Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi ipataridahkon Jahowa ma hu bangku, tonggor ma, dua karanjang marisi buah ni hayu ara, inahkon i lobei ni rumah ni Jahowa, ai ma na masa dob ibuangkon si Nebukadnesar, raja ni Babel, si Jekonya, anak ni si Joyakim, raja ni Juda, rap pakon na sangap-sangap ni Juda, ampa tuhang hayu, ampa tuhang bosi anjaha iboan sidea hun Jerusalem hu Babel.
2 Sada karanjang marisi buah ara na dear tumang, songon limbuah ni buah ara, tapi karanjang na sada nari marisi buah ara na masambor tumang, seng tarpangan halani samborni.
3 Jadi nini Jahowa ma hu bangku, “Aha do na nididahmin, ale Jeremia?” Ningku marbalos, “Buah ara, buah na jenges ai, jenges tumang; tapi na sambor ai, sambor tumang, gabe seng tarpangan.”
4 Dob ai roh ma hata ni Jahowa hu bangku sonon,
5 Sonon do hata ni Jahowa, Naibata ni Israel, “Songon buah ara na dear ai, sonai do Huhira halak na tarbuang hun Juda, na dob Huusir humbani ianan on hu tanoh ni halak Kasdim.
6 Kawahkonon-Ku do sidea ibagas halamlamon, anjaha boanon-Ku do sidea mulak hu tanoh on. Pajongjongon-Ku do sidea, seng parsedaon-Ku; suanon-Ku do sidea, seng orbaton-Ku.
7 Berehonon-Ku do bani sidea uhur laho mananda Ahu, paboa Ahu do Jahowa; gabe bangsang-Ku ma sidea anjaha Ahu gabe Naibata bani sidea, ai mulak do sidea use hu Bangku humbani gok ni uhur ni sidea.”
8 Tapi sonon do nini Jahowa, “Songon buah ara na sambor ai gabe seng tarpangan,” nini Jahowa, “Sonai do bahenon-Ku bani si Sedekia, raja ni Juda, bani na sangap-sangapni, bani simasima ni Jerusalem, na tading i nagori on, ampa bani sidea na marianan i tanoh Masir.
9 Bahenon-Ku do sidea gabe songgot-songgot bani haganup harajaon na i tanoh on; gabe sirisaon, umpama, siapason ampa siburaan do sidea, bani haganup ianan pambuangan-Ku bani sidea.
10 Tongoson-Ku do bani sidea podang, lohei ampa sampar, ronsi bois tumang sidea humbani tanoh na dob Hubere bani sidea ampa bani ompung ni sidea.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA