Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ PANGERAN makon sengko’

² manapa’ kabar reya ka sakabbinna oreng e Yerusalim, "He Isra’il, Sengko’ enga’ saapa estona ba’na e bakto gi’ ngodhana; saapa rajana kataresna’anna ba’na e bakto Sengko’ buru akabin ban ba’na. Ba’na noro’ bunte’ Sengko’ ka ra-ara, lebat e dhaera se tadha’ men-tamennanna.

³ Isra’il, ba’na pera’ Tang andhi’ malolo, buwana Tang ate. Sakabbinna oreng se manyangsara ba’na bi’ Sengko’ epanemmo calaka’. Sengko’, PANGERAN, la ngoca’."

⁴ Edhingngagi pessenna PANGERAN, toronanna Yakub ban ku-suku Isra’il!

⁵ PANGERAN adhabu kantha reya, "Sala apa Sengko’ reya ca’na bangatowana ba’na, me’ sampe’ mongkore Sengko’ kantha reya? Bangatowana ba’na nyerser brahala se tadha’ argana dhi-budhina aba’na dibi’ eya-seya.

⁶ Sengko’ ta’ eparduli; Sengko’, se nonton reng-oreng jareya e dhalem parjalanan, se makalowar reng-oreng jareya dhari Messer lebat e sagara beddhi, lebat tana kajal se ba’-celbing, tana se babaja sarta kerreng, ra-ara se ta’ ekennengnge ban ta’ elebadi oreng!

⁷ Ka nagara se landhu Sengko’ ngeba reng-oreng jareya kaangguy ane’madi hasella ban sabarang se bagus se badha e jadhiya. Tape e dhissa’ Tang tana epanajjis bi’ reng-oreng jareya Tang dhi’-andhi’ epadaddi barang se majitjit ate.

⁸ Para imam tadha’ se atanya badha e dhimma Sengko’, PANGERANna. Para pangobasana hokom tadha’ se taowa sapa Sengko’ reya, para pangobasa aberonta’ ka Sengko’. Bit nyamana Ba’al para nabbi acaca, sarta nyemba ka brahala se ta’ aguna."

⁹ PANGERAN adhabu, "Sateya Tang ommat bi’ Sengko’ eparkara’agiya pole, ban toronanna eadilana.

¹⁰ Lebadi paseser Siprus e bagiyan bara’, kerem oreng ka temor ka nagara Kedar, pareksa e jadhiya patete, apa e jadhiya tao badha kadaddiyan se kantha jareya?

¹¹ Ta’ tao badha bangsa se morobi illahna, sanajjan jareya banne Allah se saongguna. Tape Tang ommat morobi Sengko’ se eandellagi aba’na, eporop ban barang se ta’ bisa apa-rapa.

¹² Daddi, he langnge’, mara agundhek! Pacengngeng ban pangetter!

¹³ Tang ommat la agabay dusa dhu macem: mongkore Sengko’, somberra aeng se aberri’ odhi’ ka manossa; reng-oreng jareya agabay taman kaangguy kaparlowanna dibi’, taman se bucor se ta’ ekenneng panyempen aengnga."

¹⁴ "Isra’il banne dunor, ban banne toronanna dunor. Tape arapa me’ daddi burunanna mosona?

¹⁵ Mosona agaung e adha’anna akantha macan, tanana epakajal tadha’ essena, tha-kotthana ekello’ apoy tadha’ karena, epanneng ta’ eoros ban tadha’ orengnga.

¹⁶ He Isra’il, obu’ e cethagga ba’na ecokor bi’ oreng Memfis sarta Tahpanhes.

¹⁷ Ba’na dibi’ se daddi lantaranna aba’na katebanan sakabbinna jareya, sabab e bakto bi’ Sengko’ ba’na etonton e dhalem parjalanan ba’na mongkore Sengko’, GUSTE Allahna.

¹⁸ Apa ontongnga ba’na entar ka Messer? Entara ka Songay Nil ngenoma aeng? Apa ontongnga ba’na entar ka Asyur? Ngenoma aengnga Songay Efrat?

¹⁹ Kajahadanna ba’na dibi’ se ngokom ba’na, ba’na taseksa polana nolak Sengko’, Allahna. Sateya rassa’agi dibi’ saapa pae’na ban sake’na mon Sengko’ epongkore ban ta’ ehormat bi’ ba’na. Sengko’, GUSTE Allahna ba’na, la ngoca’; Sengko’ Guste ALLAH Se Mahatenggi ban Mahakobasa."

²⁰ PANGERAN Se Mahatenggi adhabu, "La abit ba’na ta’ endha’ ngabdi ka Sengko’; ta’ endha’ ta’at otabana nyemba ka Sengko’. E attassa saneyap gumo’ se ngajul e tenggina, ban e babana saneyap kajuwan se rampa’ ba’na nyemba ba-diba kalandhuwan.

²¹ Bi’ Sengko’ ba’na etamen epakantha bungkana anggur peleyan Sengko’ dhari ne-bine petthengan. Tape sateya ba’na aoba daddi bu-tombuwan alas se ta’ aguna.

²² Maske ba’na mandhi ngangguy sabun sabannya’na, tape da’-gedda’na kasala’anna ba’na bi’ Sengko’ gi’ etangale keya.

²³ Bangal onggu ba’na ngoca’ ja’ ba’na ta’ kejjem tengkana, ban ja’ ba’na ta’ tao noro’ Ba’al. Abas tengkana ba’na e cora rowa, kaenga’e kajahadanna ba’na, pas akone! Ba’na padha ban onta bine’ se barai, berka’ san-kassannagi ta’ ekenneng kaddhali’i,

²⁴ pas maso’ ka ra-ara se seppe. Onta jareya ta’ ekenneng tagenne mon teppa’na barai. Sapa se terro ka onta jareya ta’ osa nyare, sabab e mosem akarasmen onta bine’ jareya matabar aba’na ros-terrosan.

²⁵ Isra’il, ba’na ja’ berka’ nyerser ba-diba, ja’ aorak ngolok nyamana, dhaggi’ sokona ba’na nyornyor ban gerrunganna kerreng polana pelka’. ‘Enja’, sengko’ ta’ kera abali pole,’ ca’na ba’na, ’sabab sengko’ taresna ka ba-diba, ban noro’a ba-diba jareya.’"

²⁶ PANGERAN adhabu, "Padha ban maleng se arassa malo e bakto etangkep, bariya keya ba’na tanto bakal malowa, he reng-oreng Isra’il, to-ratona ban ja-pangrajana ba’na, mam-imam ban bi-nabbina ba’na!

²⁷ Ba’na bakal epamalowa, sabab kaju sakerra’ bi’ ba’na ekoca’ rama ban bato satepak ekoca’ ebu. Ba’na ta’ nyander ka Sengko’, la’-mala’ ngonduri Sengko’. Tape mon nemmo kasossa’an, ba’na ngolok Sengko’ menta salamet.

²⁸ Badha e dhimma la-brahala gabayanna ba’na jarowa? Mon ba’na nemmo kasossa’an, soro ba-diba jareya masalamet ba’na, mon pajat ba-diba jareya bisa! He Yehuda, bannya’na ba-dibana ba’na padha ban bannya’na tha-kotthana!

²⁹ Apa se ta’ ekasenneng ba’na ka Sengko’ reya, me’ sampe’ ba’na alaban ka Sengko’?

³⁰ Parcoma ba’na eokom bi’ Sengko’, sabab ba’na ta’ endha’ mon epaenga’. Padha ban macan se parappa’na ngamok, kantha jareya keya ba’na mate’e bi-nabbina ba’na.

³¹ He ommat Isra’il, edhingngagi Tang caca reya. Apa Sengko’ reya ka ba’na tao ekarassa padha ban ra-ara otabana padha ban nagara se petteng calemodan? Tape arapa ba’na me’ ngoca’ ja’ ba’na terro bebasa, ban ta’ endha’ abali pole ka Sengko’?

³² Ba’ badha’a paraban se loppa ka pareyasanna, otabana pangantan bine’ se loppa ka pangangguyya pangantanna? Tape ba’na la ce’ abidda se loppa ka Sengko’ — la ta’ ekenneng bitong abidda.

³³ Ba’na ce’ penterra ngator cara kaangguy makapencot atena se-kakasena. Sondel se paleng bejjat sakale gi’ bisa olle pangajaran dhari ba’na!

³⁴ Kalambina ba’na gedda’ ban dharana oreng mesken ban oreng se ta’ andhi’ sala, banne ban dharana maleng se ekenneng pega’. Maske kantha jareya,

³⁵ ba’na ngoca’ ja’ ba’na ta’ sala, ja’ Sengko’ ta’ peggel pole ka ba’na. Tape Sengko’, PANGERAN, ngokoma ba’na polana ba’na ta’ endha’ ngako ja’ ba’na sala.

³⁶ Ce’ ceppedda ba’na entar ka ba-dibana bangsa laen kaangguy menta tolong! Ba’na tanto epaastaba bi’ Messer, akantha se epaastaba Asyur.

³⁷ Ba’na bakal ondura dhari Messer kalaban ate astaba ban malo. Sengko’, PANGERAN, la nolak ba-diba se eandellagi ba’na jareya; ba’na ta’ kera olle kaontongan pa-apa dhari ba-diba jareya."

Yeremia

Video Yeremia 2

Ikuti Kami:

KONTAK | PARTISIPASI | DONASI