu kerina isi percakapennta e man bana.
26 Kataken saja man bana maka kam nehken pemindondu man bangku gelah kam ula iulihken ku bas penjara dingen mate i je."
27 Kenca bage reh me kerina pegawai-pegawai dingen nungkun man bangku: Kukataken rikutken kai si niperentahken raja. La banci kai pe ibahanna sabap la lit ise pe si megi percakapen e.
28 Jenari itamaken aku i bas kesain pengawal istana seh ngayak paksa Jerusalem italuken.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA