Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Andiko ukumen si ibereken TUHAN man peminpin-peminpin si engkernepken, si ngencahken BangsaNa mesangat kal!
2 Bagenda me nina TUHAN kerna peminpin-peminpin si mpermakani BangsaNa, "La kap ipermakanindu bangsangKu. Nggo ihuntakkenndu janah ipelawesndu ia. Genduari Kuukum ateKu kam erkiteken kejahaten si ibahanndu.
3 BangsangKu si tading denga Kupepulung i bas negeri-negeri inganna nggo Kukerapken, jenari Kubaba mulih ku tanehna jine. Ertuah janah tambah-tambah beliganna.
4 Kutangkuhken peminpin-peminpin si mpermakani ia. BangsangKu lanai mbiar dingen nggirgir janah lanai nari ia Kuukum. Aku kap TUHAN si nggo melasken ranan enda."
5 Nina TUHAN, "Seh me paksana Kuangkat sekalak raja si bujur i bas kesusuren Daud nari, raja e merentah alu pentar janah ngelakoken si benar ras bujur i belang-belang negeri enda.
6 Adi ia jadi raja, terkelin me kalak Juda, bangsa Israel enggeluh i bas dame. Ia igelari me pagi, 'TUHAN kap keselamatenta.'"
7 Nina TUHAN, "Seh me paksana bangsangKu lanai ersumpah i bas gelarKu selaku Dibata si enggeluh si nggo maba ia ndarat i Mesir nari.
8 Tapi ersumpah ia i bas gelarKu, Dibata si enggeluh si maba kalak Israel ndarat i negeri Utara nari dingen i bas negeri-negeri si deban nari ku ja ia nggo Kukerapken. Jenari tading me ia i bas negerina jine."
9 Getem pusuhku, nggirgir aku. Erkiteken TUHAN dingen KataNa si Badia, aku desken kalak mabuk desken kalak si mbuesa minem anggur.
10 Negeri enda dem alu kalak si la patuh man TUHAN; jahat geluhna dingen gegehna pe isalah-gunakenna. Erkiteken isumpahina TUHAN, negeri enda nggo nderkuh, dingen mbal-mbal nggo kerah.
11 Nina Tuhan "Nabi-nabi ras imam-imam pe lanai erdibata; i bas Rumah PertotonKu pe Kutunduk ia erbahan jahat.
12 Dalan si idalanina medalit dingen gelap; Kubahan me maka tertuktuk dingen guling ia. Kudabuhken me cilaka ku ia, paksa pengukumen man bana nandangi seh me. Aku TUHAN kap si nggo melasken ranan enda.
13 Tapi dosa nabi-nabi kalak Samaria nggo Kuidah, ngerana i bas gelar Baal, bangsangKu papak ibabaina.
14 Tapi nabi-nabi Jerusalem maciken ka perbahanenna, erlua-lua janah la bujur perbahanenna, ipegegehina kalak erbahan salah, emaka la lit ise pe singolangi kalak erbahan jahat. Man bangKu, mejin kap ia kerina bali mejinna ras kalak Sodom ras Gomora."
15 Emaka enda me kata TUHAN si Erdolat kerna nabi-nabi Jerusalem, "Kusuruh ipanna sinuan-sinuan si pagit racun Kubahan inemenna. Sabap erkiteken ia maka kerina kalak i belang-belang negeri enda lanai mbiar man Dibata."
16 Nina Dibata si Mada Kuasa man kalak Jerusalem, "Ula begiken kai si ikataken nabi-nabi e. Pengarapen palsu kap iberekenna man bandu. Awih-awih perukurenna saja nge si iturikenna man bandu, labo kerna kai si Kukataken.
17 Man kalak si la nggit megiken katangKu, ikatakenna maka si mehuli saja nge ngenca jadi man bana. Kempak kerina kalak si mersik ukurna ikatakenna maka la pernah jadi cilaka kempaksa."
18 Ningku, "La lit sekalak pe nabi-nabi e meteh perukuren TUHAN si terbuni. Sekalak pe labo pernah megi dingen ngantusi KataNa. La ibegikenna dingen la diatena pe kai si ikataken TUHAN.
19 Rawa TUHAN angin kalinsungsung kap, angin kaba-kaba si ngamuk i babo takal kalak jahat,
20 janah e la peltep-peltep seh ngayak nggo dung IlakokenNa kerina si AteNa IlakokenNa. I bas paksa-paksa si reh enda iantusi bangsa enda me si e kerina."
21 Nina TUHAN, "Labo lit Kusuruh nabi-nabi enda, amin bage pe erdahin kang ia. Labo lit Kuturiken katangKu man bana, tapi ngerana ka nge ia i bas gelarKu.
22 Kune iantusina perukurenKu si terbuni, tentu nggo me min ndai iberitakenna katangKu man bangsangKu, janah nggo min ndai ingadiken bangsangku lagu langkah ras perbahanen sijahat.
23 Aku kap Dibata si ringan i ja pa pe, la bo ringan i bas sada ingan saja.
24 La lit kalak si banci cebuni gelah la Kuidah. La kin itehndu maka i japa pe Aku Kudemi Surga ras doni?
25 Kueteh maka nabi-nabi enda nggo erkata guak i bas gelarKu. Ikatakenna maka nggo Kuturiken katangKu i bas nipi-nipina.
26 Asa kai nari dekahna bangsangKu papak ibabai nabi-nabi enda alu ngataken kata si ibahan-bahanna?
27 Iakapna maka arah nipi-nipi si iturikenna erbahanca lupa bangsangKu kempak Aku, bali ras nini-ninina lupa man bangKu jenari erkusur nembah man Baal.
28 Nabi si ernipi arus maka ikatakenna e nipi ngenca, tapi nabi si megiken katangKu arus katakenna katangKu e alu tuhu. Kai gunana segal adi ibandingken ras beras?
29 KatangKu bali kap ras api dingen martel si mekpek batu seh getem.
30 Aku jadi imbang nabi-nabi si nangko ranan temanna tapi ikatakenna maka i bas Aku nari ranan e.
31 Aku jadi imbang nabi si melasken katangku jine, tapi ikatakenna rehna i bas Aku nari.
32 Dengkehken kai si Kukataken, Aku TUHAN! Aku jadi imbang man nabi-nabi si nuriken nipi-nipina si bual kerina. Iturikenna nipi-nipina, janah ibabaina papak bangsangKu alu kata guak, dingen ranan megombang. Labo ia Kusuruh, labo ia Kuperentahken dingen labo ia erguna sitik pe man bangsa enda. Aku TUHAN kap si nggo melasken ranan enda."
33 Nina TUHAN man bangku, "O Jeremia, adi lit bangsangKu, entah nabi-nabi entah imam nungkun man bandu, 'Kai kin kata TUHAN?' Arus bagenda nindu ngaloisa, 'Kam jadi baban kap man TUHAN, emaka IambengkenNa nge AteNa kam.'
34 Adi lit sekalak bangsangKu, entah nabi, entah imam, melasken kata: 'baban TUHAN', Kuukum me ia radu ras keluargana.
35 Tapi ise si nungkun man temanna entah man keluargana, 'Kai jabap TUHAN? Kai si nggo ikataken TUHAN?'
36 Emaka lanai banci ibelaskenna kata 'baban TUHAN', sabap kune lit si ngataken bage, Kubahan maka katangKu tuhu-tuhu jadi baban man bana. Bangsa e nggo iputar balikkenna kata Dibatana, Dibata si enggeluh, TUHAN si Mada Kuasa.
37 Jeremia sungkuni nabi-nabi e, nindu, 'Kai jabap TUHAN man bandu? Kai nina TUHAN?'
38 Janah adi la ia patuh man perentahKu alu melasken kata, 'baban TUHAN' kataken man bana maka
39 la banci lang Kutangkap ia jenari Kuambengken i bas adep-adepenKu nari, subuk ia, bage pe kota si nggo Kubereken man bana ras man nini-ninina.
40 Kubahan mela dingen juru iakapna, janah la terlupaken seh rasa lalap."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA