Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Punna kuerang parkaraku mae ri dallekanTa, o Batara, attantu la’buttimi angkanaya iKatte tojeng. Mingka ero’ tonga’ akkuta’nang mae ri Katte ri passala’na nikanaya kaadelang: Angngapai tau ja’dalaka naia kalumanynyang? Angngapa natau tenaya nalambusu’ baji’ panggappanna?
2 Kilamungi ke’nanga rapang lamung-lamung, nampa angngaka’ ke’nanga, attimbo, siagang a’rappo. Tuli nabicara bajitTa ke’nanga, mingka lalang atinna, sikontutojenna tena najampangiKi’.
3 Mingka iKatte, o Batara, Kiassenga’. Kiciniki apa kugaukanga, siagang Kiassengi antekamma pa’maikku mae ri Katte. Kiembai anjo sikamma tau ja’dalaka assulu’, erangi ke’nanga rapang gimbala’ mange ri pamolonganga. Kijagai ke’nanga sa’genna narapi’ wattunna nipolong ke’nanga.
4 Siapapi sallona kalotoro’ anne pa’rasanganga, siagang kalumeng rukuka ri tunggala’ kokoa? Matemi jangang-janganga siagang olo’-olo’ maraengannaya lanri kaja’dallanna bansana ikambe. Nakana ke’nanga, angkanaya talakucinikai sarenna ke’nanga."
5 Nakana Batara, "Yeremia, punna mangngangko appa’lumba siagang rupataua, antekamma olonu lakkulle appa’lumba siagang jaranga? Punna mallakko ri butta amanga, apa lanugaukang punna niakko lalang ri romang akkatintinga ri birinna Binanga Yordan.
6 Nibaliang mako ba’lalo ri bija pammanakannu tonji; amminawangi ke’nanga ambakkaiko. Teako tappakki mae ri ke’nanga, manna pole nate’ne bicaranna ke’nanga."
7 Nakana Batara, "Tampa’ pammantangangKu tenamo naKujampangi; pa’rasangang Kupatanga Kubokoimi, siagang ummakKu Kukamaseanga Kupassareammi ri limanna musu-musunna.
8 Umma’ nipileKu nabaliangA’; rapang singa ri romang lompoa, kammaminjo ammarrunna sa’ranna ke’nanga mae ri Nakke. Iaminjo saba’na naKubirisi’ mae ri ke’nanga.
9 Rapangi ke’nanga jangang-jangang nibuccuka ri balangkoa’ battu ri kere-keremae. Kioki sikontu olo’-olo’ niaka ri romanga untu’ amminawang ampaccappuki ke’nanga.
10 Jai pamarenta bansa maraeng le’ba’ ampanraki koko anggorokKu siagang angngonjo’-onjokangi sikamma kokongKu. Pa’rasangang ga’gaKu napinrai a’jari parang luara’ sinoa.
11 Ba, Kucini’ ngasengi ke’nanga ampa’jari tampa’ sinoi pa’rasangangKu, appakapacce pa’mai’. Ta’ronang ngasemmi, tenamo amparhatikangi.
12 Battu ba’leang ri parang lompoa ri pa’monconganga, battu taua angngellaki. Kupabattui pa’bundukanga untu’ ampanraki sikontu pa’rasanganga, sa’genna tenamo manna sitau akkulle attallasa’ amang.
13 UmmakKu appakioroki gandung, mingka katinting nagappa. Akkareso lompoi ke’nanga, mingka tena nanggappa wassele’ ri usahana ke’nanga. Teai sitapo’ larroKu sa’genna sala ngaseng kattoanna ke’nanga!"
14 Nakana Batara, "Iaminne pasangKu ri passala’na bansa-bansa singngampi’na Israel, ampanrakiai pa’rasangang Kupassareanga mae ri ummakKu Israel. Rapang lamung-lamung nibi’buka battu ri buttaya, kamma tomminjo sikamma tau ja’dalaka laKupasuluki battu ri sikamma pa’rasanganna ke’nanga, kammayatompa laKulappassangi Yehuda battu ri panna’gallanna ke’nanga.
15 Mingka punna le’ba’ Kupasulu’ ke’nanga, laKukamaseangi ammotere’ ke’nanga; tunggala’ bansaya laKuerangi ammotere’ mange ri massing pa’rasangang kalenna.
16 Punna attojeng-tojeng pa’mai’na ke’nanga ero’ antarimai agamana ummakKu siagang ero’ assumpa angkana, ‘Lanri Batara mattallasaka,’ — sangkamma batena riolo ke’nanga angngajaraki ummakKu assumpa lanri Rewata Baal — la’jarimi ke’nanga golonganna ummakKu siagang la’jari kalumanynyangi ke’nanga.
17 Mingka bansa tenaya naero’ mannuruki ri Nakke, laKubi’buki sanrapang lamung-lamung siagang laKupaccappuki. INakke, Batara, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA