Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hu bangku, “Porini pe roh si Musa pakon si Samuel hu lobei-Hu, seng anjai marulak-ulakan uhur-Hu mangidah bangsa on, palaho ma sidea hun lobei-Hu, suruh ma sidea misir!
2 Jadi anggo ihatahon sidea bam, ʻHuja ma hanami laho?ʼ Hatahon ma bani sidea, “Sonon do hata ni Jahowa, ʻNa dob tinontuhon hu hamatean, hu hamatean ma; na hubani podang, bani podang ma; na bani lohei bani lohei ma, anjaha na hu buangan, hu habuangan ma.ʼ
3 Ai parohon-Ku do ompat masam hasedaon bani sidea,” nini Jahowa, “Podang laho mamunuh, baliang laho mamparsilbak, manuk-manuk na i awang-awang pakon binatang na i talun laho mangankon pakon mansedahon.
4 Bahenon-Ku ma sidea gabe songgot-songgot bani haganup harajaon na i tanoh on, halani pambahenan ni si Manase, anak ni si Hiskia, raja ni Juda, i Jerusalem.
5 Ise ma na ra marholong ni atei bam, ale Jerusalem, anjaha ise ma na ra manangisi ho? Anjaha ise ma na ra tuluy, laho manungkun atap na horas-horas ho?
6 Domma iambukkon ho Ahu,” nini Jahowa, “Itundalhon ho do Ahu. Halani ai huondamkon do tangan-Ku dompak ho laho mansedahon ho; domma loja Ahu na manganju-anju in.
7 Domma Hupiari sidea bani anduri ibagas huta-huta ni nagori. Domma popor sidea Hubahen, domma Huparseda bangsang-Ku; halani seng ra sidea mubah humbani parlahouni.
8 Hubahen do na mabalu i tongah-tongah ni sidea bueinan ase horsik ni laut. Huparoh do sipangagou tongah arian bani parinangon ampa niombahni; sompong do Huparoh bani sidea biar ampa songgot-songgot.
9 Mandatei do parinangon siparanak na pitu, tompas do ia halani galekni; sundut do mata ni ari sanggah arian ope; maila do ia anjaha tarbador. Anjaha na tading ai humbani sidea ondoskonon-Ku do bani podang i lobei ni munsuh ni sidea,” nini Jahowa.
10 Bursik ma ahu, ale inang, na tinubuhkonmu on, gabe jolma sitinggilan ampa silawanon bani ganup nagori on! Seng namin siparidou atap siparutang ahu, hape ganup do sidea mamapai ahu.
11 Ham Jahowa, patut ma ai, porini seng ongga huelek-elek Ham mangkopkop sidea, porini seng roh ahu hu lobei-Mu mangapiti munsuh ai bani panorang hasosakan ampa panorang hamagouan?
12 Boi ma ponggolhononkon bosi, bosi na hun utara ai ampa tombaga?
13 Ondoskonon-Ku ma arta ampa habayakonmu gabe taban-taban, seng pala marboli halani dousamu, bani haganup nagorimu.
14 Bahenon-Ku ma ho gabe jabolon ni munsuhmu bani sada nagori na so tinandamu; ai domma gara apuy ni ringis-Ku bam, tongtong do gara ai.
15 Ham Jahowa, ibotoh Ham do; ingat Ham ma ahu anjaha parayak Ham ma; marlulu ma Ham pasal ahu, dompak na mardakdak ahu. Ulang ma masabkon Ham ahu. Ulang ma marlumbang ni uhur lalab Ham bani munsuh-Mu. Botoh Ham ma, halani Ham do ase hona risa ahu.
16 Dob jumpah hata-Mu, hupangan ma ai; gabe malas ni uhur do bangku hata-Mu ampa hamegahon bani uhurhu; ai marpanggorani bani goran-Mu do ahu, Ham Jahowa Naibata Zebaot.
17 Seng ongga hundul-hundul ahu i tongah-tongah ni halak sipargereh-gereh, atap marmalas-malas ni uhur ahu. Suhi do ahu hundul, halani tangan-Mu na bangku ai; ai gok ringis do uhurhu ibahen Ham.
18 Mase ma lang maronti naborit bangku, lang hatambaran ugahku, manjua pamalumon? Songon bah tubuh na paoto-otohon do Ham bangku, songon bah horah-horah.”
19 Halani ai sonon do hata ni Jahowa, “Anggo mulak ho hu bangku, pasuangon-Ku do ho, anjaha jongjong ma ho i lobei-Hu; anggo na sintong-sintong iluarhon ho, seng na so margagan, gabe pamangan ma ho Bangku. Maningon ho do dompakkonon ni sidea, tapi anggo ho ulang ma dompakkon sidea.
20 Bahenon-Ku do ho bani bangsa on gabe tembok tombaga na so tarpanangkih; porangon ni sidea do ho tapi seng tartaluhon sidea ho; tongon Ahu do mangkasomani ho laho mangurupi ampa paluahkon ho,” nini Jahowa.
21 “Sai na paluahon-Ku do ho hun tangan ni parjahat, anjaha tobuson-Ku do ho hun tangan ni sipangodoh-odoh.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA